دیوانی بێخود/ە

by بێخود

1

ئەوی دانایە جەرگی وەک پەڵاسە

ئەوی نادانە نازانێ چ باسە

2

حەپس و عەزلی من لەسەر شانم ئەگەرچی برمەیە	چونکە ئەمری ئێوە بوو پاڵتاوی شاڵی تورمەیە
گەردی ڕێت تاکەی لە بێخود مەنع ئەکەی ئەی ماهی میسر	چاوی ئەم یەعقووبە موحتاجی جەواهیر سورمەیە

3

فیدات بم تۆ و خودا ئەی قەبری تەنگ و تیرە بڕوانە	کە ڕووناکی دوو چاوی بێخودت ئێستاکە میوانە
ئەگەر دیققەت بکەی لەم میسرەعی تەئریخە، ئەیزانی	لەبیبێ بۆتە میوانت کە ئارامی دڵ و جانە

4

لە بێخود ویستیان بۆ کۆچی شێخ ئەحمەد لەقەب موختار	بە هیجریش ساڵی تەئریخی بڵێ ئەو پیری وەستایە
ئەویش فوجئی لە تەئسیراتی خەرقی عادەتی مەرحووم	بە حەرفی جەوهەری نووسی کە قازیی جەنەتئارایە

5

لە حەسرەت لێوی ئاڵی ئەو نیگاری سوخمە شێرداخە	دڵم یا خوێنە، یاخۆ داخە، کارم ئۆفە یا ئاخە
بە یادی شۆخیی ئەو چاوغەزاڵەی کەبک ڕەفتارە	نەزەرگاهی دڵی دێوانە یا سەحرایە یا شاخە
ئەزانی من شەهیدی غەمزەم ئەی قەبرەڵکەنی دڵسۆز	لە باتی گوڵ لە قەبرا تۆ خودا خارم لە بۆ ڕاخە

6

دڵم مەفتوونی چاوی دڵبەرێکی نیکتەپەردازە	کە مەحزی حوسنە، عەینی شۆخییە، سەرچاوەیی نازە
لە باغی نازکیدا موعتەدیل سەروێکی ساوایە	لە دیوانی چەمەنزاری دڵا فەردێکی مومتازە
بە زۆری حوسنی خۆی ئیقلیمی ئەرز و ئاسمانی گرت	لەسەر تەختی زەمین شاهی زەمان ماهی فەلەک نازە
سووەیدای پەرچەمی وەک فەجری کازیب زوڵمەت ئەفشانە	بەیازی گەردەنی وەک سوبحی سادیق پەڕتەو ئەندازە
هەرێمی چاو و بەینی ڕوومەت و تاقی خەمی ئەبرۆ	مەتافی نازە، کەعبەی ئیمتیازە، قیبلەیی ڕازە
لە بازاڕی موحەببەتدا هەزار لۆمەم بکەن ئیخوان	ئەڵێم ئەم یۆسفە، پێغەمبەرێکی خاوەن ئیعجازە
دەخیلت بم بڵێ ڕازی دڵی خۆی دەرنەخا بێخود	کە ئەم کەرکووکە جێی ڕاوی شەهێن و واشە و بازە

7

گڵی یاقووتە، تۆزی عەنبەری سارایە بەرزنجە	گیای زمڕووتە، بەردی گەوهەری یەکتایە بەرزنجە
لەلای کوێر گەر بینای وەک دۆزەخە، ئەمما لەلای چاوساغ...	وەکوو قەسر و قوسووری جَنَّةُ المَأْوى یە بەرزنجە
مەتافی یادگاری شێری یەزدان و حُسَيْنَيْنە	زیارەتگاهی ئالی حەزرەتی طاها یە بەرزنجە
نەوەک هەر کانیاوی عەینی شەهد و شیر و تەسنیمە	درەختیشی لەلای ئەربابی خۆی «تووبا» یە، بەرزنجە
بڵێ ڕووی تێ نەکەن دەججاڵ و فیرعەونی زەمان، بێخود	کە جەولانگاهی شێخ عیسا و شێخ مووسایە بەرزنجە

8

لە سایەی نەخلی تووبای قامەتی ئەو نەونیهالانە	سولێمانی بەهەشتی عەدلە، یەعنی پڕ لە غیلمانە
دڵی زاهید بەجارێ بۆ نەبێتە بولبول و قومری؟!	لەلایەک گوڵ، لەلایەک جیلوەیی سەروی خەرامانە
عەلی کەیوانە، تەوفیق زوهرەیە، نووری شەباهەنگە	عەزیز خان ئافتابی حوسنە، فائیق ماهی تابانە
بە یادی خەندەیی ئەو بۆ نەژی غەوواسی دڵ، یاران	«عەلی» یاقووتی یاقووتە، «عەلی» مەرجانی مەرجانە
وەها بازاڕی حوسنی گەرمە «تەوفیق»، وەک «عەزیز» ی خۆم	خەریکی ڕۆحە بیدا موشتەری گەر ماهی کەنعانە
بە سەربەستی مەڕۆ ئەی «بیژەن»ی دڵ بۆ نەزەر بازی	مەگەر نازانی «نووری» ساحیبی چاهی زەنەخدانە
ئەوە ڕوخسارە یاخۆ قیبلەیی حاجاتی ئیسلامە!	ئەوە میحرابە، یا تاقی خەمی ئەبرۆی «عەزیز خان»ە
لە توڕڕەی کافری «فائیق» مەدەن ئەی ڕەهڕەوانی دین	ئەوەندەی لێ ئەزانم ڕەهزەنی کاروانی ئیمانە
لە عەبدێکی وەکوو من گەر ئەپرسن سەییدت کێیە؟	ئەمیری مالیکی جان، یەعنی شاهەنشاهی خووبانە
یەدی بەیزای بەغەڵ پەروەردەیی ئیعجازی شۆخێکە	لە عەینی فەسڵی شەودا ساحیبی سوبحی گریبانە
زەمانی نەزعە، توخوا لێم مەپۆشە، چاوەکەم چاوت	پیاڵەت بێنە گەردش ساقیا، سا وەختی ئیحسانە
ئەوەندە وەسفی لەعلی لێوی شیرینی ئەمانەم کرد	کەلامم بۆیە وەک «بەنگاڵ»ە، بێخود شەککەرستانە

9

بە شەو دەرزیی موژە مەشغووڵە یەعنی چاک ئەکا سینە	بە ڕۆژ چۆغەی دڵی عالەم ئەدا ئەو شۆخە ماکینە
وەها پەرچەم ئیحاتەی دەوری جەبهەی داوە ڕۆژ و شەو	ئەڵێی تەسخیری موڵکی ڕۆم ئەکا ئەم حاکمی چینە
کە پێی هێنایە باغی دڵمەوە یارم بە دەستی ناز	گوڵی سەبری چنی یەک دەفعە ئەو بێ ڕەحمە گوڵچینە
لە تەحریکی مەکینە هاتە گوێم دەنگێ بە سۆز ئەیوت:	خوا بمکەی فیدای ئەو ساعید و ساقی بلوورینە
بە ئەبرۆی وەسمە ڕەنگی کوشتمی، خوێنم مەفەوتێنن	گەواهم بۆ سبووتی موددەعا شمشێری خوێنینە
لە شەوقی ئینعیکاسی خاڵی ماوی ئەو کەوا تاقە	لەبەر نیلۆفەڕی ئەنجوم زەمین وەک ئاسمان شینە
هەناسەی لێوی لالەی کێیە وا ڕەنگی بەهاری ڕشت	کە ئەم دنیایە یەکسەر باغە، ئەم سەحرایە ڕەنگینە
خوا بمکەی بە پۆڕێ ئاشیانم مەنزەری ئەو بێ	کە شایەد ببمە سەیدی غەمزەیی ئەو چاوە شاهینە
بە وەسڵی ئەو نیگارە بێ ڕەقیب زەحمەت بگەی بێخود	لە دنیادا کەسێ بێ ئەژدەها نەیدیوە گەنجینە

10

بێ قەدی تووبایی تۆ سەروی ڕەوانم بۆ چییە!؟	جەننەتی فیردەوس و عومری جاویدانم بۆ چییە!؟
تا موژە و ئەبرۆیی جەوهەرداری تۆ بێ ئەسڵەحەم	خەنجەری قەزبین و شمشێری دەبانم بۆ چییە!؟
ڕۆژی وەسڵت هەر سبەینێیە کە وا پڕتەو نەدا	من لە تاریکی شەوی هیجرا ژیانم بۆ چییە!؟
سەیری تۆی گەر پێ نەکەم کوێر بم، ئەگەر چاوم بوێ!	وەسفی تۆی گەر پێ نەکەم لاڵ بم، زمانم بۆ چییە!؟
تا بەهاری ڕوویی گوڵڕەنگت بڕێژێ ڕەنگی حوسن	سونبول و نەسرین و لالە و ئەرخەوانم بۆ چییە!؟
بۆ قەدی هەروەک عەسایە غەیری قومری مەشرەبان	هیچکەسێ نازانێ ئاهی ناتەوانم بۆ چییە!؟
جێگە گازی من هەتا ئەو ڕوومەت و ئەو لێوە بێ	سێوی سەردەشت و هەناری شارەبانم بۆ چییە!؟
تۆ کە چاوت پێم بڵێ دەرسی زوبانی ئەجنەبی	وەک موفەتتیش بەگ ئیتر من تەرجومانم بۆ چییە!؟
یار کە فەرمووی بێرە باغی ڕوومەوە بۆ گوڵچنین	بێخود ئیتر ئیزن و پرسی باخەوانم بۆ چییە!؟

11

سوبحی فەروەردینە ئەمڕۆ، بولبولی دڵ بێ غەمە	گەر لە خۆشیا ڕۆحی دەرچێ باخەوان هێشتا کەمە
هەر دەڵێی غیلمان و حوورن نەو عورووسانی چەمەن	ڕووی زەمین جەنناتی عەدنە، هێندە تازە و خوڕڕەمە
وا لقی لاولاو بە قەد سەروی ڕەوانا هەڵچووە	بۆ لە باوەش گرتنی باڵای بتان وەک پەرچەمە
گوڵ خەریکی ڕەنگ و بۆ یەعنی شەبیهی ڕوومەتە	خونچە مەشغووڵی تەبەسسوم، هەر دەڵێی لێو و دەمە
زەمزەمەی سار و کەبووتەر وەک نەوای نای و نەیە	هەمهەمەی دوڕڕاج و قومری ڕاست ئەڵێی زیر و بەمە
بێنە ناو بەزمی چەمەن دنیا ببینن سەربەسەر	نەشئەیی «نَظّارە» یی نێرگس ئەڵێی جامی جەمە
با نەدوێن ئیتر لە ئەستێرەی شکۆفەی بورجی باخ	بێینە سەر ئەوسافی نجم الدّین کە بەدری عالەمە
چونکە میعماری تەریقەت باوک و باپیری ئەون	بۆیە دیواری حەساری نەقشبەندی مەحکەمە
ڕۆحی «هودهود» بۆ قوربانی دەم و لێوی نەبێ!؟	وەک «سولەیمان»ی زەمان ساحیب نگین و خاتەمە
بۆ لە یومنی مەقدەمی سەرتان نەگاتە ئاسمان!؟	جیلوەگاهی ئافتابی ئێمە عەرشی ئەعزەمە
خەڵقە بۆ ناچن لەبۆ ڕەوزەی بیارە بۆ تەواف؟	خاکی وەک خاکی بەقیعە، ئاوی ئاوی زەمزەمە
نەک بە تەنها قەیسەری ڕۆم خادیمی دەرگای ئەوە	بۆ سوجوودی حاجیبی خاقانی چین پشتی خەمە
نێرگسی ئەو تا تەبیبم بێ چ باکم زەخمە من	بۆ برینی زاهیر و باتین نیگاهی مەرهەمە
هێندە بۆ ئیحیای دڵی مردوو یەدی بەیزای هەیە	گاور و جووش پێی ئەڵێن مووسا دەسە و عیسا دەمە
ئیلتیفاتی شاهی من بۆ دۆست و دوژمن وەک یەکە	خزمەتی سِيّانە، گەر بێگانەیە یا مەحرەمە
خاکی بەرپێی ئەو بە بێخود گەر بە ڕیفعەت تالبی	دەس بە داوێن گرتنی بۆ بانی عیرفان سوللەمە

12

ئەم پارچە شیعرە بە بۆنەی کۆچی دوایی میرزا فەرجی حاجی شەریفەوە وتراوە کە لە ساڵی ١٣٧٣ی کۆچیدا مردووە

قەت بە دنیا دڵ مەدەن، جادووگەری ئێرانییە	سینەمایێکی پڕ ئاشووب و فریب و ئانییە
قەت بە خۆشی و ئاشنایی و دۆستی باوەڕ مەکەن	گەر تەماشا کەن ئەزانن دوژمنێکی جانییە
هەرکە ڕۆژی عومری هەرکەس هاتە ئاوابوون، ئەجەل	مۆڵەتی نادا قەسەم بەخوا بە قەد یەک سانییە
خاوەنی شان و شەرەف میرزا فەرەج ئالی شەریف	تاکوو دوێنێ بوو مەلیک، ئیمڕۆ مەلەک میوانییە
بەسیە ئەم نیو شیعرە بۆ تەئریخی کۆچی ئەو کە وا...	دەست و دامێن گیری عەبدولقادری گەیلانییە

13

تا لە من ئەو ماهی چاوبەخومارە خۆی ون کردووە	تفڵی دڵمی تووشی بیماری سەروبن کردووە
من لە حەڵقەی خەتمی نازا زۆر هیلاکی غەمزە نیم	ڕابیتەی ئەبرۆ جگەرمی ئەنجن ئەنجن کردووە
قەت بە بێداریم نەدی تالیع، ئەڵێی مامانی دەهر...	گۆشی ئەم منداڵە بەدبەختەی بە نووستن کردووە
تۆ خودا با هیندە بگریم تا بزانن شارەزوور	سەیلی فرمێسکی من ئاوی زەڵمی لیخن کردووە
خوا لە دزیایش هەتا ئەحمەد بڕندە و تا پریس	تا عەبابەیلێ و هەڵەبجەی قیبلە بۆ من کردووە
ئەی فیدای ڕەحم و وەفاتان بم، مەگەر من یۆسفم	ئەم برای خۆتانە وا ئاوارە و ون کردووە
ئێوە عیلم و في المثل بەندەش مەلا، بێ ئیختیار	خوا منی بۆ خوانی وەسڵی ئێوە نەوسن کردووە
گەر کەتان و ڕۆژپەرستی ئێوە نیم، بۆ ڕۆژ و شەو	ڕووم لە مانگ و ڕۆژی وارماوا و بێدن کردووە
نامەتان نایێت و ئەشزانن کە چاوڕێژی ئەزەل	چاوی تاریکی منی بەو سورمە ڕۆشن کردووە
هێندە بێ ڕەحمن ئەڵێی ئاسنگەری ڕۆژی ألَسْت	دەرحەقی من لەوحی دڵتانی لە ئاسن کردووە
گەر ئەپرسن چۆنە بێخود؟ دڕک و داڵی دەشتی ئیشق	دوور لە ئێوە پێی دڵیشی دەرزیئاژن کردووە

14

کاغەزت هات و دڵی مردووی منی چا کردەوە

وەک مەسیحا، سامی ئیبنی نووحی ئیحیا کردەوە

15

کاغەزم نووسی بە خوێنی دیدەکەم

نووری چاوم، ڕۆحەکەم، بیخوێنەوە

16

کوردینە بە گەل بێنەوە وا وەختی سروورە	وەختی گوڵ و ڕێحانە و ئەسرین و چنوورە
بڕواننە گوڵشەن کە ئەڵێی بۆقەلەموونە	گەهـ سەوزە، گەهێ زەردە، گەهێ ماوی و سوورە
بڕواننە ئاونگ و گیا تاکوو بزانن...	ئەم هەر وەکوو زمڕووتە، ئەویش چەشنی بلوورە
بڕواننە دنیا کە ئەڵێی جەننەتە ئیمڕۆ	لایێ هەموو غیلمانە، لەلایێ هەموو حوورە
نێرگس کە تەماشاگەهی سەیرانکەرە ئیمڕۆ	وەک چاوی بوتان خاوەنی سەد جۆرە فتوورە
خزمینە ئەگەر باسی من و باوکم ئەفەرموون	ئاغایە سولەیمان و کەمالیش وەکوو موورە

17

ئەی دڵ لە داخی ئەو مەهە بتلێ بە دەردەوە	بڕژێنە ئەشکی گەرم بە دەم ئاهی سەردەوە
دەرچوو بە داخی عەشقەوە ڕۆحی ڕەوانیان	فەرهاد بە بێستوونەوە، مەجنوون بە هەردەوە
گەر وەسفی گەنجی ڕوویی ببێ جارێ باخەوان	وێران ئەکا چەمەن بە هەموو دار و بەردەوە
شۆرێ بە یادی لێوی بڵێ ئەی حەمەی عەلۆ	ئەمما بە شیعری مونتەخەب و بەیتی فەردەوە
بێخود لەباتی سورمە لەسەر چاوی دائەنێ	ناڵی وڵاخی ئەو بە هەموو تۆز و گەردەوە

18

بەندی یەکەم
دیسان لە ئێمە قاپییەکەی غەم کرایەوە	دەرگای تەرەب لە عالەمی دڵ داخرایەوە
دیسان جگەر کرا بە قەنارەی مەشەققەتا	یەعنی دوکانی چەرخی جگەرچی کرایەوە
دیسان برینی کۆنی غەمی ئێمە هاتە سوێ	جامی فەرەح بە بەردی حەوادیس شکایەوە
دیسان دو چاوی سووری

19

کەوسەر وەکوو تەنوورەیی چاوی پڕاومە	دۆزەخ وەکوو تەنووری دڵەی پڕ هەڵاومە
ئاخۆ ئەلەکتریکە شەوی کردە عەینی ڕۆژ	یا خۆ بڵێسەی ئاگری کوورەی بە تاومە
لەنگێزەیی بەهارە کە هەڵساوە «خاصە»، یا	فرمێسکی چاوی سووری بەخوڕ داڕژاومە
یەک جێگەپێ نەمایەوە بۆ من زەمینی دەیم	یەعنی لە فەیزی گریەوە دنیا بەراومە
بۆنی کەبابە، بۆچەکی چزڵیکە دێ لە دوور	یا بۆچرووکی جەرگ و دڵی هەڵکزاومە
هێلانە زەردەواڵە ورووژاوە بەم شەوە	یا گرمەگرمی سینەیی کونکونکراومە
داخی شکستی دڵ نییە ئەیخۆم لە موددەعی	دەردی بە بەردی حادیسە شووشەی شکاومە
غەم واسیتەی حەیاتی منی بێکەسە و فەقیر	غەم نان و ئاو و چایی و گۆشت و پڵاومە
بەربووم ئەگەر لە داوی تەعەللوق، ئەما بە ڕۆح...	دڵ گورپەگورپی پەرچەمی چین چین و خاومە
وا تێ نەگەی لە ڕەعشەیی پیریمە ئەی جەوان	لەرزینی تیری غەمزەیی شۆخێکی لاومە
شۆخێ کە یادی ئارەقی بۆنخۆشی لاملی	قۆڵۆنیا و شووشەیی عەتر و گوڵاومە
شۆخێ کە ڕابیتەی دەمەکەی پڕ لە خەندەکەی	خۆنچەی گوڵی بە ئاوی حەیات ئاودراومە
شۆخێ کە یەک موژەی بە مەسەل بۆ زەبیحی من	سەد خەنجەری خەلیلی بەدایم سواومە
پەروانە نیم کە عاشقی شەمعی کوژاوە بم	پەروای چرایی تاکوو ئەبەد هەڵکراومە
مەجنوونی لەیلی چاوی غەزاڵێکی «هاشمی» م	شاهید دەروونی چاک و یەخەی دادڕاومە
یۆسف مەتاعی من نییە لێم لادە ئەی عەزیز	سەودای نگینی خەتمی ڕیسالەت بە ناومە
بۆ گۆشەیێکی تێغی برۆی وەک ژنانی میسر	پەیوەستە ئارەزووی لەپی دەستی بڕاومە
بۆ زەڕڕە خاکی توربەتەکەی ڕەشکی جەننەتی	یەک دەفعە بووم بە نێرگس و هەر چاوەچاومە
***
ئەو توربەتەی کە سە یقەلی میرئاتی چاومە	ئیکسیری قەلبی مەعاسی خوراومە
ئەو توربەتەی کە خۆڵ و گڵ و وردە بەردی ئەو	ئاڵتوون و زیو و لیرە و غازی و دراومە
ئەو توربەتەی کە تۆزی ئەگەر بێتە سەر سەرم	نایدەم بە تاجی خوسرەو و جەم گەر کڵاومە
ئەی بازی سیدرە تۆبی خودا بۆ چی ناگری	نێچیرەکەت کە پۆڕی دڵی هەڵفڕاومە
هەر فیکری تۆیە باعیسی ژین و حەیاتی من	هەر زیکری تۆیە قووەتی ئەژنۆ و هەناومە
هەر وەسفی ڕووتە هەر قسەیێ وا لەسەر زمان	هەر سەرفی مووتە هەرچی خەیاڵی بڵاومە
هەر وەک مناڵە کوردێ کە ون بێ لە باوکی	ئەگریم بەرەو مەدینە و هەر باوەباومە
مەڕوانە چاوی تەڕ، بە خودا زۆر خەجاڵەتم	گریان نییە، دڵۆپی حەیاکەی تکاومە
باکم لە دانەنیشتنی مەنهی نییە، بەڵام	ترسی بە ئەمری حەزرەتی تۆ هەڵنەساومە
چاکەم بە دەست خراپەوە هەر زاک و زووکییە	چ بکەم پەرۆشی ماڵی بەتاڵان براومە
سا تۆش بفەرموو: خادیمەکەی دەرک و بانی خۆم	پەت کەن کە چونکە ئەو سەگی قول هەڵکراومە
یەعنی بە شەو ئەگەر سەگە، ئەیکەم بە توولە ڕۆژ	ئەم سەگ بە توولە کردنە بۆ پاس و ڕاومە
من چونکە غەیری شیعر و غەزەل هیچی کەم نییە	بۆ خزمەتت هەر ئەم دووە دیاری نراومە
دایم لە سەییدم ئەمەتە جائیزەم بڵێ:	بێخود قولی بە نەقدی شەفاعەت کراومە

20

بێخود کە وا بە جان و دڵ ئەی خواجە بەندەیە	بەندەی وەفای شێخەکەی ئەحمەد بڕندەیە
عەبدولکەریمی خۆم کە لە باخی مەحەببەتا	وەک گوڵ بەڕووی هەموو کەسەوە دەم بە خەندەیە
ڕۆحم لە خۆشی قاقەزەکەت زوو کە دەر نەچوو...	جانسەختە، تیرەبەختە، نەفامە و سەهەندەیە
یا شێتی عەشقی دڵبەرە ئاگای لە خۆی نییە	یا وەحشییێکە هەمدەمی دەعبا و دڕندەیە
تریاقی نامەکەت کە گەیی بێخودی سەلیم	باکی لە ماری غەم نییە گەرچی کوشندەیە

