Canti Còrsi/Cose viste/O leggiadra Rundinella!
O leggiadra rundinella
Chi sbulacchj a to piecere;
Tu chi poi a to vulere
Andà à bede questa e quella,
Sia dapertuttu acclamata,
Rundinella tantu amata.
Porti cun te la speranza,
Annunziu di primavera;
Tu, si l’imblema sincera
Di fedeltà e di custanza.
A la to vista ogni core
Ride e s’ingonfia d’amore.
Solu u meo in di stu jornu
Resta sordu ad ogni cantu
Armuniosu, chi tantu
Empie ogni strada e cuntornu;
E mezzu a tant’allegria
Un n’ha che malincunia
Una tortora jentile,
Vaga e piena d’ideale,
L’occhiu limpidu e leale,
Fresca più che un fior d’aprile,
Incuntrai per mio dilettu
E li deti lu mio affettu.
Nunda pò che a cuntemplalla.
Si dilatava u mio core:
Cume passavanu l’ore
Mentre stava ad ascultalla!
A me mi paria, l’ingrata
Micca tortora, ma fata.
Ma quandu gudia tantu,
In piena felicità,
Ebbi un colpu — Dio la sà! -
Chi cambiò a mio gioja in piantu.
A turturella è smarrita
Fendumi grave ferita.
E’ per quessa, o rundinella.
Che ti vurrebbe imbascià
D’andà pertuttu a circà
A mio infida turturella:
Quandu l’averai truvata,
Dilli cun voce gherbata:
So lu fidu messagere
D’un core anelante e tristu.
E legrime ch’aghiu vistu,
Ti la juru, so sincere.
So per te li tristi canti,
I suspiri cu li pianti.
Forse un credi lu turmentu
D’un core fertu d’amore:
Bive sempre cun dulore
Fra timore e fra spaventu.
Soffre ogni sorte di pene
Mezzu a si dure catene.»
Eccu, o cara rundinella,
Chi messaggiu ti cunfidu:
Prestu corri in quellu lidu
Duv’è la mio turturella.
E per cunvincela impiega
Ogn’erte suspira e prega!