Epistola I de Petro Capitulo 5
1 Io exhorta dunque le ancianos qui es inter vos, io qui es un anciano como illes e teste del suffrentias de Christo e qui essera etiam participe del gloria que debe esser manifestate: 2 Pasce vos le grege de Deo que es inter vos, non coercibilemente, mais spontaneemente secundo le voler de Deo; non per un vil lucro, mais voluntarimente; 3 e non como dominatores de illes qui vos esseva confidite, mais como exemplos del grege. 4 E quando apparera le Summe Pastor, vos recipera le corona del gloria immarcescibile. 5 Similemente, vos juvenes, sia subjecte al ancianos. E tote vos revesti vos de humilitate le unes verso le alteres, perque Deo resiste al superbes mais Ille da gratia al humiles. 6 Humilia vos dunque sub le potente mano de Deo, a fin que Ille vos eleva al tempore del visitation, 7 confide in Ille omne vostre sollicitude, perque Ille ha cura de vos. 8 Sia vos sobrie e veliante; vostre adversario, le diabolo, vade circum como un leon rugiente in cerca de qui devorar. 9 Resiste a ille restante firme in le fide, sapente que le mesme afflictiones accompania vostre fratres in le mundo. 10 E le Deo de omne gratia, le qual vos ha appellate a su eterne gloria in Christo, post que vos habera suffrite per un breve tempore, Ille ipse vos perfectionara, vos confirmara e vos fortificara. 11 A Ille sia le imperio, in le seculos del seculos. Amen. 12 Per Silvano, nostre fidel fratre, qui io estima, io vos ha scribite brevemente exhortante vos, e attestante que iste es le ver gratia de Deo; ergo resta vos firme in illo. 13 Vos saluta le ecclesia que sta in Babylonia electe como vos; e assi face Marco, mi filio. 14 Saluta vos reciprocamente con un osculo sancte. Pace a tote vos qui es in Christo. Amen.
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev