Эрязденть арсезь (2010)/Ярмаконь таркас - килькш
[304]
| Ярмаконь таркас — килькш |
ТЕСЭ, Саран ошсо, Министерствань кудосонть, эрить-аштить эрзянь келень идема Фондось ды сонзэ «Эрзянь Мастор» газетазо. Эрить аволь ие, аволь кавтояк... «ЭМ»-тень, тешкстаса, 2009-це иень таштамковонь 24-це чистэ топодсть кеветее! Кенкшентень педявтозь колмо цифрат — 113 (ней 527). Содамс, карми-арась кияк ледстнеме те номерэнть? Се тарканть, косо кеветее иеде ламо лиснесь ды тукшнось «ЭМ»-сь ламо адреска? Кармить-арась ледстнеме, сон ульнесь эрзянь раськеденть ёвтниця вейкине лисьмапрякс? Ансяк сон, ськамонзо, прок баяга, кадык аволь виев вайгельсэяк, тердсь ды терди стямс кумажа лангсто, эрямс эсь превсэ ды марямс эсь прянть ломанекс.
Нупальсэнть кавонек. Видяз атя — мон, ды Кшуманцянь Пиргуж. Кавто атят. Шержейчист саты ветенень. Пиргуж кото иеде од. Фондонть кемекставтокшныя 1993-це иестэ ды зярыя иеть ульнинь сонзэ прявтокс, ней, уш аволь ве ие, талай, — Пиргуж атя, паспортонь коряс, мерян тагояк, Мусалёв Григорий Дмитриевич. Тесэ виень ды шумбрачинь апак вансто усктано кевде пешксе, цяк усковиця улавонть. Тесэ ютавтано эрямонь меельце иенек. Питневтеме. Стякодо. Ломанькс, кой кинь пельде, апак лово. Яла мерян: теевельтькак зняро, зяро минь, питнеде важодицятне, Америкась умок улевель пуло песэ. Пелезеван лиясто: илязан велезеве тевтнень ламочидест — канстонь кандтниця, усксиця, кассир, бухгалтер, секретарь, тевветий-делопроизводитель, ванстыця, сёрмань сёрмалиця... Сындест башка газетань мелявкстнэ: тенек кучозь сёрматнестэ кочкама эрявикстнэнь, сынст и мейле витнемат, печатавтомат, таго ванномат, а саты кодамояк материал — «чачт», тейть-рисовак макет, кочкак фотографият, [305] нолдавтыть компьютерэнь пачка, таго витнек-петнек, ваннык, кода тейтертне витнесызь муезь ильведькстнэнь ды, окойники, — типографияв. Тосо печатамодонзо мейле чийнема-яксема кудонок икельга машинатнень юткова, муема молиця (лиясто часонь перть вешнема) тиражонок ускомо. Кадови аламо: ловомс кодамо буес-районс зяро, тапарямс ловозь экземпляртнэнь, сёрмалемс адрест ды кандомс канстонть вокзалов (экспедицияв), сынь уш пачтясызь Мордовиянь ловныцятненень. Республикань томбальга, васоло эриця эрзятненень аноксты ды ильти почтанть важонок — Вита, шкань ютазь Лена, Люда, ней — Оля.
Те а весе.
Журналтнэнь, газетатнень лангс сёрмадстомань коволстонть ардтнян, кодамо менельксэсь илязо уле — пиземе, рудаз, лов, якшамо — Дубинькав, Отяжвелев, Орданьбуев, Ицялов, Чаунзав, Березникев... Тесэ «теян» сёрмадстома, якан «конторатнева», сюконякшнан сюпавтнень ды прявттнэнь икеле — энялдан, куш зярыя экземплярт сёрмадстовольть «ЭМ». Савкшны вастневемс университетсэ важодемстэнь икелень пульзядо аштицятнень — «пут колмо!» — мартояк. Ней сынь «прявтт», каштан варягокс яксить, нетядызь — пряст, прок покш пря коршт, велявтсызь удалов. Мезе «мазысь», кучтадызь, секень вант, нулгодькс таркавгак. Вана истямо питнесэ сави вешнемс сёрмадстыцят. Зяро эйстэст муевить ловныцят, а соды Пазоськак. Васодевсть кавто кажот: эрзятне а марить эсь пряст эрзякс, арась мелест содамс эседест, кить сынь, ловномс «ЭМ»-ть; прявттнэнь арась мелест, а арситькак тонавтомс сынст вечкеме эсь пряст, ловномо, сёрмадстозь газетанть, ванстомс эрзянь келенть. «Ялатекень» ормась педясь кода «вишкинетнес», истя «покштнес». Эрзятне ней, Пиргуж атянь валонзо коряс, рузтнэде рузт, митядызь, пачтить лангозот ков эряви рузтнэде курок. Секс савкшны тень ськамонзо кадовозь сыре верьгизэкс лытамс буетнева.
Фестивальть, семинарт, экскурсият, конгресст, сессият, курултайть... Ардтнемат оштнева: Нижний-Новгород, Казань, Куйбышев, Самара, Оренбург, Пенза, Саратов, Ульяновск, Москов, Тарту, Таллинн, Хельсинки... Эрьва кодат «стуворт»-кортамот Сарансо ды лия таркатнесэ, ярмаконь вешнемга азгондемат заводтнэва-кува, книгань-кассетань микшнемат... Тейтяно тень малав весе кавонек: од атясь Пиргуж ды мон.
Те весе — стя-ко-до!
[306] Ламот а кемить. Нолдтнить натой мусколямонь кулят: панды, келя, тенек Финляндиясь, США-сь, пандыть долларсо, макснить тескень прявттнэяк. Ракамкат! Сельведень пачка. Кодат ярмакт, молиндерят ярмаконь явшицятнень-салыцятнень каршо? Зярдо, кодамо масторсо пандсть видечинь кис аштемга? Улевельгак кулятнекс, минек умок выжновтовлимизь ве ёнов ды тарказонок муевельть лият. Арась, ярмактомо кияк тарказонок а чии, кияк а эци совамс ажиятнень юткс. Кой-кить натой вакска ютнить, «вешкить» 113 кабинетс совамосткак, лекстямс зярыяксть Эрзянь Масторонь коштсо.
Мезе комсьнилее частнэстэ кадови, максан сынст литературань шкинемантень.
Эрьва мезенть, ютксост ломанентькак, питнечизэ, кие ды кодамо сон илязо уле, онкстави ярмаксо. Монень кияк, пенсиядон ды кой-кодамо гонорардом башка, трёшникак а панды. Сестэ, лиси, моданть лангсо мезеяк мон а аштян? Чаво тарка? Сюва?
Лиясь рашты валдо мельть ды вийть. Сонгак мезеяк а ашти? Сократкак Платон марто?
Вечкемась яла мерить, трёшниксэ-целковойсэ а онкстави. Те — виде. Ялатеке ярмаконь чинесь тезэньгак пачколи.
Нельгезь, модердязь Масторонть вечкеманзо кис пандсть, ярмаконь таркас, ды пандыть нейгак, эрьва мейсэ: аксорямосо, локшосо, Сибирев кирякстомасо, томбсемасо, оймень саемасо. Секскак, «од атя», кецнек, куш эзь саво тенек морамс «давно кандалами звенит» моронть ды поладксонзо — «пуля стрелка миновала...». Кирьпецькеяк сеске, апак учо прят эзизе поркса! Ярмакт...
Ламо мезесэ пандсь Московось Боляень Акайнень 1670-це иестэ, Эрзянь Масторонть кис тюрицянтень?
Виде, раздизь-сезнизь.
Мезе тейсть «Ине Русень» прявттнэ эрзянь Ине аванть Эрзямасонь Олёнань марто?
Пултызь.
Кодамо казне макссть Василень Несмеяннэнь, 1743—1745-це иетнестэ, колмо иень перть, царень ушмантнэнь каршо тюрицятнень лангсо прявтонтень?
Пултызь.
Мезе тейсь «святой Русесь» Алексеень Кузьма марто?
Ильтизе Сибирев.
Мезе тейсть Елушев Пошат марто?
[307] Повизь...
Мезе тейсть Рябов профессоронть марто 1938-це иестэ?
Ледизь...
Вана мезе питнезэ вечкеманть.
* * *
Боляень, Эрзямасонь Олёнань, Несмеянонь мельга мольсть тёжат. Ветийтне, кода «тёжатнеяк», кемсть: идесызь нельгемадо-нарьгамодо вечкевикс Масторост, келест, ванстсызь Инешкипазнэнь-Верепазнэнь озномань коест, Сонензэ Кемеманть, мазыйдеяк мазый покшчитнень, койтнень-кирдатнень. Цартне-императортнэ пултасть, чавность, повсесть, леднесть... васняяк, олячинь кис аштицятнень прявтост. Ловсь сынст «поганоекс», «ворокс», «антихристэкс», «раськень ятокс».
Эрзятне, мекевланг, сынст, «вортнэнь» ды «поганойтнень» ловсть Ине ломанекс, кемсть тенст, вансть мелест, вечксть, кунсолость ды мольсть мельгаст. Истя ульнесь сестэ, Олёнань ды Несмеянонь пингетнестэ.
Ней?
Раськесь, эрзятне эсь откерест-героест, превей, апелиця ломанест а содасызь, мелесткак арась содамс, сынтемест нациясь — а нация. Ней мельганок — чаво пакся. Вельксканзо ливтнить тонол раужо варакат. Ливтнить кулома лангсо раськенть велькска, ванныть козонь валгомс пекест пештямо. Сынст «ка-ар, ка-а-рост» разди-ангори седей.