Canti Còrsi/Cose andate/A Deda
A u scio L. Gistucci,
Dopu ch’aghiu, in timiconi,
Di a lumeruccia parlatu,
Pare ch’in ogni paese
Un vespaghiu abbia frugatu.
Un si sente pe sti canti
Più che doli e che scumpianti.
So l’antichi usi e custumi,
I stuviglioli e l’attrecci,
Ch’in granaghiu emu accantatu
A mezzu a li vecchj strecci,
Per chi pigliassi pusessu
Cosa chiamanu u... prugressu.
Si lagnanu tutti apparu,
E so tantu rincrisciuti.
Chi un simu ricunuscenti
D’i servizi ricevuti...
Ne so tristi e scunsulati
E ci trattanu d’ingrati.
Mi sentu chiamà per nome
Una sera, all’abrucata;
Ell’era la vecchia deda
Chi chiamava all’affucata,
Dicendumi: «Per piecè,
Stà qui a sente un pocu a me.
«Hai cantatu l’altru jornu,
Cun ragione, la lumera;
Parlendu di li servizi
Ch’ell’ha resu mane e sera.
Trovu chi ciòle a ludatti
Chi presenti bè li fatti.
«Ma di me pò un n’hai fiatatu,
Perchè so più mischinella;
E purtantu cunusciuta
So stata prima ch’ed ella;
E li Corsi, u mio parfume
Hanu gosu c’u mio lume.
«Mache di un custalli nunda
Era u mio solu difettu;
E servia pe intimpiatura
Per sulaghj, grata, e tettu.
Di me s’empïa lu paglieghiu,
A cherciula, e lu ligneghiu.
«Mi purtuvanu a brecciate
Pe atterzami a i so fuconi;
Facianu le scherbe longhe,
Diritte cume cironi;
Rosse a focu dapertuttu,
Cume sciappe di prisuttu.
«Un n’eranu stanze a lussu
Chi pe a deda ci vulia;
Ma qual’è ch’in quelli tempi
Circava la signuria?
Di più cari un n’ebbi, in beru!
Cume Paoli e Sampieru.
«Qual’è chi facia e salticcie
Cusi dolce e savurite,
1 salami e i figatelli
Da liccassine le dite?
Era a deda nun ci accorre,
C’u so fume e c’u so adore.
«Era — è ghiusta, ciòle a dilla —
Un pocu filighjnosa,
Ma u mio fume un face male,
Eppò cunserva ogni cosa.
Pe le pieghie e le muntagne
Mai nisunu avia macagne.
«Luccicavanu li travi,
A credenza e a stacciaghiola;
A casciapanca e la media,
A grata cu a castagnola;
A secchia, i guadri e li santi,
Cume beri diamanti.
«Mi si truvava in’gni locu:
In d’i currenti e all’ascosu;
Da u tuvone a u finestrinu...
Per me un c’era mai riposu.
Dapertuttu spimpillava
E gni cantu alluminava.
«Più e più bolte una vecchiona,
Tenia a deda a capu bassu:
E un zitellu ad alta voce
Leghia Telemacu o Tassu;
Tutta in giru, a famigliola,
Stava a sente cume in scola.
«Si cantavanu le lode,
I terzini e le canzone;
E u scularu a si scrivia
Nant’a ziglia di u fucone.
Mentre ch’ellu studiava.
Eju, allegra, sfiacculava.
«E donne eranu occupate
Tutte a qualchi faccendola;
E l’ommi, senza stà all’oziu,
Si cuntavanu una fola.
Ed eju facia colla e fala
Da u fucone a nant’a scala.
«Dunque sempre affaccendata
Dapertuttu mi truvava,
Ma di me bi ne scurdaste,
O Corsi!... Un lu meritava,
Un trattu di sta manera!
Statti allegru; A bona sera!»