Эрязденть арсезь (2010)/Вишкапингень покш кеняркст
[98]
| Вишкапингень покш кеняркст |
«КОММУНАРОСЬ» — те комбайна. Ускси эйсэнзэ кшнинь «айгор». Сень лемезэ — «СТЗ». Резинадо, синтетикадо-мезде ледстнемскак а мезть. Сонзэ эйсэ ансяк кшни. Мик трактористэнь лапужа, покш вакан ёнов молиця озамо таркаськак кшнинь. А уш чаросонзо пейтне! Варинеть модантень кадныть. Сеске невтьсы ков якась те самай «СТЗ»-сь. Чаротне комбайнанть сыргавтомсто ялатеке васня чаразевить ве таркасо ды ансяк мейле сыргить, комбайнась ды ускицязо, таркастост.
«СТЗ»-тнесэ важодицятнестэ седе ламотне тейтерть. Аволь важодить — сельведть валыть. Васня «айгорось» кодаяк а нолдави. Сень кис нолдамо недентень сюлмить пикс, сонзэ вельде лиясто нилешканест чаравтыть неденть. Оймень лисемс ноцковтнить-усксить. Окойники каяты «пых-пых-пых-пых». ды почкостонть-трубастонть кувтань-кувтань, чоблань-чоблань кепети сэнь качамо.
Сокить тейтертне ветькак. Икелест эскели ломань, кедьсэнзэ фонарь. Сон улияк сокицянть туртов «сельмекс», Сёксень чопода ве, «кшнинь вакансо» аштицянтень латокс — менелесь. Якшамо. «Идемевсь поревлизе те Гитлерэнть!» — икелензэ типельдиця толонть мельга ванномсто сакшныть тракторонть ветицянзо превс эрдекстамонь валтнэ. Стакалгадыть сельмекертне — таго ледстясы Гитлерэнь. Ванат, сюдомадонть мейле седе шождалгады ёжось, удомадо мелесь аламошкас айги ве ёнов.
Эрьва чистэ вензэ лангс эряви эцемс тракторонть алов, ды, кунст мадезь, панжомс алкс очконзо-картерэнзэ, косо оесь, ды кемекстамс шатунонь лавшомозь гайкатнень. Тетевснтьтеемадо мейлетейтертне вейкест-вейкест а содыть — ойденть чамаст цитнить, раужот. Сынсь пеедькшнить. Одксчи... Кодамо казямо илязо уле эрямось, сонзэ коензэ эсензэ.
Монгак чаран-велян «Коммунаронь» «прявтпгэнь» перька. Мель путан мейсэяк савтомс тенст: макснян муюк! 1р, болтт, ключ. Кандан турвань начтомс кельме ведь кечине... Окойники сехте покшонть, Оксянь Сёмань, седеезэ эзь кирде, лазовсь. Аволь кевень сон. «Кузть, цёра!» — кончтась тень керш сельмсэнзэ. Кеняркстонть мон комбайнань кузтемаванть ливтязь ливтинь верев, стинь штурвалонть экшс. Покш мелем ветямс, ансяк теде. ожо нерь нармунне, иля арсеяк. Те таркась сонзэ, Оксянь Сёмань, комбайнёронть. Секскак псакакс кузинь сюродо псльспешксе бункерэнтень.
[99] Урнозевсь усксиця тракторось, паркстась «Коммунаронть» моторозо, ды урныця-увныця комбайнанок сырнекс кувтолдыця океансо иневенчекс састо сыргась икелев. Бункерэнть велькссэ почкостонть чудикерькскекс тусь чудеме товзюро. Венстинь кедень чудикерьксэнть алов, теке пиземень байгеть кундсян. Мейле уставинь теевиця оровткенть витнеме. Судозон эцить эрьва кодат чинеть: кизэнь, кшнинь, нартемксэнь, машинань... Оровткем ланга бизмолдыть пакся цирькунт, кендялт, сукскеть, сюронть марто понгонить тикше видьметь, олго петь, сюват.
Кепедия прям. Перькан паксят, комбайнасонок нуезь таркатнева ожолдыть олгонь штеметь. Вить ёно ашти ойсэ-солидолсо ваднезь оршамосонзо Сёма лелям. Сон ваны алов, кепси-валгстни рульсэнзэ машинань васоньпеельтнень: нуезэ-наразо седе алга ды ваньксстэ. Цёрась, мерят, аволь комбайна вети — паксянь корабля. Паро, пек паро! Аволь ардан — иневедьга уян.
...Тракторось урны кшнинь верьгизэкс. Мельганзо кадови велявтозь-соказь раужо, чинть каршо летькеденть цитниця модань леха. Ливтнить-валгонить лангозонзо модадонтькак раужо варакат. Кочкить сукст. Пря трить.
Аштян озадо кшнинь валаня киякссонть, трактористэнть вакссо. Стядо, чаронь сёлмонть эйс нежедезь, а мереви: сыргамсто илязан пра-ливтя усковикс плугонть алов. Урнома, зэрть, качамо, оень чине, мельганок челькень сув... Вадря! Мельспародонть седеем либордозь либорды.
* * *
«Овсе, овсе аламо эряви марямс эсь прят кеняркссо-чанстьсэ эрицякс, уцяскавокс улемантень, — арсезеван лиясто. — Вадяшамс нуиця-пивсыця комбайнасо ардомсто сюронь оровткенть, марямс чинть анелькай лембензэ, ардомс, кадык ломанень молемадояк седе састо, тракторсо-мейсэ, неемс эйкакшонь мизолдыця сельмть... Эно мекс эзинек тонадо кенярксовсто эрямо, зярдо сонсь эрямось — кенярксонь иневедь?! Эно мекс ютксонок зняро ацирьгалемат, сёвномат, кежть?!. Ансяк вана, авольть улеяк сынь, аволь уле кенярксонь иневедеськак. Аволь уле раужось, кияк аволизе нее ашонть. Кой. Эрямонь кой. Иля снартне эйстэнзэ эцемс каськас эли мацтс!»