nanpa open
tan jan Juli
toki! sina kute e kalama sin nanpa wan. mi kili pan Juli li tan ma Tosi li tan ma pona pi toki pona lon ilo Siko. ken la sina wile sona e ni: tenpo lon la mi kute e seme? kalama sin li kalama pana pi toki pona taso. kalama ni la mi en jan pona ante li wile pana e sona e musi tawa sina.
kalama ni li suli tawa mi tan ijo mute.
- nanpa wan la kalama pana pi mute lili li lon. kalama ni li lon la jan li ken kute e ona li ken kama sona e ijo pona.
- nanpa tu la kalama ni li ken pona tawa jan sin pi toki pona. kalama li ken pona e ken kute ona. kalama li ken pona tawa nasin toki ona. ona li kute e ni la ona li ken kama sona e nasin ante mute pi toki pona a. ona li kama sona la kulupu pi toki pona li kama suli li kama pona.
- ante la jan li wile toki e ijo pona tawa kulupu la ona li ken toki tawa mi li ken lon kalama nanpa kama.
- suli la kalama li ken anpa e jan Antoni Mikasi, a a a.
tenpo kama la jan ante mute li ken kama li ken toki e ijo suli ona. ijo li suli tawa sina la sina ken kama li ken toki e ijo ni. ni la o toki tawa mi lon ilo Siko a.
pona. kalama nanpa wan ni la mi wile toki e ijo suli mi. mi kama sona e toki pona tan seme?
tenpo pini la mi lukin e sitelen tawa te "tawa mun" to. (toki Inli la nimi ona li Star Trek.) ona la tenpo kama li lon. jan ma li kepeken ilo suli pi tawa mun li alasa e sona mun. jan mute pi mun ante li kepeken toki ante. taso, ilo sona li lon. kepeken ilo la jan ma li ken sona e toki ale pi jan mun.
tenpo la mi lukin e sitelen tawa nanpa Tamo. (toki Inli la nimi li Darmok.) ona la jan ma li kama lukin e jan pi mun ante. jan mun ni li toki kepeken nasin pi nasa mute! ilo li sona e nimi ale lon toki ona. taso, kon toki li sona ala. ona li toki sama te "jan Tamo en jan Sala lon ma Tanaka" to. jan ma li sona ala e ni: jan Tamo en jan Sala en ma Tanaka li seme? ona li pilin e ni: jan mun o toki nasa ala. lon la jan Tamo en jan Sala en ma Tanaka li lon tenpo pini pi jan mun ni. tenpo pini la jan ni li lon ma ni li utala e monsuta. jan ma li ken kama sona e kon toki tan sona pi jan mun. tenpo la jan ma li kama sona lili e toki pi tenpo pini. ni la ona li kama ken sona lili e nasin toki. pini la jan ma en jan mun li kama pona tawa ona ante.
lawa mi la toki ni li pana e pilin sona nasa. mi wile kama sona e toki nasa sama ni! pona. mi alasa e sona pi toki nasa. alasa ni la mi kama sona e toki pali. toki pali la toki Epelanto li suli. toki pona li lili taso. tan lili ona la mi wile sona e ona.
mi kama sona e ona li tawa ma pona pi toki pona lon ilo Siko. jan pona mute li lon ma ni! mi pilin pona tan jan ale ni li kama sona pona e toki pona tan ona. tenpo lili la mi pana e sona pi toki pona tawa jan sin! ni li nasin pona pi toki pona, a a a.
sina kin li wile toki e kama sona sina pi toki pona la o kama lon kalama nanpa kama. mi wile toki tawa sina li kama sona e ijo sina! tenpo lon la kalama sin ni li pini. ona li kepeken tenpo suli ala tan taso mi. nanpa kama la ona li ken suli a. kalama ni li pona tawa sina la o toki e ni tawa mi. kalama ni li ike tawa sina la o toki e ike tawa mi. mi ale li ken pona e kalama nanpa kama. pona o tawa jan Tepo tan lukin pona ona.
ni la, o awen namako!
