Canti Còrsi/Cose viste/E Giovane di u mio Paese
O muse di l’altu coru,
Bengu cun dolce speranza;
A dumandabbi assistanza,
E a tutte quante v’imploru,
Per ludà di u mio paese
E giuvanette curtese.
Si so tutte, in generale,
Belle, oneste e birtuose;
Dolce, amabile e bizzose,
Tutte so donne ideale,
Chi feriscenu ogni core
Cun s’occhj pieni d’amore.
Pe i Vezzi so numerose
Le gherbate damigelle,
Cusi simpatiche e snelle,
Fresche cume gigli e rose.
V’imbianu da lu core
Raggi di virtù e d’amore.
So più dolce che lu mele,
So di manere civile;
Sempre amabile e ghientile,
A u duvere so fidele.
A so faccia risplendente
Pare un sole all’oriente.
In di u Corsu ciaschiduna
Dilicatu ha lu sembiante;
Ghiuru, chi so tutte quante
Più pumpose che la luna,
Quandu in celu preziosa,
Passa degna e maestosa.
Elle, hanu la taglia svelta
E le pome fatte a u tornu;
L’occhj chiari cume u jornu...
E di queste una gran scelta
Si pò fà fra tante belle
E timidette dunzelle.
In Campiendi so graziose
E sembranu tanti fiori
Freschi, e chi sperghienu odori,
Tantu so belle e bizzose.
Hanu puru lu so core,
L’occhj azzuri e pien d’ardore.
So giuvanotte distinte
E in tuttu ben’educate,
Si diceria chi le Fate
L’hanu in Venere dipinte,
E ch’in donu l’hanu datu
Sopra l’altre un dolce fatu.
Quelle di u Castagnu anch’elle
Hanu dolce lu surrisu,
Occhj neri e biancu visu,
Si diceria tante stelle,
Quandu lucenu la sera
In celu di primavera.
So pulite e accustumate
E piene di jentilezza;
Hanu tanta tennerezza.
Chi da tutti so ludate.
So e so labbre di vermiglia,
E so belle a maraviglia.
Quelle di u Pianellu apparu,
So in bellezza senza eguale,
Un cunoscenu rivale,
E u signore un donu raru
U l’ha datu soprappiù:
Colme sò d’ogni virtù:
A so fronte è alabastrina,
E guance culor di rose;
So caste, vaghe e pumpose,
Cume un gigliu la mattina.
In splendore ste zitelle,
Ponu luttà cu le stelle.
Pe u Pugghiolu e Lavandaghiu,
P’e Terrazze e p’e Petrelle,
Ci so le perle più belle...
Ogni casa è un rusulaghiu.
E di tutte lu so visu
Luce cume un paradisu.
Bi salutu, in generale,
Giovane di u mio paese;
Siate amabile e curtese,
Sempre salve d’ogni male.
Sempre abbiate fissu in core
D’esse custante all’onore!