Эрязденть арсезь (2010)/"Ёртык!... Ёртовиндеряй"
[336]
| «Ёртык!... Ёртовиндеряй» |
Кода прям эзия оймавтне, кавтолдоматне — эсень-аволь тев теян? — содавтнесть эйсэнь аволь чуросто. Литературась, книгась — те Менеленть пельде Казевкст, те — Пришвин, Пушкин. Есенин, Толстой, Мопассан, Гюго, Тагор... Те — Коломасов, Кулдуркаев. Радаев, Куторкин. Абрамов. Люлякина. Арапов, Рябова... Сынст видьс малавгадома кись, кода Модастонть [337] Ковонтень, — кувака. А ютави, куш колмо эрямопингеть эскеляк. Секскак та-кода аёнсто, кельмесэ чавозекс марян прям «сёрмадей» монень пшкадемстэ, те валонть марямсто. Прок кодамояк чумочи теинь.
Ялатеке эрязенть эйстэ эрьва иесь максы эсензэ питне, эсензэкс неи перьканзо эвтиця, содавикс ломантнень, вирень-паксянь таркатнень, эрямонть. Орданьбуесэ, нуласо-валасо школав чийнема шкастон, ды мейлеяк, «покштояк покш» ломанекс марявкшнось тень Сёкань Яков. Вестькак сонзэ эзия некшне, сень кис содылинь, сон — пол-ков-ник! Каня ули седе покш чин Мода-масторсонть? Весе велесь, мерема, шнась пря тень эйсэ. Кода эно! Оно кодамо ломань лиссь эйстэнек! Полковник. .. Гроха Вася, содылинь, — дипломат, важоди Берлинсэ. Сонзэяк веленек ловинек «инекс», сонгак неявсь тенек валдо тештекс валскень менельсэнть.
...Ветеце класс. Эйстэнек «Кезэрень пингень историянь» ды лия предметэнь уроктнесэ аштетяно кеветеешканек. Прядовсь войнась. Тонавтницятнеде — аволь ламоненек. Нупальсэнть аволь кизэнь лембе. Аволь тундоньгак. Чернилатне кельмить. Сави кедьгинетнень кирдемс коморо потсо. Секскак вечкевикс урококс тенек ульнесь ютко шкась. Чийнилинек, азаргадынек, элякалинек пень апак сода. Эрявсь эжнемс ды таштамс куш зярыя лембе сы уроконтень.
Моли эрзянь келень (Паряк, литературань. Эзть ванстово удемень менчевкстнэсэ.) урок.
Ператне чикордыть, |
— апак учо гайгезевсть превсэнь валтнэ, айгизь тонавтыцянть вайгелензэяк. Сынь, ёвтазь мельтне, эзть ёма, эзть паневе лиятненень, ванстовсть превсэнь чокшнес. Урокон экшс ойсинь тевенек прядомадо мейле (ульнинь те шкастонть «вень прявтокс» — колхозонь конторасо ваньксчинь кирдицякс).
Муинь ве ёндо сёрмалезь конёвпанкс. Саинь ручка ды пединь «ператнес». Байтяк котьминь. Уроконгак стувтынь. Кода илязо уле, удома шказон «ператнеде» «стихем» ульнесь анок. Омбоце чистэнть, одс ванномадонзо мейле, сон «тусь» кодамо-бути редакцияв. Истя чачокшнось ды истя... кулокшноськак шкинемань псим.
Ютасть ковт, пешксе керькс иеть. Прядынь аволь аламо [338] класст, институт-мезть, ютасть «ператнеде» мейле ниленьгемень иеть ды... Арась, арась, давол, сёрмадомань давол, эзь кепете. Састо, монськак эзия редя, ручкам та-кода сонсь кармась совамо валонь оровтонтень, кочксеме, теке нармунь сырнень човалят, седе гайгицятнень. Сась тень ёжо аравтнемс сынст таркаваст, мазыйстэ, мелень ёвтазь, ладсемс гайтест марязь. Эскельдявинь те яннэнть лангс ды пачкодинь «ператнес» кавто тувталонь кувалма.
