Libro de Mormon - 1 Nephi - Capitulo 5
Saria se lamenta con Lehi - ambe gaude per le retorno de lor filios – illes offere sacrificios - le plattas de bronzo contine scriptos de Moses e del prophetas - le plattas identifica Lehi como descendente de Joseph - Lehi prophetisa circa su posteritate e le preservation del plattas. Circa 600 - 592 a.C.
1 Nephi 5:1 E adveniva post que nos habeva descendite a nostre patre in le deserto, ille esseva replenate de gaudio, e anque mi matre Saria esseva grandemente allegre, perque in veritate illa habeva suffrite a causa nostre.
1 Nephi 5:2 perque illa habeva credito que nos habeva perite in le deserto; e illa se habeva anque lamentate con mi patre, accusante le de esser un visionario, dicente: tu nos ha conducite foras del terra de nostre hereditate, mi filios non existe plus, e nunc nos perira in le deserto.
1 Nephi 5:3 E con expressiones de iste typo, mi matre se habeva lamentate con mi patre.
1 Nephi 5:4 e adveniva que mi patre la habeva parlate, dicente: Io admitte de esser un homine que ha visiones; perque, si io non habeva vidite in vision le cosas de Deo, io non haberea cognoscite le bonitate de Deo, ma io haberea restate a Jerusalem, e io haberea perite con mi fratres.
1 Nephi 5:5 Ma io ha obtenite un terra de promissa, de tote iste cosas io vermente gaude; si, e io sape que le Senior liberara mi filios del manos de Laban e ille les reportara ci pro nos.
1 Nephi 5:6 e con iste parolas mi patre Lehi consolava mi matre Saria circa nos, dum nos viagiava in le deserto in direction del terra de Jerusalem pro obtener le registros del Judeos.
1 Nephi 5:7 E quando nos habeva retornate al tenta de mi patre, ecce que lor gaudio esseva complete, e mi matre se consolava.
1 Nephi 5:8 e illa parlava dicente: Nunc io sape con certitude que le Senior ha commandate a mi marito de fugir al deserto; si, e io sape tamben con certitude que le Senior ha protegite mi filios, e les ha liberate del manos de Laban, e ille les ha date poter per medio del qual illes haberea potite complir lo que le Senior les habeva commandate. E in iste modo se exprimeva mi matre.
1 Nephi 5:9 E adveniva que illes gaudeva grandemente, e illes offereva un sacrificio e holocaustos al Senior; e illes rendeva gratias al Deo de Israel.
1 Nephi 5:10 E post que illes habeva date gratias al Deo de Israel, mi patre Lehi prendeva le registros scribite sur le plattas de bronzo e los examinava desde le initio.
1 Nephi 5:11 E ille videva que illos contineva le cinque libros de Moses, que dava un narration del creation del mundo e anque de Adam e Eva nostre prime genitores.
1 Nephi 5:12 E anque un historia del Judeos, desde le principio usque al initio del regno de Sedechia, rege de Juda.
1 Nephi 5:13 E anque le prophetias del sancte prophetas, desde le principio usque al initio del regno de Zedekiah; e anque multe prophetias que esseva pronunciate per bucca de Jeremia.
1 Nephi 5:14 E adveniva que mi patre Lehi trovava tamben supra le plattas de bronzo un genealogia de su patres; ergo ille apprendeva de esser un descendente de Joseph; si, mesme celle Joseph, filio de Jacob, que habeva essite vendite in Egypto e que le mano del Senior le habeva protegite a fin de poter preservar su patre Jacob e tote su casa del morte per fame.
1 Nephi 5:15 E ille esseva tamben conducite foras del sclavitude e del terra de Egypto per le mesme Deo que le habeva preservate.
1 Nephi 5:16 E assi mi patre Lehi discoperiva le genealogia de su patres. E anque Laban esseva un descendente de Joseph, ergo ille e su patres habeva tenite le registros.
1 Nephi 5:17 e nunc, quando mi patre videva tote iste cosas, ille esseva replenate del Spirito, e comenciava a prophetisar circa su posteritate --
1 Nephi 5:18 que iste plattas de bronzo haberea vadite a tote le nationes, tribos, linguas e populos que esseva de su descendentia.
1 Nephi 5:19 Ergo ille diceva que iste plattas de bronzo non essera jammais destruite, ni essera jammais deteriorate per le action del tempore, e ille prophetisava multe cosas circa su posteritate.
1 Nephi 5:20 E adveniva que usque alora io e mi patre habeva obedite a tote le commandamentos que le Senior nos habeva date.
1 Nephi 5:21 E nos habeva obtenite le registros que le Senior nos habeva commandate; e nos le habeva examinate e trovate que illos esseva indispensabiles, si, mesme de grandissimo valor pro nos, a fin que nos poteva preservar le inseniamentos del Senior pro nostre filios.
1 Nephi 5:22 Ergo esseva in le sagessa del Senior que nos le portava con nos, in nostre viage in le deserto in direction del terra promissa.
Capitulos:
1 2 3 4 5 6 7 8 9 10 11 12 13 14 15 16 17 18 19 20 21 22
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni