Ayhan isang kalag sa ila'ng nagatuytoy,
Mataas nga kalag sa gahum kag kusog.
CORNELIO. Ikaw nagasayop. Ang mga kristuhanon
Nagapaisug-isog kay ila ginahandum
Kabantugan nga maisog. Kon nahibal-an nila
Ang pagpanginmatay, ako makagahum man...
Ako sa katapusan nagdaog sa mabangis
Nga may luyag magkuha sa akon sang korona.
METELO. "Madasig man mahulog ang madasig sumaka."
Ang palad dili dayon kag gikan sa mataas
Nagatagbong sa tawo sa buho nga madalum.
CORNELIO. Masunod kay Adriano, ako'ng nahauna
Kag ako magamando sa ginsugdan nga inaway.
METELO. Kon kaaway mo nahulog, ikaw nga nagasaka
Patiha'g magpanumdom sa pagkahulog nimo
Sa palaabuton nga adlaw.
CORNELIO. Sanglit ako wala
Sing madamo nga manggad, wala ako mahadlok
Nga ila ako hulugon sa tuman nga kusog.
METELO. Amo ina ang pagdalang sang mga katawohan
Nga sa ila kaugalingon bulag makaluluoy.
Sa palad sang iban kita mahinukmanon;
Apang mga bulag sa aton kaugalingon.
Ako sang dugo niya, Cornelio, kriminal,
Kag indi nakon luyag nga sina mamusingan.
CORNELIO. Amo ina'ng pag-isip mo, kay ang kamatayon 'ya
Sa imo balatyagon nagatuga'y kaluoy.
Gabatyag man ako sing mga paghinulsol...
Apang si Adriano gid amo ang may sala.
Apang kon may sala ka kag wala ka mahadlok,
Dili ikaw nahadlok kay Adriano?