Умок-умок, 17-це пингень васень пельксстэ, Эрзянь Масторонть моданзо совавтозельть, кадык аволь весе, рузонь Масторонтень. Кепедезельть чилисема-чикуншка чиреванзо модасто вачказь сэрей-келей пирявкст — валт. Колмосядто ламо иень перть сынь тустосто вельтявсть вирьсэ-тикшесэ. Весть, валонть ланга молемстэ редия: пелевеёнганзо кассть веенст тикшеть, чипелькс ёнга — лият, лембень седе вечкицят. Эзь юта вановтом вакска минек ёнкстнэсэ чуросто вастневиця вирявань черть — ковыль тикшеськак. Мелезэнь туекшнесть кувака, вармань эрьва лекстявксто пыхаиця, чипаенть каршо цивтордыця толганзо. Празь прынь сёрмадомо умонь шкатнеде, те шкас ванстовикс сэрей-келей модань пирявкстонть, пиже вельксстэнзэ. Кие кармавтымим? Мекс пединь те тевентень мон, велень хозяйствань тевтнес тонавтыцясь? А содан.
Омбоце лисевкс.
Эскелян кудов, Орданьбуев, куш кудом талай уш рангиця-капшиця, киньгак а кунсолыця Саран ошось. Кадовсь удалов Сёвонь пандось. Эрявсь ютамс лейненть трокс каязь сэдьганть. Содавтымим мель: экшендявтомс сельведте ванькс ведьсэнзэ чамам, кедень. Валгинь латконть потмаксс. Ландинь ды венстия венчкекс теезь вить кедь комором... Венстия ды сеске ноцковтыя мекев — веденть чамаванзо чаразь-велязь чудсь-уйсь якстере-сэнь, пиже-ожо минерал оень келькш! Потстон лиссь кувака, серьгедькс ёнов молиця вайкс! Видемтия рунгом. «Кие, кодамо альгач истя нарьги эйдекс кулдордыцянть лангсо?! Мезень чумозо? Мекс эзь муеве кардыця?» — кевкстнесь ацирьгадозь седеем.
Кизэнь маней се чись, Сёвонь лейненть марто се вастомась кадсть мештезэнь мейсэяк асаевиця тешкс. Сынь педязь педявтымизь, озавтымизь столенть-стуворонть экшс, комавтызь прям икелень аштиця ашо конёв лопанть вельксс.
Вана васень чалгавксон Сёрмадомань Масторонть пелев, козонь, кода тень маряви, педе-пес пачкодемс эзь саво.
[339] Те ульнесь ютазь пингень 80-це иетнестэ, велень хозяйствань факультетсэ тонавтыцякс улема шкастон. «Андынь» сёрмадовкссон Мордовиянь ламо газетатнень, пачколинь буенсетнескак. Теман: велень хозяйства, экология, ёвтнеминеть вишка пингстэ саезь перькан сравтневезь паксятнеде-виртнеде, сынст мазычидест, эйсэст гайгиця музыкадонть. Ушодокшнынь — ней тень визькс — рузокс.
Телешка якинь тонавтнеме «Пегас» литературань вейсэндявксонтень. Ламо-мезе лезэв саекшнынь. Тесэ васенцеде вастовинь Арапов Саша поэтэнть марто. Сон превс путымим (ды Есенин Сергей!) — сёрмадомс эрзянь кельсэ. Сеске, ней янксян, эзия кунсоло. «Память о Михалыче» васень-васень, пелькинешка ёвтнеминем лисекшнесь ютазь пингень кавксоньгеменце иетнень ушодовомсто. Марявсь, ожан потсо лыхаить аволь кедть — сёлмот. Седеяк сынь келемсть ды виевгадсть «В гости Берендею» ёвтнемань цикланть лисемадо мейле...
...Сёрмадан газетатнес, журналтнэс, тей-тов, монсь кавтолдан-янксян: паряк, стяко шка ёмавтнян, паряк, конёвтнень велькссэ нувсематне киненьгак а эрявитькак? Мезе теемс? Кинь кевкстемс?
