Page:Fluors alpinas.djvu/122

E Guardaval spordschet ad els leidezza
E baccanals, convivis sainza fin;
Divertimaints pajos tres odolezza
E nouvas deschmas sün il contadin;
Pür paja, scharpa grossa, stoust pajer,
Per grass mantegner pü d'ün grass cumper!

Da Guardaval intaunt la Signuria,
A Chamues-ch spedieu avaiv' ün mess;
Ün vegl furbaz, famus in schelmaria;
Brutal, tiraun, birbant fin al excess
E quaist bel mess in chesa del chalger
Entret, virtüd allo per infamer.

Serenited in quella ches' avaiva
Chatto asil, la pêsch ün tet prüvo;
Il pled divin allo ün coltivaiva;
Il pover gniva cun bunted güdo;
In temps da dschlüra Adam procuret
A misers pellegrins la spais', il let.

Il mess entret, in stüva solagliva
Tschantaiv' Adina sper il filadé.
— Bun di, ma chera — dschet il mess — eau gniva
Da Guardaval aposta co per te.
Mieu ot Signur, patrun da tuott' la val,
La not chi vain, te voul a Guardaval!