Canti Còrsi/Cose andate/A Falletta
A u mio figlianu F. Bernamonti.
Ti vurrebbe rigalà
Qualcosa di gran balore,
Chi ti tuccassi lu core,
Ma un sò cosa t’aghiu a dà.
Tè, cun sta falletta ’speru.
Di cuntentatti da veru.
J.-P. Lucciardi.
«Mi vulia stà tranquilla
Ma la lingua mi brullica,
E cos’aghiu nant’u core
Tantu ci’òle che la dica,
Perchè nun si pò piettà
So ch’è pura verità.
«So cuntenta quande sentu
Rammintà u tempu passatu;
Parlà di rocca e lumera,
Chiccara e fornu zappatu,
Deda, stacciu, e tante cose
Tutte care e preziose.
«Segnu è di ricunuscenza,
Di rispettu e di bon core,
A pensà a le cose andate
Quantu chi bi face onore.
I Corsi a li so duveri
So stati sempre sinceri.
«Ma perchè pò qualchi bolta
Un parlà di la falletta?
L’hanu messa in d’un cascione
Allibrata e stretta stretta.
Pattu ch’ella un sia cacciata
Perchè di moda è passata.
«E purtantu un bon ricordiu
Credu chi u si merti anch’ella:
Era utile a la vecchia
E adurnava la zitella.
O quantu ch’ella piecia
A u fresteru chi a vidia!
«Quessu è u più bellu ricordiu
Ch’ete di e vostre caccare.
Se un bulete più purtalla
Fate cum’ella vi pare.
Ma un nigate — quessa un sia! —
E qualità ch’ell’avia.
«L’estate cume l’imbernu
A moda un passava mai;
A quante povare jente
Li piettava li so guai.
Cu a falletta si paria
Sempre in festa e in signuria.
«C’era fallette turchine
A bon prezzu e d’indiana;
Eppò ci n’era di lussu
In seta fine o di lana.
Tutte ricche e cherche a fiori
Di differente culori.
«Ma fussinu cumu sia,
Eranu tanti giuielli,
E a le donne chiuche o grande,
Stavanu cume pinnelli
Risurtia lu so visu
Cume un fior di paradisu.
«Eranu d’ecunumia
Più che i sciali e li mantelli,
E la donna figurava
Megliu che cun sti cappelli.
Spalle e brecce li cupria
E pene in l’osse un n’avia.
«C’un curdunucciu di trenna
A la vita era ligata;
E nant’u mandile cintu
C’un spirlone era attaccata.
Cume in d’un nicchiu si stava
A donna chi la purtava.
«Quantu chi facia risorte
I vezzi di l’andatura;
Quand’era stretta a lu pettu
Stava cume una pittura.
E le donne un so mai state
Cume in su tempu apprezzate.
«Pensate a le vostre mamme
Sopratuttu a e caccarone,
Quantu in di la so falletta
Avianu divuzione.
Ne pigliavanu primura
Elle, cun tamanta cura!
«Un fussi mache per quessa
Ricurdà boi, vi duvete
Di la falletta, la tinta!
Chi dimenticatu avete.
Dateli una piezza, or fate,
Accantu a le cose andate!»
Sti lamenti di a falletta
Una sera aghiu cupiatu,
Quandu a tante cose antiche
Cun dilettu avia pensatu;
E ch’intesi cun ragione
Pienghie tantu a passione.