Bornemann: Plattdeutsche Gedichte/Mein Wunsch

Bornemann: Plattdeutsche Gedichte

Wer kann mie, wat ick wünsch erfüll'n?
Wer legt de Hand woll dran?
Wer hät doato den Sinn, den Will'n?
Den träd ick biddend an.

   Klein is mien Wunsch, un doch so groot,
So schweerlich to erring':
Un doch sök ick nich Öäberfloot,
Nich Rang, nich Ehrending'.

   Mien Wunsch is: up de Middelstroat
(Dät will ick trülich seng'n,)
Nich allto hoch, nich allto quoat,
Dät Leben hentobreng'n.

   [019]Wo Arbeit, still in hillger Pflicht,
Dät däglich Brodt mie gift:
Wat Noth is, ok to'm Unnerricht
Noch vör de Kinner blift.

   Vör harter Minschen argen Sinn
Bewoahrt up mienen Gang:
Wer lett dät groote Glück mie finn'?
Ick bröcht äm ewgen Dank!