This page has been proofread.
»»Ir con te nun poss eau uossa,
L'uonda mia nun poss lascher!
Scha tü m'amast, cler demuossa,
Fors' allur't vögl seguiter!««
»T'am, eau t'am e di vardet,
T'amero fin l'ultim fled!«
Il solagl plaun, plaun declina,
Dal bel pèr pigliand comio,
Il Signur la sulvaschina
Daspö uras ho smancho,
D'bütschs il god resuna cler:
T'am ma chera, t'am mieu cher!
»Sun sulet sün quaista terra!«
Disch allur' il cavalier.
»E l'amur per te ais bgerra,
Tu, ma spusa stoust dvanter!«
»»Est sulet? Schi güra que!««
»Sun sulet, eau't dun ma fe!«
»»Nun hest duonna, nun hest dama?««
»Duouna, dama mê avet!
Gür per l'orma da ma mamma,
Ch'eau sül muond sun be sulet!«
Cavalier, hest fos güro,
Il spergür vain chastio!
