Epistola II al Thessalonicenses Capitulo 3
1 Finalmente, fratres, ora pro nos perque le parola del Senior se expande e sia glorificate como lo es inter vos, 2 e perque nos sia liberate del homines importun e perverse, pois que non tote homines ha fide. 3 Sed le Senior es fidel, e ille vos confirmara e vos custodiara ab le mal. 4 E nos ha de vos iste fiducia in le Senior, que vos face e facera le cosas que nos vos ordina. 5 E que le Senior dirige vostre cordes in le caritate de Deo e in le patientia de Christo. 6 Nos vos implora, fratres, in le nomine del Senior nostre Jesus Christo que vos apparta ab omne fratre qui se conduce disordinatemente e non secundo le inseniamento que vos ha recipite ab nos. 7 Pois que vos ipse sape como imitar nos: perque nos non conduceva nos ipse disordinatemente inter vos; 8 ni ha nos mangiate gratuitemente le pan de alcuno, ma con fatiga e travalio nocte e die pro non gravar super alcun de vos. 9 Non perque nos non ha le potestate, sed pro vos dar le exemplo, a fin que vos nos imita. 10 Perque quando nos esseva con vos, vos commandava isto: si alcuno non vole laborar, etiam non debe mangiar. 11 Perque nos audiva que alcunos se conduce inter vos disordinatemente, sin laborar, sed occupante se de cosas alien. 12 A istes nos ordina e exhorta in nomine del Senior Jesus Christo que illes mangia le proprie pan, quietemente laborante. 13 Quanto a vos, fratres, non cessar de facer le ben. 14 E si qualcuno non obedi al parolas de iste epistola, nota iste tal, e non haber relation con ille, a fin que ille se avergonia. 15 Totevia non le considera un inimico, sed admone le como fratre. 16 Que le Senior del pace vos dona semper pace. Le Senior sia con tote vos. 17 Io vos saluta de mi proprie pugno; io, Paulo; isto serve de signo in omne mi epistola; assi io scribe. 18 Le gratia del Senior nostre Jesus Christo sia con tote vos.
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud