Epistola al Ephesios Capitulo 3

 1 Per iste ration io, Paulo, le prisionero de Christo Jesus pro vos, oh Gentiles,

 2 (Pois que sin dubita vos audiva de qual gratia Deo me ha dispensate pro vos); 

 3 como per revelation me esseva declarate le mysterio, del qual io vos scribeva antea in poc parolas;

 4 e al leger lo vos pote comprender mi cognoscentia del mysterio de Christo.

 5 Le qual mysterio, in le altere generationes, non esseva date a cognoscer al filios del homines 
   in le modo que nunc lo es, per medio del Spirito, esseva revelate a su sancte apostolos e prophetas;

 6 id est, que le Gentiles es coherede e membros de un mesme corpore e con nos participe
   del promissa facite in Christo Jesus mediante le Evangelo,

 7 del qual io esseva vocate ministro, in virtute del dono del gratia de Deo donate me secundo le virtute de su potentia.

 8 A me, qui es le minor del minimo de tote le sanctos, me esseva date iste gratia de portar
   al Gentiles le bon annuncio del inscrutabile ricchessas de Christo,

 9 e de manifestar a omnes qual sia le plano sequite per Deo concernente le mysterio que esseva
   occultate in Deo, desde le principio, le Creator de tote le cosas,

10 a fin que in le tempore presente, sia manifestate, per medio del Ecclesia, le infinite sapientia 
   de Deo, al principatos e al potestates, in le locos celestial

11 conforme al proposito eternal que Ille faceva in nostre Senior, Christo Jesus;

12 in le qual nos ha le libertate de accostar nos a Deo, con plen fiducia, mediante le fide in ille.

13 Per tanto io vos pete de non perder le corage de animo a motivo del tribulationes que io 
   suffre pro vos, pois que illos es le gloria vostre). 

14 Per iste ration, io flecte mi geniculos ante le Patre,

15 ab le qual omne familia in le celos e super le terra prende le nomine, 

16 a fin que Ille vos da, secundo le ricchessas de su gloria, de esser potentemente fortificate
   mediante su Spirito, in le homine interior,

17 e face in modo que Christo habita per medio del fide in vostre cordes, a fin que, essente radicate
   e fundate in le amor, 

18 vos pote comprender con tote le sanctos qual sia le largessa, le longitude, le altessa 
   e le profunditate del amor de Christo, 

19 e de cognoscer iste amor que excede omne cognoscentia, a fin que vos sia plen de tote le plenitude de Deo.

20 E a Ille qui pote, mediante le potentia que opera in nos, facer infinitemente ultra lo que nos pete o pensa,

21 a Ille sia le gloria in le Ecclesia e in Christo Jesus, per tote le generationes, 
   in le seculos del seculos. Amen.
1 2 3 4 5 6
Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev