Эрязденть арсезь (2010)/А янксян
[334]
| А янксян |
Эрямосонть ламось мезесь куломазот а чарькодеви. Истя човорязь ды кикендязь сонзэ сурензэ, куроксто — вешнят-вешнят — эрявикс пе а муят.
Вете иень перть «поринь» паксянь койтнеде книгатнень, [335] пештинь содамочинь паргом. Теевинь теде, те «поремадонть», ды превей профессортнэнь кунсоломадост, библиотекатнеде агрономокс. Мик, кода сёрмадозь дипломсом, «учёноекс». Ульнинь истямокс, паксянь азорокс, коензэ ванстыцякс, кото иеть. Мейле — колоньгемень малава иеть агрономонь тонавтыця. Эзинь кадно, лиси, велень тевтнень.
«Вельхозникекс» улемстэнь алкуксонь паксятнеде, пертьпелькстнэде башка эрясть превсэнь ды ёжосон литературансетнеяк. Сокамонь-видемань, нуемань-пивсэмань мелявкстнэ мольсть ве киява валонь оровтсто «якстере» валонь вешнеманть марто. «Тонеть, атя-шержейчи, эряволь онкстямс келень факультет, улемс филологокс», — аволь весть мернесть тень — кува пеедькшнезь, кува аволь — монь кондят пор почтсо почодозь пря профессортнэ-келень содыйтне.
Кода меремс...
Кой-мезе ды мезде сёрмадомань ды кортамонь тевтнесэ кармавлинь содамо, а мезть кавтолдомс, седе ламо ды домкасто: кода видестэ сёрмадомс «стака» валтнэнь, путнемс ютковаст нерьгстневиця тешкстнэнь, кодат улить валрисьметь, кель-валонь пелькст, сюлмавкст, валъюртт... Те паро. Диссертациянь идемадо мейле кармавлинь, койсэнь, ветямо кодамояк куроды, те котомканть кандтнезь, якамодо лоткамозон трявлинь пря. «Томбавлинь» ды «томбавлинь» текетнень иестэ иес аволь пешксе пря тонавтницятненень. Мезе берянесь, филологокс улемстэнь, пелян, тонадовлинь рузонь синтаксисэнть коензэ коряс валтнэнь ды валрисьметнень аравтнеме, тонадовлинь сёрмадомань-кортамонь келезэнь канзёрдыця «штобутнень», «штотнень», «бутнень», «наматнень», «бутитнень», «итнень», «эдтнень», «нотнень» ды рузокс мельцек-мельцек понгавтнезь кувака-стака валрисьметнень совавтнеме. Нейгак ацирьгалян: ловномсто «штобус» эртевемстэ анокан книганть вырновтомс седе васов. А ёвтавияк, кода колыть неть «наматне»-«бутне» эрзянь келенть кодавксонзо ды гайгичинзэ! Синтаксистэнть башка, секень вант, кармавлинь мерькамо эрзянь келенть Тюгаень «булотнесэ» ды «говтнесэ».
Лиссь Есенинэнь «алга уйкшниця», васов неиця валмеревксэнзэ коряс: «Покшонть несак ансяк васолдо ванозь». Катстак-шнымизь колдунтнэ-еретниктне чачома кельдень! Одс сонзэ неия-мария ве ёндо, дипломсо апак кола, ванькс вановтсо, [336] мария сонзэ чольниця, лия ёнов а молиця вайгелензэ, тантей чинензэ, неия валдо чаманзо. Секс а янксян, мекс эзинь прядо филологиянь факультет. Видс теяк: куш прясот меельце череть раздек, ютазенть омбоцеде а ютасак. Кода лиссь — истя лиссь.
Тедеяк а стувтнема. Пушкинэнь-Толстоень пингстэ сёрмадеень школат-институт арасельть. Ней ули истямо. «Имени Горького» лемезэ. Московсо. Те паро. Ялатеке, эйзэнзэ куш кемень иеть якак палкинеть марто, сёрмадомо, Инешкипазось а максындеряй теть «пазонь тешкске», а тонадат. Те — аксиома. Тонавтыцятнеде «Тешкстыцядонть» башка, колмо: ванькс, лиясто пелезеват мик, Конёв лопась, эзганзо чийниця Кедьёнкскесь ды лангсост покшось — Эрямось. Сындест башка, валсо рисовиця, тонавтыцят теть вешнемс а мезть, а муят. Лермонтов ды Толстой ульнесть ушмодейть, Айтматов Чингиз — зоотехник, Шукшин Василий — актёр, Пришвин Михаил — ... агроном. Натой Германиясо, аволь косояк, важодсь ламонь таркава содавикс содадей марто лабораториясо. Аволь тонавтнеяк истямокс, истя эрьва ёндо, истя домкасто арсезь пертьпелькссэнть молиця тевтнеде зярдояк, кеман, аволь сёрмадо. Малав текеть, мерема, уцяскаст эрзянь сёрмадейтненьгак. «Лавгиновонь» «тетязо», Коломасов Василий, — школань тонавтыця, Куторкин Андрей — «совпартроботник», Абрамов Кузьма, Калинкин Иван... — прядсть пединститут. Кулдуркаев Яков, кона «Эрьмезензэ» кис кемгавксово иеть андсь сийть тюрьмасо, ульнесь бухгалтер, Журавлёв Числав — физкультурань тонавтыця, бортрадист. Секскак якстерьгалемадо агрономонь канстодон, а арсянгак, ильведьксэкс сонзэ кандоманть а лован. Тевесь аволь прядозь класстнэсэ ды курстнэсэ. Шолохов Михаил, маряка, школав кинтькак эзизе нейне. Марковнаяк, Сима патянок, яксесь тов ансяк вете иеть.