Эрязденть арсезь (2010)/Паряк, иетне чумот?..

by Нуянь Видяз

[100]

Паряк, иетне чумот?..

Исяк чикуншкадо мейле ютась сэтьме, талайс молиця, пезеря-пезеря, теке човине сувтемень пачк нолдавиця, пиземе. Орданьбуень паксятнень симдинзе топодемазост. Течинь чис тия-тува лушминетнева кончтнить чипаентень ведь сельмтне. Кизэнь пиземесь аволь сёксень, варшты чипаесь, ды курок сорксты. Ардоват, вант, уш аволь ансяк крандазсо, машинасояк.

Каршо чистэнть, пизементь самодонзо икеле, мурдась кодамо-бути ошсто Игань Ваня. Войнанть цёрась ютызе руль экшсэ, усксесь ушмант, снарядт, пушкат... Нейгак, кучнизь та-ков машина мельга, пансь од «полуторка». Игатне эрить эйстэнек ушкс. Ансяк неия кудост икеле од машинанть, чиинь ванномонзо. Кабиназо пурназь чувтонь рейкасто, вельксэзэ брезентэнь. Прясто пильгс артозь чопода-пиже тюссо. Мелезэнь тусть фаранзо: валдомтыть, марявсь тень, зярыя вайгельпень ютко. Паро машинась!..

...Минь, цёракайтне, налксетяно Пичепесэ, Сеськень икеле, кракласо, лиякс, чушкасо. Таркась сэрейне, неень пизементень эзь лопавтеве, налксемс ён. Тапсетяно, понгиндерят мандосот, буенть ланга эрьва кода вачказь «ошкентень», «пушкатнень», «лисьматнень»... Чийнетяно, аравтнетяно, бахаетяно мандотнесэ, пачколетяно пеяькстамоскак.

Апак учо Сеськень вальмалов лоткась сталмонь усксиця машина. Кинь — содыя сеске. Ветицясь зэрьсэ пекстызе мельганзо кенкшенть ды капшазь ютась Сеськенень. Тевть, неявсь, кодат-бути яксевтсь.

Теке мандоткак эзинек ёртне, эзинек чнйнсяк. Стувтынек весементь. Ношкстынек «полуторканть» ваксс. Чаратано-велятано перьканзо, ваннотано, полгарьгавтнетяно сельмть. Никсетяно машинастонть лисиця-молиця судос эциця тантей чиненть. Ламарень кошттояк тантей, лиянь вакскак а путсак. Арво тикшень? Куконь эрьгень? Верьгизэнь лейксэнь? А-а! Кодамояк чине ёнов а моли. Эсензэ. Машинань... Никсят никсевлить! Секень вант, чаракадат те тансггенть.

«Лишмесь» эль кенерсь сыргамо, минь, теке обезьган-левкст, кивчк меремас пальдштек удало бортонть чирес ды празь прынек кузовантень. Ардтано... Ды ардовлинек, ансяк Ваня лелянок руленть экшсэ эзь удо. Тарск лоткавтызе машинанть ды кирнявтсь кабинастонзо. Кедьсэнзэ солдатонь [101] келей кшнанькаркс. Минь лодор-ладор кирнявтнинек алов ды прянь-полдань синдезь ношкстынек кие ков. Ялатеке кой-кинень эйстэнек понгсь.

— У-у, коське лейс ваявлиде! — мокшнасонзо тандавтнезь, серьгедсь пансицянок, кирнявтсь кабиназонзо ды тоцк озась тарказонзо.

Ансяк сыргиксэль, эйстэнек весемеде набойтне, кить седе маласольть, одс поводевсть кузовантень. Мезе теят, савсь Ваня лелянтень одс лисемс карксонть марто. Ардтневтемс машинасонзо эйкакшт сонзэ мелезэ, марявсь, арасель. Паряк, капшась, эли кайксозо-ёжозо берянель. Эрязкалезь озась, лепштизе эрявикс педаленть. Машинась машнетезь паркстась, лекстясь сэнь тусто качамосо ды оргодсь пупиця «кирмалавтнеде».

Тусь Алопе ёнов. Кадымизь. Ванынек мельганзо мелень колазь. Кадовсь ансяк чинезэ. Тантей-тантей.

 

*  *  *

Саранонь автовокзал. Икелень берякшке, ожола чама, мандо лангс нежедезь атине. Вастневинь мартонзо ветешка-котошка иеде икеле. Ульнесь шумбра, эряза, мизолдозь кортниця цёракс, ней вана... «Монень ней весемесь ялатеке...» — кортась вановтозо.

Вакссонзо аштесь ёнонзо вельть молиця, мондень колмошка иеде седе од тейтерезэ, Рая, Игань Рая.

— Те ков истя тетят-тейтерть сыргиде? — пшкадинь лангозост ванозь.

— Ды вана эстень саян эйсэнзэ, — маринь Раянь пельде, — тесэ а кинень мельганзо якамс.

— Кодат тевтне, Ваня леляй? — кортамонь поладомга пшкадинь.

— Кодат уш тевть, — нусманясто, эль марямга ды безардезь мерсь каршон, — тонсь неят.

... Эрямонь леесь лотксема а соды. Чуди, чуди... Эзь кемевеяк: икелень се допрок од, войнасто ансяк сазь ломанесь, пиже шкастонок кшнанькаркссо тонавтыцянок, се, кона казекшнесь тенек машинасонзо тантей-тантей, ламарь кошттояк тантей чине. Казекшнесь... Ней вана... Ушодкс ды пе. Козоньгак теде прят а нерьгстасак.

Мезе лиссь, кодамо тувталдо, мекс ней машинань качамо чинеденть седеем човоряты? Мекс марявкшнось тенек сестэ истямо вечкевиксэкс ды тантеекс? Мекс истя полавтовсь? Бензинэнть, паряк, мезе мартояк човорить? Эли, паряк, иетне судонть лиякстомтызь? Содык азё...