This page has been proofread.
156
canti corsi
«Era — è ghiusta, ciòle a dilla —
Un pocu filighjnosa,
Ma u mio fume un face male,
Eppò cunserva ogni cosa.
Pe le pieghie e le muntagne
Mai nisunu avia macagne.
«Luccicavanu li travi,
A credenza e a stacciaghiola;
A casciapanca e la media,
A grata cu a castagnola;
A secchia, i guadri e li santi,
Cume beri diamanti.
«Mi si truvava in’gni locu:
In d’i currenti e all’ascosu;
Da u tuvone a u finestrinu...
Per me un c’era mai riposu.
Dapertuttu spimpillava
E gni cantu alluminava.
«Più e più bolte una vecchiona,
Tenia a deda a capu bassu:
E un zitellu ad alta voce
Leghia Telemacu o Tassu;
Tutta in giru, a famigliola,
Stava a sente cume in scola.
