Johannes Capitulo 9
1 E al passar Jesus videva un homine que esseva cec desde le nascentia. 2 E su discipulos le interrogava e diceva: Rabbi, qui ha peccate, ille o su genitores, proque ille sia nascite cec? 3 Jesus respondeva: Ni ille peccava ni su genitores; sed es assi a fin que‚ le operas de Deo sia manifestate in ille. 4 Es necessari que io compli le operas de Ille qui me ha inviate, dum es jorno; le nocte veni in lo qual nemo pote laborar. 5 Dum io es in le mundo, io es le luce del mundo. 6 Post haber dicite isto, sputava in terra, e faceva fango con le saliva e ungueva le oculos del ceco con le fango, 7 e le diceva: Vade e lava te in le fonte de Siloe (que significa: Inviato). Ille dunque vadeva e se lavava e quando tornava ille videva. 8 Ergo le vicinos e qui ante le habeva vidite, perque ille esseva un mendicante, diceva: Iste non es ille qui esseva sedite a mendicar? 9 le unes diceva: Es ille. Alteres diceva: No, sed es similar a ille. E ille diceva: Es io. 10 Alora illes le demandava: Como te esseva aperite le oculos? 11 Ille respondeva: Le homine que se appella Jesus, faceva fango e me ungueva con illo le oculos e me diceva: Vade a lavar te al fonte de Siloe. Io dunque vadeva, e me lavava e recuperava le vista. 12 E illes le diceva: Ubi es ille? Ille respondeva: Io non lo sape. 13 Illes portava al Phariseos ille qui habeva essite cec. 14 E esseva in die de sabbato que Jesus habeva facite le fango e le habeva aperite le oculos. 15 le Phariseos dunque le demandava anque illes como ille habeva recuperate le vista. E ille les diceva: [Jesus] me poneva fango supra le oculos, io me lavava e nunc io vide. 16 Ergo alicun del Phariseos diceva: Celle homine non es de Deo perque ille non observa le sabbato. Sed alteres diceva: como pote un homine peccator facer tal miraculos? E habeva disaccordo inter illes. 17 Illes dunque diceva de nove al ceco: Que dice tu de ille qui te aperiva le oculos? Ille respondeva: Ille es un propheta. 18 le Judeos dunque non credeva que ille habeva essite cec e habeva recuperate le vista, usque illes non clamava le genitores de ille qui habeva recuperate le vista, 19 e les interrogava assi: Es iste vostre filio qui vos dice haber nascite cec? Como es dunque que nunc ille vide? 20 e su genitores respondeva: Nos sape que iste es nostre filio, e que ille nasceva cec; 21 sed nos non sape como ille nunc vide, ni sape nos qui le ha aperite le oculos; demanda a ille; ille ha le etate e pote parlar per se ipse. 22 E isto diceva su genitores perque illes habeva pavor del Judeos; pois que le Judeos habeva jam stabilite que si uno recognosceva Jesus como Christo, esseva expellite del synagoga. 23 Per isto diceva su genitores: Ille ha le etate, demanda a ille. 24 Illes dunque clamava per le secunde vice le homine que habeva essite cec, e le diceva: Da gloria a Deo! Nos sape que celle homine es un peccator. 25 Ille respondeva: Si ille sia un peccator, io non lo sape, un cosa io sape, que io esseva cec e nunc io vide. 26 Illes alora le diceva: que te faceva ille? como te aperiva le oculos? 27 Ille les respondeva: Io ja vos lo ha dicite e vos non me ha ascoltate; perque vole vos audir lo de nove? Vole forsan vos etiam devenir su discipulos? 28 Illes le ultragiava e le diceva: Forsan tu es discipulo de ille; sed nos es discipulos de Moses. 29 Nos sape que a Moses Deo ha parlate; sed quanto a iste, nos non sape de ubi ille sia. 30 Respondeva ille homine e les diceva: Isto pois es le meravilia: que vos non sape de ubi ille sia; e ille me ha aperite le oculos! 31 On sape que Deo non ascolta le peccatores; sed si uno es devote a Deo e face su voluntate Ille le exaudi. 32 Desde le principio de mundo jammais se audiva que uno ha aperite le oculos a un ceco de nascentia. 33 Si iste homine non esseva de Deo, non poterea facer nil. 34 Illes respondeva e le diceva: Tu es completemente nascite in peccato e tu pretende inseniar a nos? E illes le expelleva foris. 35 Jesus audiva que illes le habeva expellite; e quando le trovava le diceva: Crede tu in le Filio de Deo? 36 Ille respondeva: E qui es ille, Senior, a fin que io pote creder in ille? 37 Jesus le diceva: Tu le ha jam vidite; es ille qui parla con te. 38 E ille diceva: Senior, io crede. E ille se prostrava pro adorar [Jesus]. 39 E Jesus diceva: Io ha venite a iste mundo a fin que‚ illes qui non vide pote vider, e qui vide deveni cec. 40 E alicun Phariseos que esseva con ille al audir iste cosas le diceva: Esque anque nos es cec? 41 Jesus les respondeva: Si vos esseva cec, vos non haberea alicun peccato; sed como vos dice: Nos vide, ergo vostre peccato remane in vos.
1 2 3 4 5 6 7 8 9 10 11 12 13 14 15 16 17 18 19 20 21
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev