Эрязденть арсезь (2010)/Тюрьмань вальмава ванозь
[307]
| Тюрьмань вальмава ванозь |
ЭЗИНЬ фатяяк, кода пильгень лутавсть асфальтонь киякстонть ды сеске кепедевиль. Кавто крежа, погононь кандтниця од цёрат саимизь кавалалдо ды капшазь, кандозь кандымизь аволь васоло, панжадо кенкш УАЗ машинанть ваксс. Вийсэ, эцезь совавтымизь эйзэнзэ. Мельган ветизь ды текекс озавтызь Пиргуж атянь, эрзянь келень идема Фондонь прявтонть, мельганзо Коянонь Вирязонь, «Народный фронт Эрзян» вейсэндявксонь покшонть.
Юткозонок эцесь милиция. Пекстызе мельганзо вийсэ кенкшкенть, ды машинась «ношкстась» чинь валдонтень кецниця ошонь ульцятнева.
...Вастыця милициясь панжизе покш, кияксто саезь потолокс [308] кшнинь ёлосто теезь кенкшенть. Совавтымизь эзганзо школань кондямо, ашосто ваднезь коридор пес.
Цянк-глянк мерсь ды пекставсь мельганок панжомась. Жу-у-йть мерсь седеем. Кивчк ютась пачкан пси налтке. Весе. Варчик лиссть. Понгинь тозонь, козонь онстонгак эзинь понгоне. Теке сон, истямо таркась, арасельгак. Ансяк марсинь, ули кодамо-бути КПЗ, ды ловнокшнынь эйстэст книгасто.
Коридоронть песэ сэрей-келей, кшнинь эчке уськсэ пирязь, чельке потсо, начко нулань асодыця вальма. Сэрей потолок, «штапо» стенат, плитасо ацазь киякс. Кевень кескав... Озамо таркась вейке — кельме, прок эй, кевень кияксось. А озат. «Кескавсонть», минденек башка, зярыя. Вейкесь эль ашти пильге лангсо. Эрьвас педси. Ирдексты весень — начальниктнень, минек, пазонть, аванзо — визькс валсо. Эрьва «шумбра» валонть мельга сюлми рузонсенть, колмо буквасо ёвтавицянть. Омбоце «клиентэсь» ашти озадо эй кельме плитатнень лангсо. Стяви? Эль марямга кувси. Маряви, янкси. Коридоронтень ваныця, суликавтомо, пряяк а кельги, «амбразурастонть» апак лотксе кайсети нулакс иредьстэ авань корсяня вайгель.
— Сколько время?
Ансяк ёвтасынек, таго теке.
— Сколько время?
— Два, два, только сказали!
Кашт. Налкставсь!
— Какого... молчите, суки! — мерят, азаргадсь, одс «вельмесь», алкашавась, ранги, сюлонзо, секень вант, лисить.
Аволь кенярксонь явший таркась, аволь!
Вантано колмо полонявт, учотано, сы кияк кенкшенть малас, милициянь кодамояк «чин», ды ёвтасы мезень кис «кекшимизь» кевень кескавонтень. Тонавтнеме «матсо» почодозь рузонь келенть? Кунсоломс симиця-таргиця аванть «валаня» вайгелензэ? Стяконь учомат-кемемат! Пеняцямс а кинень. Варштыцяяк лангозонок арась. Теке арастянокак, нерькстымизь эрямостонть.
Виряз, эйстэнек весемеде одось ды закононь седе содыцясь, сергедсь кшнинь ёлосо чекажазь кенкшенть пачка та-кодамо «рядовойнень».
— Подойдите, пожалуйста, поближе!
Тона сыркак эзь тее.
— Нам нужен адвокат, нужно сообщить домой! Этого [309] требует закон, это наше право, — верьга вайгельть поладынзе валонзо Виряз.
Закон, право... «бабань пеште»! «Ванстыцясь» марикскак эзь тее, неицякс — седеяк. Прок кевень. Минь тесэ аволь ломанть — сулейть, чопачат. Ёртозь нулат-валат. Валонок кошткак а сорновтыть, ваить отьмас.
...Берякавты ёжом-кайксом вальмастонть салава молиця экше, пачка ютыця коштось. Судось монь ялгакс мартонзо а тейни, а вечксы, пели эйстэнзэ, потоми аволь кувать аштезьгак. Ней вана... майсевтяно час, омбоце, колмоце... Истя, 17-це пингенть лувсо, пандыть тенек кежть «чумочинек» кис. «Урядонь ванстыцятне» модердясызь, нарьгасызь, синдсызь ломаненть уцянзо, кедезэст ансяк понгомсто. Вана кодамо питнезэ Россиясо «презумпция невиновности» валмеревксэнть! Окойники, кото (!) часонь ютазь явсть тенек мель — калдоргадсь панжомась, чикорк мерсь кенкшесь, ды саимизь кевкстнеменек, допросс.
...Вецана чопода. Потолоксонть вере-вере нузякссто типельди челькссэ ды шанжавлондакшссо вельтязь лампочка. Стуворнэ. Экшсэнзэ сержантонь погононь кандтниця од цёра. А стул, а эземне. Колмонек, прок палманть, стинек тень нуцькакс савиця кевкстницянть икелев. Кото часонь перть стядо аштеманть аштемакс эзизь лово. Поладызь. Пильгень лоскаить.
Сырят?
Аволить понгоне.
Сизить?
Озавтадызь — оймсят.
Ормалгадыть?
Те тонь мелявксось. Тесэ аволь лазарет.
Арсят пеняцямо?
Пеняцяк. Стенатнень пилест арасть.
Кода свал:
— Фамилия, имя, отчество...
— Год рождения...
— Место рождения...
Конёвонзо сержантось пештинзе-сёрмадынзе. Истя-истя, келя, Алексий патриархонть вастомсто площаденть келес сёвнынек-пижнинек рузокс нулгодькс валсо, мик кедь кепсинек полоницянок каршо. Вантака, кодат орт-злыдарть, кодат «террористт», натой милициятнень лангс кайсевсть. Ванодо, ванодо кодат [310] «террористт» кундынек! Кода тенек а максомс орденнэ эли куш чеменев медальне?
Сёрмадозь кенгелематнень алов кеденек эзинек путо. Милициясь пурнынзе документэнек, часонок, ярмаконок, кинь зяро ульнесть, ды путынзе, эрьвань башка, кескавнес. Путынзе кшнинь шкафс. Истямо кой.
— Пойдемте, — мерсь тенек чова, теке тейтерень, вайгельсэ конёвонзо ящикс пшкадемадо мейле, ды ветимизь пачк кшнинь, эль айгевиця, чопода пижесэ ваднезь кенкш икелев. Эйсэнзэ ломанень сэрь видьга «сельмине» — варштнемс мезе теить камерасонть пексгазетне. «Тестэ Гюгонь Жан Вальжанозояк аволь оргодеве», — сась превзэнь эйкакшпингстэнь ловнозенть эйстэ.
— Вы сюда, — невтсь тенек Виряз марто кенкшенть панжомсто, ды нолдымизь «гостиницантень». «Пиргужонь, — корцьк мерсь седеем, — саизь лия таркав. Мекс явимизь? Кода тень чарькодемс?»
...Кирьпецень, штукатурязь ды раужо-пижесэ артозь стенат. Сэрей потолок. Чополкс. «Сундерьгавты» кенкшенть велькссэ вариневанть совиця валдонь налнэсь. Стенатнень ёжова эчке лазсто теезь алкине-теине, эль рунгот кельги, эземть. Нарт? Аштек, оймсек зяро мелеть, мадиндеряткак а кардатадызь. Арась прялкс? Ну, те уш...
Теке каямо, якан мекев-васов. Чаран. Ойсян эземс. Весть-кавксть чиремкшнынь. Куш сутямомс. Арась. Эвтить превсэнь, прок коткудавт, арсематне — а максыть оймамс — тесэ ды модамасторонть лангсо певтеме-певтеме авидечитнеде, кенгелематнеде, апаро чинесэ лексиця эрямодонть. Мекс видечисэ эрицятненень эрямс стака ды стакаль свал? Мекс а вечксызь? Мекс сынст а ловить эрявикс ломанекс? Эли пелить эйстэст? Мекс пелить?
Зяро-бути шкань ютазь «кудораськенек» покшолгадсь, нолдасть юткозонок аламнеде копордазь, парсте оршазь эчкела рунго, жой-гай вайгель цёра. Совавтсь мартонзо куля: шказо пелеведе мейлень. Ансяк. Састо, вай, састо эскели тесэ шкась! Черепахаськак сасасы. Од «эрицянок» энгамкшнось а куватьс. Куроксто педясь кенкшентень кочкарясонзо ды мокшнасонзо равтомо: «Панжодо, сурстом верь чуди, лездадо!» Кашт. Сон таго: «Панжодо, панжодо!» Тона ёндо кашторкскак эзь маряво. Зяро, кода эзь бахае кенкшентень — стяко. Ванстыцянок, мерят, кулость. Рангомасонзо налкставтсь, савтнесь кежть. Ков молят, сави кирдемс кор. Окойники, [311] идимизь: «томбавозь сурось» пекстызе кирьгапарензэ.
Кие-бути зярыяксть серьгелесь, пстиесь пилысэнзэ кенкшентень, энялдсь нолдамс венелев. Текесь. Кенкшесь а куш а каш. Пилевтеме. Иля снартнеяк мезеяк вешемс. Ведь? А кулат. Кулат? Тов кить... Кинень тон эряват те масторсонть...
...Тей-тов, ризнэзь-мелявтозь, кувакасто укстнезь эрязасто эскели ашо, ванькс-вадяшазь панарсо, раужо понкссо цёра. Тензэ колоньгеменде эль ламо. Валдо черь-чама. Ёлганя.
Мезе лиссь мартонзо? Мекс истя кувакасто оймензэ таргси?
Озась.
Шаштынь малазонзо.
— Авадря кевкстнемс, нолдык чумом. Мезе стардынзеть, кодамо кажо? — изния пелемам-виздемам, пшкадинь виде рунго цёрантень.
— Мезень авадрясь? Ёвтнеса. Якинь инжекс. Копордынек, содави. Вейкень эйстэнек ёмась, та-ков теевсь куртказо. Невтсть монь лангс. Келя, сон уш «шка» аштесь. Ёрокчизэ ули. Сон... уль-мизе. Гайневтсь милицияв. Э-эх! Кодамо од эрямос совакшнынь. «Тосто» нолдамодом мейле урьвакстынь, ушодынь важодеме, тевень мольсть. Ним а умок чачтась. Цёра. Ды на, истямо кажо! Весть аштемась «паро», омбоцеде... Саты, саты васенцеськак!
Кода маштынь, явинь китордыця седей асодавиксэнтень мель, лездынь, кода маштынь, шождалгавтомс ёжонзо валсо-превсэ. Эсь панжома, седе виде улевель пекстамо, экшс понгомань историямгак ёвтния. Кунсолыцям, тешкстыя эськам, ламос чарькодиця. Машты кортамо-кунсоломо. Аволь превтеметнеде. Пеняцинь теке басом милициянь-тюрьмань тюнгольдематнень-казямочитнень лангс.
...Э-э, бодяй, тон мезеяк а содат, мезеяк эзить нейне. Те камерасонть улемась — рай. Стяко, бодяй, сялдат. Стяко. Зяро эйсэнзэ? Комсешка метрат. Сисемненек. Мелеть озак, мелеть — мадть. Якамо юткояк ули. Неевлика, бодяй, мезе моли, зярдо истяшка камерасонть колоньгеменде ламо... Валсо а ёвтави! Стенатнева, потолоксто ведь кольги. Лексемс а мейсэ. Кизна пият пси, тельня — якшамо. Аволь, бодяй, озамс, стямс-нежедемс а козонь. Удсинек аламонь-аламонь вейкень-вейкень полавтнезь, учозь. Седе лавшотнень виест тень кирдемс эзть сатно. Кулозетнень ливтнесть ушов, кинь чаракадыть превензэ путнизь эземс. Вастневсть резэма ормасо сэредицят. Ды аволь чуросто. Э-хе-хе! Менттнэ ломаненть [312] ракшакскак а ловить! Карво... Ули сон, арась...
Ней, бодяй, тазтнэде. Содасыть, кеман, мезть истятнэ. «Отечественноенть» шкасто, марсинь, педсесть сеедьстэ. Ну, те война. Чарькодеви. Кода ней чарькодемс неть тевтнень? Рунгось, васняяк чевте таркатне, сур юткотне, вельтявить пупоркасо, мейле кувосо. А уш кинетить, кинетить, идемевсь пурнавлинзе... Удома таркаскак понгат, а матедеват. Раздят, раздят... Палы киськесь. Кодат удомат! Кандыть ванстыцятне ярсамс, таго стакачи — пенчесь кедьс а саеви: суртнэ раздемадонть, верев пупоркатнеде какарьгадыть. Ярсамопелеськак уш ансяк лемезэ, кодамо-бути ямне, сеяк кургс а пачтяви. Ёжоткак коли. Шкань ютазь эскельдявсь те зыянось — ярсамодо икеле камерас кандтнесть ведрасо-мейсэ ведьсэ вецакавтозь марганцовка. Навасынь эйзэнзэ кедеть кенерепакарь видьга, кирдсыть зярскак, ванат, ормась аламнеде поты, кедтне чевтемить. Кецнят — пенч саеви-кирдеви!
Эх, эрьвань Пазось, эли кияк лия тосо, ванстозо истямо нарьгамотнень пачка ютамодонть! Яла немецтнеде сёрмадыть, яла сынст сялдыть-сюдыть, сынст лагерест невтнить. Мекс а ёвтнить, мезе эсенек кудосо моли? Вана истя, бодяй. Тесэ минек аволь камера — курорт...Кецнек.
Апародонть черензэ эль араздиця алясь салава ойкстась ды чатьмонезевсь, зярыя шкань ютазь стясь ды таго, зяроцеде уш, верендясь мекев-васов эрязасто якамо, истя бажи матрамс ризксэв ёжонть.
Эрямо, эрямо! Мезе тон? Чанстте, чипаень валдодо эли майсемадо, сэредькстэ, колокс пешксе кажодо латко? Мезеденть эйсэть седе ламо? Кие ёвтасы?
... Весь ютавтовсь. Та-кода чарькодинек — ашолгадсь. Ламо веть эйкакшпингстэнь ютавтынь, удсинь коник лангсо, зярдо прялксокс тень ульнесть пенгень лазовкст, алксокс — «штапо» лазт. Тесэяк калгодо эземть, ансяк сестэ кудонь кенкшесь ульнесь чувтонь, монсь пекстния, аволь якстере картузт. Пекстния-тулолия сонзэ потмо ёндо, тесэ...
Учовсь од чись. Кода тенень а кецнемс? Кода сонзэ неемс? Зярдо?
Коень кирдиця-ваныця прявттнэ састь удомаст явавтнемадо мейле. Ансяк кевейкее час малава панжовсь стака, кшнинь вайгель кенкшесь. Ванстыцянок мерсь монень ды Вирязнэнь лисемеде. Ветимизь стуворонть ваксс, косо чокшне [313] кевкстнимизь, косо чамдызь зепенек — саизь конёвонок-мезенек, фотоаппаратонок. Учось эйсэнек милициянь формасо пандошка раужо черь-муюк цёра. Майор. Ёвтась кавто валт:
— Можете идти.
А чумонь нолдамот, а «извиненият».
Макссть конёв. Эйсэнзэ визьксэнь апак сода сёрмадсть: истя-истя, келя, 2000-це иень умарьковонь 4-це чистэ II Алексиень марто вастовомсто Четвергов площадень келес сёвнось... рузонь нулгодькс, апечатавикс валсо, ахолясь мокшнасонзо.
* * *
2000-це иень умарьковонь 3 — 4-це читнестэ Мордовияв сакшнось Алексий патриархось. Аволь патриарх, аволь Модалангонь ломань — сонсь Пазось эли Пазонть цёразо, кулозьстэ вельмезь Иисус Христос.
Истят вастомат тейнесть тензэ, кодат эзть тейне Масторонь Прявтонтень Путиннэньгак. Оштнестэ-велетнестэ, заводтнэстэ-цехтнестэ шкань апак таргсе, курок-курок, теке ушодовсь од «отечественной», автобуссо-мейсэ ускозельть Саранов ламо тёжат «озныцят». Атеисттнэстэ ды мусульмантнэстэяк ве чис тейсть зняро «православнойть», зяро усковсть, зяро эрявсть Ридигер (Алексеень алкуксонь фамилиязо) Московонь инжентень ды тескень «покштненень». «Республикань Домонть» (аволь Кудонть!) икеле площадентень «паломниктне» натой эзть кельгекшнеяк. Пазось эли Идемевсесь тень теекшнызе, кияк а соды. Седе курок, бульчом, омбоцесь.
Каршо чинь чокшне эрзянь келень идема Фондонь ломантне, нилешканек, арсинек-теинек ды прынек мельс: лисемс вастома таркантень плакат-тердема марто. Ломань вельде — чарькодинек кить ды косто — пачтясть: илядо лисне! Те кардамонть лангс ваномо эзинек карма, эзинек тандадо. Омбоце чинь валскестэнть анокстынек плакатт:
1. Эрзяне ждут покаяния православия за его преступления!
2. Трагедия эрзянского народа — следствие экстремизма церкви!
Кшуманцянь Пиргуж, Фондонь прявтось, мон, «Эрзянь Мастор» газетань редакторось, ды фотоаппарат марто Коянонь Виряз, «Народный фронт Эрзян» вейсэндявксонь теицясь, кемень час малава ульнинек Советской площадень пелевеёнкс чиресэ.
[314] Валскесь маней. Ёжонок вадря. Пеедькшнетяно. Стинек «Изумруд» лавканть каршо.
Ломантнеде — моря, пе а неяви «паломникень» прятненень. Мик эйкакштненьгак ветявтызь. Иисуснэньгак, кона, кода сёрмадыть, ульнесь виев гипнотизёрокс, истят тюнихат авольть тееве — аразьстэ, ловт, теемс зняро озныцят-церьковав якицят.
— Стядо, атят, плакатонк марто! Зярыя кадрат теян! — кармавтсь кеняркс вайгельсэ Виряз ды потась колмо-ниле эскельксэнь туро.
— Паро мелесь! — шнызе меленть Пиргуж. — Ансяк плакатонок панжомат!
Эзинек кенере келемтеме конёв тапарксонок, невтемс сёрмадовкстнэнь фотосельментень, кода удало ёндо каявсть лангозонок, теке азарць пинеть, сисемь-кавксо милициякс ды «простойкс» оршазь бурина цёрат.
* * *
Эринь пекстазь, олячим саезь, лексинь тюрьмань режнезь чинень коштсо комсьнилее чассто ламо. Те вельть нурькине — аволь ковт ды кувака иеть — шканть перть неия весе Россиянть: ютась икельган пельсштапо, симезь, мерьказь, визькстэме ды, теке марто, кежсэ лакиця, эрьва ки лангс кайсевиця, эрьвань покордыця сэрьс-келес покш авакс. Неия неть частнэнь перть келенек ёмавтомасонть школанть васенце лездыцянзо, сонзэ аволь ломанень чаманзо. Школась тапи-яжи ломаненть оймензэ раужосэнь кенгелемасо, тюрьмась — кежсэ ды ломанькс ломаненть аловомасо. Сынь, лиси, вейкест-вейкест туртов лездыця патят-сазорт.
Мекс эрявсь нарьгамс — кирдемс умок аволь од ломантнень кото чассонь перть стядо аштемасо ды мейле, кадык озадояк, камерасо? Мекс тень эзть максо ведне ды симемс диабеттэ таблеткан? Мекс эзть терде кисэнек пшкадицят, адвокатт? Мекс, мекс... Кувака рисьме лиси неть «мекстнэде».
* * *
Натой а кемевияк: видечись изнясь! Судось, кона мольсь ие ды ниле ковт, 2001-це иень сундерьковонь 30-це чистэ сась мельс: Алексий патриархонть вастомсто Сарансо Четвергов Е.В. визькс валсо эзь сёвно, мокшнат киньгак лангс эзь кепсе, киньгак эзь норго. Теде корты судонь мельспрамодо конёвось.
[315] Решение Ленинского суда
РЕШЕНИЕ
ИМЕНЕМ РОССИЙСКОЙ ФЕДЕРАЦИИ ЛЕНИНСКИЙ РАЙОННЫЙ СУД г. САРАНСКА РМ
30 ноября 2001 г.
... Суд считает действия работников Ленинского РОВД г. Саранска по привлечению к административной ответственности по ст. 158 КоАП незаконным.
Руководствуясь ст. ст. 191,197 ГПК РСФСР, суд решил:
Взыскать с Казны Российской Федерации в пользу Четвергова Евгения Владимировича 4 (четыре) тысячи рублей в возмещение компенсации морального вреда и 500 руб. в счёт возмещения расходов на оплату услуг адвоката.
Решение может быть обжаловано в Верхсуд РМ в течение 10 дней через Ленинский райсуд г. Саранск.
Председательствующий: (подпись)
КОПИЯ ВЕРНА: судья С.Ю. Надёжина