Canti Còrsi/Cose andate/A Barretta-misgia
A u mio vecchiu e sempre più giovanu
amicu, Frencescu Pinnelli.
Quante volte s’è parlatu
Di le vecchie cose andate;
Inseme quante serate
In sa tema emu passatu.
In ricordiu d’elle accetta,
O Frencè, sta canzunetta.
J.-P. Lucciardi.
Eccu cos’ella dicia
A barretta-misgia un ghiornu,
Mentre mi stava pensosu
Solu, arimbatu in d’un scornu
Punderendu li discorsi
D’i vecchj custumi corsi:
«Colla e fala, passa e bene,
Ma cun me sempre s’intisgia;
Pare ch’ellu si vergogni
Di a vecchia barretta-misgia,
Dopu ch’ell’è infrencisitu
Stu Cursacciu imbavacchjtu.
«So furzata a parlà male
Cume una mal’allevata,
Perchè di a so ingratitutine
Ne so più che stumacata.
Mi vergognu a dilla franca,
D’esse in di sta casciapanca.
«So a mezzu a zenacci vecchj
E bragheri d’ogni sorte;
Nenzu che di fà sta vita
Saria megliu ancu la morte.
Preferiscu, a dicu chiara,
Cunsumami a mezza fiara.
«Cascu a pezzi da u mullizzu,
E so tutta tignulata;
Una topa musinosa
Ghiunghie a facci a so curpata.
Dunque nun pudete crede
Cos’ellu mi tocca a bede.
«Un so micca vanitosa,
Che tenga a la signuria,
Ma un pucucciu d’amorpropriu
L’aghiu, e più ne vularia,
Per cunservà cume prima
Sempre di tutti la stima.
«S’è passatu un bellu tempu,
O Còrsu, e ti face onore,
Duve la barretta-misgia
Cun ragiò facia furore:
Quandu pe a to indipendenza
Luttava cun preputenza.
«Tandu era la benbenuta
E sai quantu ti juvava,
Quandu cu a cispra a la mana
E nuttate, tu, passava
In guerra c’u Jenuvese,
Tirannu di u to paese.
«Era la barretta-misgia
Per te un mobile sicuru;
Ci tenia li to solli
E certi secreti... o puru.
A spiglia cun l’erbaghiolu,
Se tu ghiera campagnolu.
«Ti cunservava in salute
L’imbernu cume l’estate;
E ti juru un s’è mai vistu
Quant’avà chiocche pilate,
Chi ti cupria l’arricchioni
Cu e cutrure e i nivaghioni.
«T’asciuvava lu sudore....
E statti pur persuasu
Ch’in si tempi un ti lasciava
Passà mosche sott’u nasu,
Chi ti tenia cun ardore
Sempre u to sangue in bullore.
«Eppò i vecchj e li zitelli
Quantu l’aghiu avantaggiati,
Ti ne ponu fà la prova
Sopratuttu i ’namurati;
A barretta cu i so vezzi
Facia cascà i cori a pezzi.
«Mi sapia purtà in guadagnu
L’amante cunquistatore;
Mi facia pende in davanti
Per piettà lu so dulore,
Quellu ch’era spusessatu
Da un rivale furtunatu.
«Quandu a to moglie vidia
Quella barretta impinnata,
T’offria subitu lu brecciu
Per fassi una passighiata.
E ti guerdava in guadrina
Fiera più che una regina.
«Tandu a donna, per lu tonu!
A berbetta un ti purtava;
Si qualchi bolta vidia
Chi tu, in zerga, m’incalfava,
Capubassu e zitta zitta
Filava... o chi manuritta!
«Era tu ch’in quelli tempi
Cumandava in casa toia;
E u travagliu notte e ghiornu
Un ti dava mai noia.
In ogni cosa era degnu
Perchè avia a mente a segnu.
«Chi prugetti ci pò nasce
Avà sottu se pagliette;
Bandita è la serietà,
L’ommi un n’hanu che fraschette,
Torna a la barretta-misgia
Ch’ella almenu a nimu ingrisgia.
«Intantu dammi una piezza
Accantu a le cose andate;
E si a li vecchj custumi,
E a tante mode passate,
Turnarai, a to barretta
Ghiè qui pronta... chi t’aspetta.