Epistola al Colossenses Capitulo 1
1 Paulo, apostolo de Christo Jesus per voluntate de Deo, e le fratre Timotheo, 2 al sanctos e fidel fratres in Christo qui es in Colosse, gratias a vos e pace ab Deo nostre Patre. 3 Nos da gratias a Deo, Patre del Senior nostre Jesus Christo, in continue orationes que nos face pro vos, 4 habente audite parlar de vostre fide in Christo Jesus e del caritate que vos ha pro tote le sanctos, 5 a motivo del sperantia que vos es reservate in celo; sperantia que vos ha ab tempore cognoscite mediante le predication del veritate del Evangelo 6 que perveniva a vos, e fructifica inter vos e etiam in tote le mundo, desde le die que vos lo audiva, e cognosceva le gratia de Deo in veritate, 7 secundo lo que vos apprendeva ab Epaphras, nostre car conservo, que es fidel ministro de Christo pro vos, 8 e que nos ha etiam facite cognoscer vostre caritate in le Spirito. 9 E desde le die que nos audiva isto, nos non cessava de orar pro vos, e de peter que vos sia plen del profunde cognoscentia del voluntate de Deo in omne sapientia e intelligentia spiritual, 10 a fin que vos cammina in modo digne del Senior pro placer le in omne cosa, portante fructo in omne opera bon e crescente in le cognoscentia de Deo; 11 essente fortificate in omne virtute secundo le poter de su gloria, pro poter esser semper patiente e longanime; 12 e dante gratias con allegressa al Patre qui vos faceva participe del sorte del sanctos in le luce. 13 Ille nos liberava ab le potestate del tenebras e nos transportava in le regno de su amate Filio, 14 in le qual nos ha le redemption, e le remission del peccatos; 15 le qual es le imagine del invisibile Deo, le primogenite de omne creatura; 16 pois que per medio de ille, esseva create tote le cosas que es in celo e supra le terra; los visibile e los invisibile; sia thronos, sia dominos, sia principatos, sia potestates; tote le cosas esseva create per medio de ille e pro ille; 17 e ille es ante omne cosa, e tote le cosas subsiste in ille. 18 E ille es le capite del corpore, id est, del Ecclesia; ille es le principio, le primogenite del mortos, a fin de esser in omne cosa le prime. 19 Pois que placeva al Patre que in ille habitava tote le plenitude 20 e per medio de ille, reconciliar tote le cosas, habente facite le pace mediante le sanguine de su cruce, sia le cosas que es supra le terra, sia los que es in celo. 21 E vos, qui olim esseva extranee e inimic in vostre mente e con vostre mal operas 22 nunc Deo vos ha reconciliate in le corpore del carne de su Filio, per medio de su morte, pro presentar vos sancte e immaculate e irreprehensibile, 23 si vos persevera in le fide, fundate e firme, sin mover vos del sperantia del Evangelo que vos audiva, que esseva predicate a tote le creation sub le celo, e del qual io, Paulo, esseva constituite ministro. 24 Nunc, io gaude in mi suffrentias pro vos; complente in mi carne lo que manca al afflictiones de Christo pro su corpore que es le Ecclesia; 25 del qual io esseva constituite ministro, secundo le dispensation de Deo pro vos annunciar le plenitude del parola de Deo, 26 id est, le mysterio, que esseva occultate desde le seculos e generationes, sed nunc esseva manifestate a su sanctos; 27 al quales Deo ha volite dar a cognoscer qual sia le ricchessa del gloria de iste mysterio inter le Gentiles, que es Christo in vos, sperantia del gloria; 28 qui nos proclama, admonente cata homine e instruente cata homine in tote le sapientia, pro presentar omne homine, perfecte in Christo. 29 A iste fin io labora, combattente con su energia, que opera in me con poter.
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud