Biblia/Nove Testamento/Luca/Luca 10

Luca

10

Le mission del Septanta-Duo

¹Postea, le Senior appunctava altere septanta-duo discipulos e les inviava avante in pares a in cata citate e loco que ille planava visitar. ²Ille les diceva: “Le messe es grande, ma le recoltatores^[1] es pauc. Ergo roga le Senior del messe ut ille invia plus de recoltatores in su campos^[2]. ³Vade! Ecce, io invia vos como agnos inter lupos^[3]. ⁴Porta con vos ni un bursa de moneta, ni un sacco de viagiatores, ni un par supplementari de sandalias. E non halta vos sur le via pro salutar alcuno.

⁵Quandocunque vos entra in le domo de alicuno, dice primo: “Que le pace de Deo sia super iste domo!”. ⁶Si illes qui vive ibi ama le pace^[4], vostre pace remanera super illes, alteremente illo retornara a vos. ⁷Demora in le mesme domo, non passa de domo a domo. Mangia e bibe quecunque es date a vos, quia le laborator es digne de su paga^[5]. ⁸Quandocunque vos entra in un citate e ibi vos es le benvenite, mangia lo que a vos es offerite. ⁹Cura le infirmos in celle citate e dice a illes: “Le regno de Deo ha pervenite a vos!”. ¹⁰Tamen, si un citate refusa reciper vos, vade foras in su stratas e dice: ¹¹“Mesmo le pulvere de vostre citate que adhere a nostre pedes nos lo succute pro monstrar que nos abandonava vos a vostre destino. Que vos sape, tamen, que le regno de Deo se approximava a vos^[6]!” ¹²Io assecura vos que mesmo le perverse Sodoma, in le die del judicamento, se trovara in un condition melior que un tal citate^[7].

¹³Guai a te, Chorazin! Guai a te, Bethsaida! Nam si in Tiro e Sidon^[8] haberea occurrite le miraculos que eveniva in vos, illes jam haberea repentite se de lor peccatos pridem, vestiente se con tela de sacco e jectante cinere super or capites pro monstrar lor remorso. ¹⁴Si, Tiro e Sidon, in le die del judicamento, se trovara in un condition melior que vos. ¹⁵E vos, gente de Capernaum, esque vos pensa que vos essera honorate in celo? No, vos essera precipitate al inferno^[9]!”. ¹⁶Quicunque ascolta vos, ascolta me, e quicunque refusa vos, refusa me. E quicunque refusa me, refusa Deo, qui me ha inviate^[10].

¹⁷Quando le septanta-duo discipulos retornava, illes con gaudio le reportava: “Senior, mesmo le demonios se submitte a nos quando nos emplea tu nomine!”. ¹⁸“Si,” ille les diceva, “io videva Satana cader del celo como un fulgure! ¹⁹Ecce, io ha date a vos le autoritate de calcar serpentes e scorpiones, e super tote le fortia del inimico. Nihil nocera a vos^[11]. ²⁰Tamen, non gaude que spiritos se submitte a vos, sed gaude que vostre nomines es registrate in celo”.

²¹In celle mesme occasion, Jesus exultava in le Spirito Sancte e diceva: “Io te lauda, Patre, Senior del celo e del terra, que tu ha celate iste cosas a illes qui crede esser sapiente e intelligente e tu los revelava a illes que es como infantes. Si, Patre, tu te complaceva facer in tal maniera. ²²Mi Patre ha confidite toto a me. Necuno cognosce vermente le Filio excepte le Patre, e necuno cognosce vermente le Patre excepte le Filio e illes al quales le Filio le vole revelar^[12]”.

²³Alora, quando necun altere esseva presente, Jesus se adressava a su discipulos e les diceva: “Benedicte es le oculos que vide lo que vos vide! ²⁴Nam io vos dice que multe prophetas e reges haberea desirate vider lo que vos vide e non lo videva, e audir lo que vos audi e non lo audiva”.

