ilo sitelen
tan jan Lipamanka
toki. mi lipamanka. mi tan ma pona pi toki pona. mi wile toki e ilo sitelen mi.
tenpo lili la mi kama jo e ilo sin. mi kepeken ni tawa sitelen. mi sitelen e toki Inli e toki pona kepeken ilo ni. ilo ni li ante. ilo ante la sina kama e ona, sina kepeken ona. ona li pini la sina pana e ona lon jaki. sina ken ala kepeken sin. taso, ilo mi la, sina ken kepeken sin. kepeken sin ni li pona mute. sina pana e telo kule sin tawa ona. telo ni li ken kule ante.
kin la, ilo ni la, sina wile kepeken ona la, sina pana e telo ni lon tenpo nanpa wan. ilo ni la, sina pana ala tawa jaki. tenpo ala la sina pana e ni tawa jaki. sina awen kepeken ni lon tenpo suli. ilo ni li pona mute tawa mi.
mi kama e tu lon tomo mi. mi ken kepeken ona tu. ona nanpa wan li... ona li sitelen. sina sitelen la linja li awen sama. taso sina kepeken ilo mi nanpa tu la, sitelen li ken suli li ken lili. sina pana e wawa tawa anpa la, ona li kama suli. taso sina pana ala e wawa tawa anpa la, ona li kama lili. ni la, sina ken sitelen e sitelen pi pona lukin. ona li pona mute.
taso ilo mi li ilo pi mani lili. ni la ona li pali pi pona ala. ona li pakala lili lon tenpo. ni la, mi pana e wawa mi tawa anpa la, ona li pana ala e telo tawa linja ale. ona li pana e telo tawa poka taso. ni la, tenpo mute la mi kepeken ante. mi kepeken ilo sitelen nanpa wan. ilo ni li pona tan ni: ona li pakala ala. taso linja pi ilo nanpa wan li suli mute. tenpo la mi kepeken ala ilo ni tan ni: ona li suli mute la mi ken ala sitelen e sitelen lili. taso ni li suli ala tawa mi. ale li pona. ilo tu li pona. mi kepeken ona tu.
mi tawa. o awen pona.
