pilin ku
tan jan Tepo
o kama pona tawa kalama sin! mi jan Tepo. kalama nanpa pini la jan Juli li toki e ni tawa sina: kalama sin li open. mi wile suli e toki ni li wile toki mute e nasin pi tenpo kalama ni: kalama sin.
tenpo pi mute lili la jan li pali e kalama pi toki pona, li toki e ijo sin e ijo musi. taso kalama mute ni li tan jan wan taso. wile pali li weka lon jan ni la kalama li kama weka. kalama li weka la mi ken ala musi tan kute! kalama weka li pona ala la mi wile e ante lon kalama sin.
jan wan taso ala li lawa e kalama sin. jan pali wan li weka la jan pali ante li ken kama li ken awen lon e kalama. mi jan Tepo li pali e ijo lili: kalama li kama pali tan jan la mi pana e kalama tawa kulupu. tenpo ni la mi pali kin e kalama. taso mi wile e ni: jan ante li wile pali e kalama la ona li ken. ken la jan li pali e ijo pona musi li wile toki e ni lon kalama. ken la jan mute li toki musi lon poka. ken la jan li pana e sona. ken la jan li toki e wile sona tawa jan sona. ni ale li pona!
sina wile pali la o toki tawa jan pali kalama, o toki e wile pali sina. o kepeken toki pona! kalama ni li toki pona taso la mi wile e ni: pali kalama kin li toki pona taso. nasin li lon tawa tomo toki pi ilo Siko lon poka kalama...ilo kalama sina la sitelen li lon poka li toki e ijo suli pi kalama ni. mi pana e nasin e linja lon ni. ni li nasin.
mi pini e toki ni la mi wile toki lili e ni: mi seme? sina kute e jan seme lon tenpo ni? pilin mi la jan li toki lon kalama sin lon tenpo ona nanpa wan la ona o toki e ni. mi jan Tepo. mi jan pi toki pona, mi open kama sona e toki pona lon a tenpo sike pini a! tenpo li tawa wawa.
tenpo ni la mi sona mute li ken toki uta wawa. tenpo la mi toki insa e ni: tenpo pini la, mi sona ala e toki pona. tenpo ni la, mi sona mute. ni li nasa lili tawa mi. mi pi tenpo pini li kute e mi pi tenpo ni la mi pini li ken ala sona e mi lon. mi jan sin la mi pilin nasa sama tan jan ante. mi kute e jan wawa li pilin e ni: mi ken ala wawa sama jan ni. taso mi kama toki insa e ni: jan ni li sona ala e toki pona lon tenpo pini. sona ni li kama. sona li ken kama tawa ona la sona li ken kama tawa mi. ni la mi awen kute li awen toki la mi kama wawa. sina kin li ken wawa! sina kute e jan wawa li pilin e ken ala la o sona e ni: jan ni kin li sona ala e toki pona lon tenpo pini.
ni li sama sona pona pi jan kala Salan:
jan mute li pilin e ni: ona li ken ala toki li ken ala wawa kin. taso mi pilin ante sin. kulupu la sina kute mute li toki tawa jan uta la sina o kama pona o sona e ni.
ante la, mi jan pi pali ilo. ken la nimi ni li ike: mi jan pi utala ilo. tenpo ale la mi pali e ilo la mi utala e ilo. ilo li pali pakala lon tenpo ale. mi wile pona e pakala. taso pilin mi la ilo li wile pakala. ni la mi utala a.. tenpo mute la mi ken anpa e ilo la mi jan wawa pi utala ilo. taso pali ni li utala.
ken la lon la mi utala e jan ante pi pali ilo. jan ante li pali e ilo pi nasa mute. mi wile kepeken ilo pi jan ante, li wile pana e ijo sin tawa ilo pi jan ante, la, mi wile sona e nasa ona. ken la utala li ni. mi sona ala.
a mi o pini e toki pi nasa ilo. ken la mi toki suli e pilin mi ilo lon kalama kama. taso tenpo kalama ni la mi wile toki e pilin mi ku. sina lon kulupu pi toki pona la ken suli la sina sona e lipu ku. ona li lipu sin tan jan Sonja li lukin toki e nasin kulupu: kulupu li toki e ijo kepeken nimi seme? lipu pu li toki e nasin pi jan Sonja taso. taso jan li lon kulupu li kepeken toki pona la nimi sin en nasin sin li kama. ni la jan Sonja li toki mute e ni tawa jan pi ma pona: nimi ni pi toki Inli la sina toki e seme lon toki pona? sona ale ni li tawa lipu ku. jan li kepeken nimi sin la nimi sin ni li kama lon lipu ku.
