Mao kini ang magtutoon nga niadtong buntaga, human mabasa ang talaan, nagsugo sa iyang mga tinon-an sa paghatag sa leksiyon nga sinag-ulo, gikan sa sinugdan hangtud sa katapusan. Ang mga ponograpo nagtingog na, ang uban maayo, ang uban dili, ang uban nagkangokango, ang uban gidiktahan . . . Ang maayong mosag-ulo tagaan usa ka badlis nga maayo, ang makahimog tulo ka sayop, usa ka sayop, usa ka badlis nga walay pulos.
Usa ka batan-on nga tambok, nga may panagway nga nagduka, ang buhok tuy-od ug gahi sama sa barvas sa sepilyo, naghagok pag-ayo ug naghiwatid sa iyang bukton, sama sa anaa siya sa higdaanan. Hialinggatan siya sa magtutoon ug gipakugangan:
— Oy, hingatulog, aba, kosa . . . Taspukan usab, tingali dili mahibalo sa leksiyon, mo?
— Si pari Millon, dili lamang kay mobundok sa ngalan sa mga tinon-an, sama sa usa ka prayleng maayo, kon dili sultihan pa sila sa sinultihan sa tindahan, usa kini ka batasan nga nakuha niya sa magtutoon sa “canones.” Kon ang Reberendo naggamit ba niadtong paagiha aron pagtamay sa iyang mga tinon-an ug sa mga balaanong sugo sa mga “concillo,” maoy usa ka butang nga wala pa matino, bisan giunsa na lamang paglantugi.
Ang pangotana, inay makapasuko sa klasi, nakapakatawa hinoon: mahitabo kadto adlaw nga tanan. Bisan pa niini, ang hingatulog wala mokatawa; mitindog pagkalit, gilugdan ang iyang mga mata, ug sama sa usa ka makina sa bapor nga mopatingog sa ponograpo, nagsugod sa pagpamulong: Ginganlan ug samin ang tanang butang hinlo, nga gibuhat aron sa paghulad sa panagway sa mga butang nga ibutang sa iyang atubangan, gumikan sa pagsumbalik sa kahayag: ug tungod sa mga kasangkapan nga gigamit sa pagbuhat, kanila, ang mga sa min pagabahinon sa samin nga puthaw ug samin nga bildo . . .
— Hunong, hunong, hunong! — misanta ang magtutoon . . . Ania kita nga ang mga samin gibahin sa samin nga bildo, ha! Ug kon ipakita ko kanimo ang usa ka kahoy, ang kamagong, pananglitan, nga maayong pagkahinlo ug pagkasinaw, kun usa ka tipak sa sibatsi nga magahulad sa mga larawan sa mga butang nga anaa sa iyang atubangan, asa man nimo iapil kining mga samina?
