Page:Fluors alpinas.djvu/123

— O fortüneda tö, chi est tschernida
Per daletter quel ferm, valent Signur!
O fortüneda ch'ais a te cuvida
Dal ot regent uschea grand' onur!
O ve dalun, o ve dalun cun me;
Brameda est, Adina, nel chasté! —

— Lossü sarost suletta la regina
A tieu comand saro tuot suottamiss;
Tü regnerost sur tuotta l'Engiadina,
Zuond bella vit' avrost, pompus bels dis!
O ve dalun! .... Sün mieu comand stoust gnir,
La vita del Signur per raddutschir. —

E la giuvnett' ünguotta respondaiva
Ed il birbant volaiva forz' üser;
Cur cha dandet l'üsch d'stüv' as spalanchaiva
Il bap, il ferm chalger laschand entrer;
Il mess restet surprais sco tschunch' il cho;
Ma spert remiss, el continuet darcho.

— Vus, mieu chalger, ..... la figlia voss' aquia
Naschida ais in fortüno momaint!
Mieu bun Signur la voul aunch' hoz fer sia
E la piner in ün avegnir riaint.
Eau eira gnieu per la piglier cun me
E la condür regina sül chasté!