Canti Còrsi/Cose viste/A Bucata
In cunfidenza, un amicu,
Un fattu m’ha racuntatu;
L’aghiu subitu cupiatu
Puntu a puntu... e qui bi dicu
Tale e quale, esattamente
Ciocche ha dettu: state a sente:
Pe una curtalina andava
Una sera infuriatu,
Essendu statu avisatu
Chi lu mio mulu inguarava
Granu in spica, e orzu, e linu,
In d’un chiosu, qui, bicinu.
Sentia cume un gran bisbigliu
Di chiacchiare e scaccanate,
Senza vede enime nate....
Ingrunzava già lu cigliu
Quandu vidi — o chi surpresa! —
Una bucatuccia tesa.
M’assicurai s’ell’era
Quella d’a mio innamurata,
Chi culà, l’avia aspettata
Spessu lu sabatu sera.
Infatti, eranu i so panni
Chi pientavanu malanni.
Dicianu le so calzette,
Sguattulendu allegrecchjne:
«Ha le zampe pullitrine
Seche cume duie serrette,
E trapelanu un sudore
Ch’attufaneghia lu core»
Ch’ella brusci a mezzu focu,
Dicianu li calzunetti;
Ci face talmente stretti
Chi schizzemu d’ogni locu.
Simu a risa a u tenditoghiu,
E a vergogna a u lavatoghiu.
A sa ròta si lagnava
Ch’ella un la stirava mai;
Dicia: «Sarebbenu guai
Si a so mamma un l’obligava
A cacciassi lu mullizzu
Chi dà lu gattivu stizzu.»
«Ch’ella crepi cume avale,
Dicia la cinta ridendu;
È un fattu propriu tremendu
Quantu stringne u stumacale.
Tira senza fà canzone
Finu all’ultimu tuvone.»
«A sò eju, perdiusanna,
Chi mi strappa le balene;
Ma e so coste un le pò tene,
Dicia u corset; e sa tiranna
Mette strecci agghiumellati
Per fà li petti imbuffati.»
«A me, dicia la casacca,
Un mi lava che all’Assunta;
E ne mancu mai m’appunta,
Ma la cara pò la sbacca!
Pare, da e schezze che aghiu,
Che sorti d’un prunicaghiu.»
«Ella, dicianu i so guanti.
Mai ne cosce ne riccama,
E si resta sempre in brama
A stringne a mana all’amanti.
Un si sà fà una frittata,
Ne cundissi un’insalata.»
U so mandile di capu
Li ne dava una tirata,
E dicia: «la scellerata
Mi dà sempre in borsa a u babbu,
Eppò in capu lesta lesta,
Mi mette i jorni di festa.»
«Ghiè per quessa, disse infine,
A resiglia in lana e seta,
Chi spessu spessu gumeta
Cos’ell’ha in di le stintine.
Ghiè la puzza di la pippa
Chi li rivolta la trippa.»
«Eju ne sò più d’una griscia.
Ma portu rispettu a me.
Capisciarete perchè...»
Cusi dicia la camiscia.
Certe cose un n’è permessu
Di dille, for che a cunfessu.
«A sapemu pò ancu noi
Gridavanu tutte inseme,
Ch’ella’è propriu di l’emme,
E ch’ell’è di l’esca... Eppoi?
Cridete chi su cerbellu
Uu trovi un coprimantellu?
A lu seculu chi corre
Di nunda un si po risponde;
A chi più le face tonde...
Quella, in capu, c’u so fiore,
Capiritta e a passu arditu
Passa abbrecciu a u so maritu...»
Sentendu sti sguatalasci,
M’aghiu coltu la bucata,
L’aghiu subitu ligata
Tutta ingutuppata a fasci,
E dentru un fossu a la ceca,
A lampai... mai più si veca.
Eppò corsi infuriatu
Da l’amica in quistione:
Un balsenu e so ragione....
Ne fui per sempre sbrugliatu.
Dissi: «E finita fra noi,
Ognun pe li fatti soi.»
E u mio mulu a si pascia
Inguarendu linu e granu...
Una voce pianu pianu,
All’arecchia mi dicia:
«Un n’hai pò persu l’annata
Per perde sa innamurata.»
Di st’esempiu prufittate,
O gherbate damigelle;
E chi e vostre bucatelle
Sianu sempre ben lavate.
Bale a di ch’in fatti o in detti
Un bi si trovi difetti.