Libro de Mormon - 1 Nephi - Capitulo 19
Nephi fabrica plattas de metallo e registra le historia de su populo - le Deo de Israel venira post sex cento annos desde quando Lehi lassava Jerusalem - Nephi narra su suffrentias e su crucifixion - le Judeos essera minuspreciate e dispersate usque le ultime dies, quando illes retornara al Senior. Circa 588 - 570 a.C.
1 Nephi 19:1 E adveniva que le Senior me commandava de facer plattas de metallo pro poter registrar le historia de mi populo. E sur le plattas que io faceva io scribeva le historia de mi patre, nostre viages in le deserto e le prophetias de mi patre; e io scribeva tamben multe de mi prophetias.
1 Nephi 19:2 E quando io faceva le altere plattas, io non sapeva que le Senior me haberea commandate de facer iste plattas; ergo le historia de mi patre, le genealogia de su patres e le major parte de tote nostre vicissitudes in le deserto esseva registrate sur le prime plattas del quales io ha parlate; ergo, le cosas que adveniva ante que io faceva iste plattas es, in veritate, mentionate plus particularmente sur le prime plattas.
1 Nephi 19:3 E post haber facite iste plattas, io, Nephi, recipeva le commandamento de scriber in illos le partes plus clar e plus preciose del ministerio e le prophetias, e que le cosas scribite essera conservate per le instruction de mi populo, que haberea de posseder le pais, e anque pro altere sages scopos note al Senior.
1 Nephi 19:4 Ergo io, Nephi, faceva un historia minutiose del guerras, le contentiones e le destructiones de mi populo sur le altere plattas. E io commandava anque a mi populo de continuar a facer lo post mi morte perque iste plattas deberea esser transmittite de un generation al altere, o in altere parolas de un propheta al altere, usque a ulterior commandamentos del Senior.
1 Nephi 19:5 E un narration de como io faceva iste plattas essera date hic; e nunc, io procede secundo lo que io ha dicite, e io face iste a fin que le cosas plus sacre pote esser conservate pro esser cognoscite per mi populo.
1 Nephi 19:6 Nonobstante io scribe sur le plattas solmente lo que io retene sacro. E nunc, si io erra, tamben le antique errava; totevia io non vole excusar me con le errores del alteres; ma io volerea excusar me per mi debilitate secundo le carne.
1 Nephi 19:7 perque le cosas que alcunos estima de grande valor, pro le corpore e pro le anima, alteres los minusprecia e los calca sub le pedes. Si, le homines calca sub le pedes mesme le Deo de Israel; io dice calca sub le pedes, ma io deberea dicer lo con altere parolas – illes le considera nil e illes non ascolta su consilios.
1 Nephi 19:8 e ille venira, secundo le parolas del angelo, post sex cento annos desde quando mi patre lassava Jerusalem.
1 Nephi 19:9 E le mundo, a causa de su iniquitate, le judicara como un cosa sin valor; ergo illes le flagellara, e ille lo supportara; illes le percutera e ille lo supportara. Illes le sputara supra, e ille lo supportara a motivo de su amorose bonitate e de su longanimitate pro le filios del homines.
1 Nephi 19:10 E le Deo de nostre patres, que esseva conducite foras de Egypto, foras del sclavitude, e que esseva tamben preservate per ille in le deserto, si, le Deo de Abraham, e de Isaac, e le Deo de Jacob, se consignara, secundo le parolas del angelo, como un homine, in le manos del perverses, pro esser altiate, secundo le parolas de Zenoc, pro esser crucifigite, secundo le parolas de Neum, e pro esser sepelite in un sepulcro, secundo le parolas de Zenos, que ille pronunciava circa le tres jornos de tenebras, que essera un signo de su morte date a illes qui habita in le insulas del mar, e date plus specialmente a illes qui es del Casa de Israel.
1 Nephi 19:11 perque assi parlava le propheta: le Senior Deo visitara certemente tote le Casa de Israel in celle jorno, alcunos con su voce, a motivo de lor rectitude, pro lor grande gaudio e pro lor salvation, e alteres con le tonitros e le fulmines de su poter, con tempesta, foco, e vapores tenebrose, e con seismos, e con montanias que se altiara.
1 Nephi 19:12 E tote iste cosas debera certemente advenir, dice le propheta Zenos. E le roccas del terra debera finder se; e a causa del gemitos del terra, multe del reges del insulas del mar essera inducite per le Spirito de Deo a exclamar: le Deo del natura suffre.
1 Nephi 19:13 E quanto a illes qui habita a Jerusalem, dice le propheta, illes essera flagellate per tote le populos, perque illes habera crucifigite le Deo de Israel disviante lor corde de ille, rejectante le signos e le prodigios, e le poter e le gloria del Deo de Israel.
1 Nephi 19:14 E perque illes disvia de ille lor corde, dice le propheta, e illes ha minuspreciate le sancto de Israel, illes essera errante in le carne e illes perira, e devenira un ignominia e objecto de burla e illes essera odiate per tote le populos.
1 Nephi 19:15 Nonobstante, dice le propheta, quando venera le jorno in le qual illes non se disviara plus del sancto de Israel, alora ille se recordara del alliantias que ille faceva con lor patres.
1 Nephi 19:16 Si, alora ille se recordara del insulas del mar. Si, ille reunira tote le populos que es del Casa de Israel, dice le Senior, secundo le parolas del propheta Zenos, ab le quatro angulos del terra.
1 Nephi 19:17 Si, e tote le terra videra le salvation del Senior, dice le propheta; omne nation, tribo, lingua e populo essera benedicite.
1 Nephi 19:18 E io, Nephi, ha scribite iste cosas pro mi populo, pro poter lo forsan persuader a recordar se del Senior, su Redemptor.
1 Nephi 19:19 Ergo io parla a tote le Casa de Israel, si advenira que illes obtenera iste cosas.
1 Nephi 19:20 Perque, io sente pena, per illes qui es a Jerusalem, un affliction que me debilita usque al puncto que tote mi juncturas es debiles, perque si le Senior non habeva essite misericordiose, monstrante me lo que stava pro advenir a illes, mesme como ille faceva con le prophetas antique, anque io haberea perite.
1 Nephi 19:21 E certemente le Senior monstrava al antique prophetas tote le cosas concernente illes; e monstrava tamben a multos lo que concerne nos, ergo il es necessari que nos cognosce lo que les concerne, perque illo es scribite sur le plattas de bronzo.
1 Nephi 19:22 E adveniva que io, Nephi, inseniava iste cosas a mi fratres, e adveniva que io les legeva multe cosas que esseva gravate sur le plattas de bronzo, a fin que illes poteva cognoscer lo que le Senior habeva facite in altere paises, inter le populos antique.
1 Nephi 19:23 E io les legeva multe cosas que esseva scribite in le libros de Moses; ma pro poter persuader les plus completemente a creder in le Senior, lor Redemptor, io les legeva lo que habeva scribite le propheta Isaia; de facto io applicava a nos tote le Scripturas, a fin que illos nos poterea esser de profito e de instruction.
1 Nephi 19:24 io les parlava ergo, dicente: Audi le parolas del propheta, vos que es un resto del Casa de Israel, un ramo que esseva separate; audi le parolas del propheta que esseva scribite pro tote le Casa de Israel, e applica illos a vos mesme, a fin que vos pote nutrir sperantia assi como vostre fratres del qual vos esseva separate; perque in iste modo ha scribite le propheta.
Capitulos:
1 2 3 4 5 6 7 8 9 10 11 12 13 14 15 16 17 18 19 20 21 22
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni