This page has been proofread.
La fontauna in val d'Assa.
Già sün pe a bunuruna
Da Ramuosch ais il Signur.
»Hoz la chatscha saro buna,
Mieu schluppet faro forrur!
Il val d'Assa eau vögl ir,
Sulvaschina lo ais sgür.«
L'aster bel, da glüsch divina,
Da sa cuors' ho fat mited,
»Nun giavüsch pü sulvaschina,
Vögl poser e piglier fled,
In sumbriva, sper il god
Opriment nun ais il chod.«
Ün sön quaid e dutsch guadagna
Il Signur, el dorma bain
Our dall' ova d'la muntagna,
Guarda! bella ninfa vain,
Vstida d'velo transparent,
Pü glüschaint sco pür argient.
Al Signur la vo daspera,
Modulesch' ün chaunt zuond bel,
»Chi est tü, o di'm, o chera,
Vainst tü forsa gio dal tschel?«
»»Our dall' 'uonda vegn per te!««
»Ve regin' in raieu chastè!«
