This page has been proofread.
Usche oda ün favella
Tres il god dal ot clinger:
El ho dam' a chesa, bella,
Ch'el spuset davaunt l'uter.
Cavalier, hest fos güro,
Il spergür vain chiastio!
Co la ninfa sblecha dvainta,
Crida larmas da dolur,
E svanind cun cridolainta
Vusch la disch al fos Signur:
Cavalier, hest fos güro,
Me, povrett', hest ingianno!
Il Signur d'Ramuosch a terra
Crouda uoss' inanimo,
Sco colpieu tres arma d'guerra
El cadaver ais dvauto,
E la ninf' al ur del god
Crida, crida baiu dad ot.
E las larmas della chera
Croudan gio sül verd tappet,
'S convertind in püra, clera
Fontaunotta. L'ultim fled
Co rendet la bell' allur',
Murenteda tres l'amur!
Avrigl 1881.