21

سەندت لە دەسم خودا هەچی موڵکی منە	دات بەو تەرەسەی کە وا نە پیاوە و نە ژنە
لەم گەردشی چەرخە تێگەییم ئەی بێ باک	شیر لێدەر و دەفزەنت وەکوو یەک لە کنە

22

بێخود شەوەکەی هەتا بڵێی تاریکە	ڕێگەش بە خودا درێژ و زۆر باریکە
کاروان هەموو باری کردووە ڕۆیشتن، تۆش	خۆت گورجەوە کە کە ڕۆینت نێزیکە

23

ئەی خاکی سیاهـ مستەفا مەزهەر بەگ	بیناسە مودیرێکە مەعاریف پایە
وا هات و لە خزمەتی نەفەرمووی سستی	چونکی ئەوە وەک هوما و تۆ وەک سایە
بۆ ساڵی وەفات و ڕیحلەتی بێخود ئەڵێ:	سەدرێکە لە خانەدانی قازانقایە

24

میرم هەتا وەفا و تەوازوع شیعارتە	یەزدان موعین و حیرزی دۆعای ئێمە یارتە
بولبول لە فیرقەتی گوڵە کەوتۆتە حەلوەلا	یا دەممە بەم بەیانییە وا بێ قەرارتە!
شوکری خودا بە تیری توهەمتەن وەک ئەشکەبووس	سینەی عەدوو بە تێغی حەسادەت فگارتە
بێخود ئەسیری مەعریفەتت چۆن ئەبێ نەبێ	تۆیێ کە شێری بێشەیی عیرفان شکارتە

25

ئەمە بۆی نەسیمی بەهارە، یا خەبەری سرووشی هەوایییە	دەمی ڕۆحبەخشی نیگارە، یا نەفەسی مەسیحی سەمایییە
کە دڵی بە عوقدە کرایەوە گوڵی ناشکوفتە گەشایەوە	نە ئەوە و نە ئەم، نە ئەمە و نە ئەو، هەموو موعجیزاتی خودایییە
دەمی ئیبتیدایی مەسەڕڕەتە، نەفەسی نیهایەتی میحنەتە	لە هەموو محاڵەوە عوشرەتە، لە هەموو وڵاتەوە شایییە
خەبەری قودوومی کەسێکە وا کە ئەکا برینی دڵان دەوا	کە لەبۆ جیهادی کولەی هەوا لە تەرەف خوداوە غەزایییە
قەمەری سەمایی سەیادەتە، حەجەری بینایی ڕەشادەتە	گوهەری هومایی سەعادەتە، دوڕی تاج و ئەفسەری شایییە
ئەسەری حەبیبی ڕەسوولە ئەو، جگەری نەجیبی بەتوولە ئەو	سەمەری قَضيبی قەبووڵە ئەو، گوڵی باغی ئالی عەبایییە
ئەتەوێ ئەگەر گوڵی سەرمەدی، وەرە باخی نەعتی موحەممەدی	ببە بولبولێکی موئەببەدی، ئەمە شێوەیی ئودەبایییە
لە تەریقیا نییە خوسرەوێ، کە نەبێ بە خاکی قەدەم لەوێ	بە خەیاڵی خۆی کە دەسی کەوێ، بە تەمای مەقامی گەدایییە
مەلەکە و بە شاپەڕی سەوزەوە شەو و ڕۆژ خەریکە گەسک ئەدا	فەلەکە و بە کوندەیی هەورەوە هەموو ئیش و کاری سەقایییە
دڵ و جەرگی بێخود ئەگەر لەتە، بە خودا بە تێغی مەحەببەتە	بە ئومێدی شەهدی شەفاعەتە، سەر و ماڵ و ڕۆحی فیدایییە