18
hibilin, silá nanagpahimulos sa panagkita, arón sa pagpanamilitáy. ¿Unsay gipanagsultihan nila? Mga ma-initong saad sa gugma, pagsublísublí sa mga panúmpa, panghupáw, ¿kinsay walá kanila masayud? Kung ugaling ikaw mibati na sa gugma ug nahimulág sa imong hinalaran, dili kinahanglan saysayan pa nako kay nahibaló-an mó na nga nianang mga higayona, magilísgilís ang kasingkasing sa kasakit, magadangóyngóy ang kalág sa kasubú ug matumog ang mga matá sa luha...
¡Ay! kadaghan mahitabó nga manamilit kita, masinaligong mobalik dayon, ug unya, sa dili lamang hibaló-an, dili na gayúd mahi-ulí man ugaling, kadtong atong gibiya-an, namatáy ná, nawala bá kún nalimut bá hinoon... Tungúd niini, ang panamilítay masubó gayúd, ug kung ang managbulag, mga maghigugma-ay, lawód sa kasakit molunop sa kinabuhi.
Si Sidíng ug Leon, nanaghilák; apan labí na gayúd si Leon nga, tungúd ba kahá kay maoy mogikan, nagadangóyngóy sama sa usa ka gamayng bata.
—¡Unsaon ta man! magantus na lamang gayud kitá, Leon,—misulti si Sidíng sa tingog nga daw ma uyonon na lamang sa ilang kasakit— Gimbút-an da kana nila ni Tatay, kay maka-ayo kanato. ¡Kinsa usab ugóng ginikanana ang mapagantus sa ilang anák, sa walá lamay hinungdan!
—Apan,—malaguton mitubág si Leon—¿ngano pa mang ila akong pa-adto-on nang Manila, nga dinhi walá na man untay nakakulang kanato? ¿Dili bá nagakapin kanato ang bahandi?
—Ambot kahá Leon; walá ako makasabút sa
