ang mga pagsulondan sang katarungan, sang kadungganan, kag, wala'y sapayán, sa sini nga mga panahon nga may mga ginahambal nahanungód sa amon, walâ akó sing makità nga isá nga may kakahas sa pagsakdag sang iya mga panumbunganon samtang yarà siá sa atubangan sang isá ka prayle... bisán sa mataas nga tingog sa atubangan sang pilá ka kadam-an... May mga pamatan-on nga sa likód nagatamay sa amon kag sa atubangan nagahalók sa amon kamót kag sa yuhóm nga may malaut nga balatyagon nagapakilimós sa amon mga panulok! Pfwi! Anó ang luyag nimo nga himùon namon tagsubong nga mga tinuga?}}
–Ang sayop indi kay ila tanán, Padre, sabát ni Isagani.
–Ang sayóp yarà sa mga nagtudlo sa ila sa pagkamalikumon, sa mga nagapigos sang hilway nga panghunâhonà, sang hilway nga paghambal. Dirí ang tanan nga panghunâhonà nga kinaugalingon, ang tanan nga hambal nga indi naghalín sa isá ka gamhanan, ginabilang nga pagpamatok, kag ikaw nakasayod sing maayo kon anó ang kahulogán siní. Buang yadto'ng may luyag sa paghambal sa tingog nga mabaskog sang iya ginahunâhonà, kay itanyag niya ang iya kaugalingon sa mga paghingabót!
–Anó nga mga paghingabót ang imo pagabatasón? pamangkot ni P. Fernandez nga binatak niya ang iya ulo. Wala ko balá ikaw pagpahanugoti sa paghambal sing hilway sa akon klase? Kag wala'y sapayán, ikaw isá ka pinasahî nga, sa pagpatadlong sang imo ihambal, dapat ko badlungón, agúd ang pagsulondan mahimò nga bagay sa tanán, sa paglikaw nga maglapnag ang malain nga kahalimbawaan!
Si Isagani nagyuhóm.
–Ginapasalamatan ko ikaw kag indì akó magpakigbais kon akó balá isá ka pinasahî ukón indì; batunon ko ang imo pagbilang agúd batunon mo man ang sa akon; ikaw isá man ka pinasahî; kag sanglit dirí indi kitá maghambal sang mga pagkapinasahî, bisán magpangapin sa aton kaugalingon nga pagkatawo, sa kubós nagahunâhonà akó sa akon, ginapangabáy ko sa akon propesor nga liwatón ang sugilanon. Si P. Fernandez, wala'y sapayán sang iya mga pagsulondan nga maalwan, bumatak sang iya ulo kag tinan-aw niya