Le parabola del bon Samaritano

²⁵Ora, un experto del lege se levava pro poner Jesus al prova proponente le iste question: “Magistro, quid deberea io facer pro hereditar vita eterne?”. ²⁶Jesus respondeva: “Que dice le Lege a iste reguardo? Como tu comprende lo?”. ²⁷Ille replicava: “Tu debe amar le Senior tu Deo con tote tu corde, con tote tu anima, con tote tu fortia e con tote tu mente; e amar tu proximo como te mesme^[13]”, ^1ì28Jesus le diceva: “Tu respondeva correctemente. Face isto e tu vivera^[14]”. ²⁹Celle homine, tamen, volente justificar su actiones, diceva a Jesus: “E qui es mi proximo?”.

³⁰Jesus replicava con un parabola: “Un homine descendeva de Jerusalem a Jerico e cadeva in le manos de robatores. Illes se appropriava con violentia de tote lo que ille habeva e le relinqueva quasi morte al latere del strata. ³¹Per hasardo, un sacerdote descendeva per le mesme via e, vidente le, passava al altere latere del strata. ³²Similemente, un assistente del Templo^[15] arrivava in le mesme loco, ma etiam ille, quando le videva, passava al altere latere del strata pro evitar le. ³³Un viagiator samaritan, tamen, se approchava a celle homine vulnerate e, vidente su condition, habeva compassion de ille. ³⁴Assi, le Samaritano se abassava e bandava su vulneres, versante sur illos oleo e vino. Pois le cargava sur su proprie asino e le portava a un albergo ubi se occupava de ille. ³⁵Le proxime die, ille dava duo monetas de argento^[16] al albergero e le diceva: “Occupa te de iste homine, e, si tu expensas pro ille excede le valor de iste monetas, io te repagara le proxime vice quando io retornara hic”.

³⁶“Ora io te demanda: qual de iste tres te pare haber essite le proximo del homine que cadeva in le manos del robatores?”. ³⁷Le experto del lege le respondeva: “Celle qui se monstrava plen de misericordia pro ille”. Alora Jesus le diceva: “Vade e face le mesmo!”.

Jesus visita Martha e Maria

³⁸Durante que Jesus e su discipulos continuava lor cammino verso Jerusalem, Jesus entrava in un certe village, ubi un femina, nominate Martha, le recipeva como hospite in su domo. ³⁹Illa habeva un soror nominate Maria qui, sedente al pedes del Senior, ascoltava lo que ille diceva^[17]. ⁴⁰Martha, tamen, esseva distrahite del grande preparation del dinar que illa voleva facer. Assi, illa veniva a Jesus e le diceva: “Senior, non te importa que mi soror me ha lassate sol a servir? Dice a illa que me adjuta!”. ⁴¹Ma le Senior la respondeva: “Martha, Martha, tu te preoccupa e inquieta de multe cosas, ⁴²ma un cosa solmente es necessari. Maria ha seligite le parte melior, que nunquam la essera subtrahite”.

Notas

1. O “laboratores”.
2. Mattheo 9:37-38.
3. Mattheo 10:16.
4. Litt. “Si illes es filios del pace”.
5. 1 Corinthios 9:14; 1 Timotheo 5:18.
6. 10:10-11 Actos 13:51. 10:4-11 Mattheo 10:7-14; Marco 6:8-11; Luca 9:3-5.
7. Genesis 19:24-28; Mattheo 10:15; 11:24.
8. Isaia 23:1-18; Esechiel 26:1-28:26; Joel 3:4-8; Amos 1:9-10; Sacharia 9:2-4.
9. O “Hades”, le loco del mortos. Isaia 13ì4:13-15.
10. Mattheo 10:40; Marco 9:37; Luca 9:48; Johannes 13:20.
11. Psalmo 91:13.
12. Johannes 3:35; 10:15.
13. Deuteronomio 6:5; Levitico 19:18.
14. Levitico 18:5. 10:25-28 Mattheo 22:35-40; Marco 12:28-34.
15. Litt. “un Levita”.
16. Litt. “duo denarios”.
17. Johannes 11:1.