taso ike ni li ken: jan wan taso li kepeken nimi sin li toki e ona tawa jan Sonja la nimi ni li lon ku. ken la jan Sonja li toki e wile sona la mi pali e nimi sin lon tenpo ni. nimi ni li suli ala tawa kulupu, taso mi toki e ona tawa jan Sonja la ona li ku. ni la jan Sonja li pana e ni: nimi pi mute ala li suli. jan mute li kepeken nimi sin sama tawa nimi wan pi toki Inli la nimi sin ni li nimi ku suli. tasoo.. nimi ku suli mute li ike tawa mi. taso nimi ni li lon. tenpo ni la mi lukin e nimi ku suli li toki e pilin mi. mi toki ala e pilin ale, ni li wile e tenpo suli. taso mi toki e nimi pona mute e nimi ike mute. (tan pilin mi)
nimi ike la, mi la ike nanpa wan li nimi jasima. nimi jasima li seme? mi sona ala toki pona e kon pi nimi jasima, taso mi ken lukin toki e ni: ijo tu li lon. ona li sama mute, taso, nasin wan la, ona li ante mute. ken la walo en pimeja li jasima. sama la ona tu li kule. taso kule li ante mute. jan li toki e ilo jasima lon tenpo mute: ni li sinpin lukin, mi lukin e sinpin la mi lukin e mi. suno li tawa tan sinpin mi, tawa sinpin lukin, tawa lukin mi, la mi lukin e mi. tenpo mute mute la jan li pana e sitelen tawa tan ilo ona lon ilo Siko li toki e mi: mi jasima. ni li tenpo mute mute la ken la nimi jasima li kama toki e ni taso..ni il ike. mi wile kepeken nimi jasima ala tan ni: jan li kepeken nimi jasima tawa ijo ante mute. ijo ni li sama ala. tenpo ale la mi ken toki e ijo sama kepeken nimi jasima ala. walo en pimeja li, kule li ante mute. ilo jasima li sinpin lukin, mi lukin e sinpin la mi lukin e mi. ilo Siko la mi.. pana e sitelen tan ilo.
nimi epiku kin li ike tawa mi. ona li nimi pi toki Inli! ona li lon toki pona tan seme? sona mi la pali pi nimi ni li tan musi taso. taso tenpo ni la jan li kepeken tawa musi ala, li toki sama ni: pilin li pona mute la mi wile e nimi epiku. nimi pona li wawa lili, nimi epiku li wawa mute. ni li ike! nimi ante pona li lon: pilin sina li pona mute li pona suli li pona sewi! a, ike,
nimi kijetesantakalu li sama lili tawa mi. tenpo pini la ona li musi mute, mi kepeken ona lon musi. taso musi li kama lili tawa mi. nimi sin nasa li musi lon tenpo open li kama musi lili lon tenpo kama.
nimi ante pi ike lili li nimi oko.
lon la nimi ku suli mute li sin mute ala. ona li kama la lipu pu li lon ala. ni li tenpo pini suli. taso jan Sonja li wile e nimi pi mute pona lon pu, la ona li pana ala e nimi mute. nimi oko li nasa lili: ona li suli, taso jan Sonja li wile weka e ona, la ona li toki e ni: nimi oko en nimi lukin li sama. nimi ante tu li sama ni: nimi namako li sama nimi sin, nimi kin li sama nimi a. taso lon la nimi sama tu ni li ante. ona li ante lon tenpo pi pu ala li awen ante tawa jan mute lon tenpo pu. jan li kepeken nimi tu tawa kon ante la jan Sonja li ken ala wan e ona. ni la ona li tu sin lon ku.
mi kepeken nimi kin li kepeken nimi namako. ona li pona tawa mi. taso nimi oko li nasa lili. oko en lukin li ante la, oko li sike lon sinpin jan, li ilo lukin. lukin li pali, mi lukin kepeken oko. taso nimi kute li tawa ilo tawa pali kin. mi kute e kalama kepeken kute mi. nimi kute li wile ala tu, la nimi lukin li wile tu tan seme? mi sona ala la mi wile ala e nimi oko.
mi toki e nimi ike taso la ken la mi pana e pilin ike. mi wile ala e ni, la, mi o toki e nimi pona. nimi ni li pona tawa mi. nanpa wan la, nimi tonsi li pona. nimi mije en nimi meli li lon la, jan li meli ala li mije ala la, ona li wile e nimi pi kon ona. nimi tonsi li pona tawa ni. taso jan ale li sona e ni, ni li sin ala, mi wile ala toki e mute.
nimi pona ante li nimi leko. leko li seme? ken la, lon lipu la o sitelen e palisa. palisa la ilo sitelen li tawa tan anpa tawa sewi. palisa li pini la o tawa poka o sitelen e palisa sin. palisa ni li tan poka tawa poka ante. o sitelen e palisa nanpa tu wan, ona o tan sewi tawa anpa. palisa nanpa tu tu li tawa poka. palisa sin ale la nasin li ante sama: palisa wan li tawa sinpin la palisa nanpa kama li tawa poka. palisa li pona la pini pi palisa nanpa tu tu li sama open pi palisa nanpa wan. [moku kon] sitelen ni li leko. nimi leko li pona tawa mi tan ni: mi ken ala toki e ijo leko kepeken nimi leko ala. tenpo ni la mi toki e sitelen leko li kepeken tenpo suli a! ijo leko mute li lon poka mi lon tenpo ale. ilo mi li leko. tomo mi li leko. nimi leko li pona tawa ni.
pilin mi la ni li ale pi tenpo kalama ni. mi wile toki sin e ni: sina ken toki lon kalama sin! o tawa ilo Siko o toki tawa jan pali. sina sona e ijo toki la ni li suli. mi toki e ijo pi toki pona taso lon tenpo suli, taso sona ante li ken pona mute. ken la mi wile toki e sona ilo lon tenpo kama. taso tenpo ni la mi pini. mi tawa, o awen pona!
