Libro de Mormon - 1 Nephi - Capitulo 18
Le nave es completate - mentionate le nascentia de Jacob e Joseph - le gruppo se imbarca pro le terra promissa - le filios de Ismael e lor uxores se uni in grande festa e rebellion - Nephi es ligate, e le nave es pulsata retro per un terribile tempesta - Nephi es liberate e gratias a su oration le tempesta se calma - le arrivata al terra promissa. Circa 591 - 589 a.C.
1 Nephi 18:1 E adveniva que illes adorava le Senior, e illes me auxiliava; e nos laborava le ligno con singular factura. E le Senior me monstrava de tanto in tanto in que modo io debeva laborar le ligno del nave.
1 Nephi 18:2 Nunc io, Nephi, non laborava le ligno in le maniera del homines, ni construeva io le nave al maniera del homines, ma io lo construeva in le maniera que le Senior me habeva monstrate; ergo io lo construeva in maniera diverse del homines.
1 Nephi 18:3 E io, Nephi, vadeva subinde sur le montania e io orava sovente al Senior; ergo le Senior me monstrava grande cosas.
1 Nephi 18:4 E adveniva post que io habeva finite le nave, secundo le parola del Senior, mi fratres videva que il esseva un bon opera e de bellissime factura; ergo illes se humiliava de nove ante al Senior.
1 Nephi 18:5 E adveniva que le voce del Senior perveniva a mi patre, dicente que nos debeva altiar nos e entrar in le nave.
1 Nephi 18:6 E adveniva que le die sequente, post haber preparate omne cosa, multe fructa e carne, melle in abundantia e provisiones, secundo lo que nos habeva commandate le Senior, nos entrava in le nave con tote nostre carga, nostre semines e toto quanto nos habeva portate con nos, cata un secundo su etate; nos entrava ergo, totos in le nave, con nostre uxores e nostre filios.
1 Nephi 18:7 e nunc, mi patre habeva generate duo filios in le deserto: le major se appellava Jacob e le minor Joseph.
1 Nephi 18:8 E adveniva que, post que nos habeva totos entrate in le nave e habente portate con nos nostre provisiones e le cosas que le Senior nos habeva commandate, nos partiva in nostre viage per mar pulsate per le fortia del vento in direction del terra promissa.
1 Nephi 18:9 E post multe dies que nos viagiava pulsate per le fortia del vento, mi fratres e le filios de Ismael e anque lor uxores comenciava a allegrar se tanto que illes comenciava a dansar, a cantar e a parlar con multe vulgaritate, si, usque a oblidar qual poter nos portava; si, illes deveniva extrememente vulgar.
1 Nephi 18:10 E io, Nephi, comenciava a timer grandemente que le Senior se indignava con nos e nos castigava per nostre iniquitates, e venir ingurgitate in le profunditate del mar; ergo io, Nephi, les parlava con multe sobrietate; ma illes se incholerisava contra me, dicente: Nos non tolera que nostre fratre minor nos governa.
1 Nephi 18:11 E adveniva que Laman e Lemuel me prendeva, me ligava con cordas e me tractava con multe asperitate; nonobstante le Senior lo permitteva pro poter monstrar su poter a fin que le parola que ille habeva pronunciate circa le perverses se expleva.
1 Nephi 18:12 E adveniva que, post que illes me habeva ligate al puncto que io non poteva mover me, le bussola que le Senior habeva preparate pro nos cessava de functionar.
1 Nephi 18:13 Ergo illes non sapeva ubi diriger le nave; e se altiava un grande tempesta, si, un grande e terribile tempesta que nos pulsava retro sur le aquas per le spatio de tres jornos; e illes comenciava a esser grandemente timorose per pavor de necar in le mar; nonobstante illes non me disnodava.
1 Nephi 18:14 E al quarto jorno que nos esseva pulsate retro, le tempesta comenciava a esser extrememente violenta.
1 Nephi 18:15 E adveniva que nos stava pro esser inglutite in le profunditates del mar. E post haber essite pulsate retro sur le aquas per le spatio de quatro jornos, mi fratres comenciava a vider que le judicios de Deo esseva supra illes e que illes riscava de perir, si illes non se repentiva de lor iniquitates. Ergo, illes me disnodava le cordas que me ligava le carpos que se habeva extrememente inflate; e mi cavilias esseva tamben assatis tumescente e multo dolente.
1 Nephi 18:16 Nonobstante io reguardava a mi Deo, e le laudava toto le die; e io non murmurava contra le Senior a causa de mi afflictiones.
1 Nephi 18:17 Nunc, mi patre Lehi les diceva multe cosas, e anque al filios de Ismael; ma illes pronunciava grande menacias contra quicunque parlava in mi favor; e essente mi genitores debilitate per le etate e habente illes suffrite multe dolor a causa de lor filios, illes esseva abattite al puncto de cader al lecto malade.
1 Nephi 18:18 A causa de lor affliction e del grande dolor, e del iniquitate de mi fratres, mi genitores esseva quasi sur puncto de esser portate foras de iste mundo pro incontrar lor Deo; si, lor capillos gris stava pro esser consignate al pulvere; si, illes esseva proxime a esser jectate con dolor in un tumba de aqua.
1 Nephi 18:19 E anque Jacob e Joseph, essente juvenes e habente besonio de multe curas, esseva attristate a causa del afflictiones de lor matre; e ni mi uxor, con su lacrimas e su orationes, ni mi filios poteva intenerar le corde de mi fratres a fin que illes me disnodava.
1 Nephi 18:20 E nil poteva intenerar lor corde, salvo le poter de Deo que les menaciava de destruction; ergo, quando illes videva que illes stava pro esser ingurgitate in le profunditate del mar, illes se repentiva de quanto illes habeva facite e illes me disnodava.
1 Nephi 18:21 E adveniva post que illes me habeva disnodate que io prendeva le bussola, e illo functionava como io desiderava. E adveniva que io orava al Senior; e post que io habeva orate, le ventos e le tempesta cessava e arrivava un grande calma.
1 Nephi 18:22 E adveniva que io, Nephi, guidava le nave, e nos navigava de nove in direction del terra promissa.
1 Nephi 18:23 E adveniva que, post haber navigate per le spatio de multe dies, nos arrivava al terra promissa; e nos avantiava in le pais e nos plantava nostre tentas; e nos lo appellava: terra promissa.
1 Nephi 18:24 E adveniva que nos comenciava a laborar le terra e nos comenciava a plantar semines; si, nos plantava in le terra tote le semines que nos habeva portate de Jerusalem. E adveniva que illos cresceva extraordinarimente; ergo nos esseva benedicite con abundantia.
1 Nephi 18:25 E adveniva que, dum nos viagiava in le deserto, nos trovava que in le terra promissa viveva bestias de omne specie in le forestes: si, vaccas e boves, asinos e cavallos, capras e anque capras salvage e omne sorta de animales salvage utile al homine. E nos trovava omne sorta de mineral, auro, argento e cupro.
Capitulos:
1 2 3 4 5 6 7 8 9 10 11 12 13 14 15 16 17 18 19 20 21 22
Libros:
Intro 1Nephi 2Nephi Jacob Enos Jarom Omni Parolas Mosiah Alma Helaman 3Nephi 4Nephi Mormon Ether Moroni