«Вай, а мекс а пшкадемс «Пургазонь», «Олячинть кис», «Велень тейтерь» романтнэнь сёрмадыцяст туртов, — апак учо совась «кирькс кудозон» мелесь, — Кузьма Григорьевичень? Эри эйстэнь аволь васоло... Лисемадо икеле гайневтинь сонензэ.
...Кудосонть ськамонзо.
— Совак, совак, — мария, ансяк панжизе кенкшенть, содавикс, пилес а эциця сэтьме вайгелензэ. Каршон аштесь аволь сэрей, аламнеде мендявозь рунго уш талай аволь од ломань. «Каня истямокс эйкакшпингстэнь васенцеде тонь некшнитинь?» — кивчк ютась пряван ледстнемась. Умок те ульнесь. Курок войнанть прядомадонзо мейле. Сэрей, виде рунго, раужо черь цёра. Сакшность мекс-бути Орданьбуев. Мон, предэсь кармавтокшнымим, ветякшныя удома таркав.
— Шумбрат, Кузьма Григорич, — меринь каршо.
— Адя кайсек, — невтизе тулонть — понгавтомс шапкан-мезень. Кайсинь, Юкснинь котан, ды тердимим кабинетэзэнзэ. — Вана тесэ монь мастором. Тесэ котьман.
Каятотсь вановтом икелев столесь-стуворось, сёрмадозь ды ванькс конёвонь сэрей кувтатне, энциклопедиядо ды лия книгадо пешксе лавсятне. «Вана тесэ одс чачсь Пургаз, тесэ кассь ды тусь яксеме Масторганзо, ламо лия таркатнева», — арсезевинь.
[340] Озамс эзь мере. Тердимим кухняв.
— Тесэ седе ён ули калякамо. Истя? Озак. Вана-вана тезэнь.
— Вант тонсь, Кузьма Григорич.
— Мезде ней тонь, цёра, каванямс? А? — муст-муст мизолдозь ютавтызе вановтонзо моньстэнь кельменькаенть пелев.
— Мезеяк а эряви.
— Истя эрзят а тейнить, — неть валтнэнь ёвтазь, эскельдясь кельменькаенть малас, панжизе ды таргась колмо литрань банка салтозь капстат. Каясь зяро-бути эйстэст пенчсэ ваканс, нуртясь пенч-омбоце чинжарамо ойне. Човоринзе. Банканть путызе тарказонзо. Керсесь кши.
— Зяро мелявкст Теть теинь, — меринь чумонь марязь.
— Истя, цёра, иля корта! — кардымим ды таго «эцесь» кельмень кирдий «паргонтень». — Сонтемензэ, пелян, кортамо а лиси, — пеедькшнезь мерсь ды тоц путсь «ашокаень» сулика. Таргась цяркат. Озась каршон. «Пурдызе» «ашакаенть» прянзо ды пештинзе цяркатнень. Глянкадинек ды начтынек кургонок тол пси ведьсэнть.
А уш капстатне, капстатне цяркадонть мейле... Сятор, сятор...
— Аволь тонсь салтыть? — пшкадинь, эзинь кирдеве. — Вельть тантейть!
— Нись, нись тень кувалма дока.
— Тантейть. Сюкпря тензэ пельдень ёвтак. ...Мон, вана мезть якан-пакан, Кузьма Григорьевич.
— А содан. Ёвтак, — варштась сельмезэнь.
— Конёвт ламо ютавтан... Сёрмадан, сёрмадан... Меельце шкастонть натой ёвтнеминес пачкодинь. Теке сюкорнэть панян. Монсь... кавтолдан. Паряк, те тевесь дух аволь моньгак? Паряк, весе тень ёртома превстэнь? Шукшпрятне текень учить.
Ансяк прядынь янксемань валон, Абрамов теке валсонть лакшт тень пряланга.
— Ёртык! — эль эзь серьгеде. Аламос чатьмонезь поладызе седе сэтьместэ: — Ёртовиндеряй!
— Варчаса, — арсезевезь, ускозь таргия валонть.
— Варчик, — таго ёвтызе валом сёрмадеесь ды пештинзе цяркатнень.
— Мезе, инже, омбонькирда?
— Арась, — наравтыя прям ды айгия кедьгенть.
— Я! Те кода истя!
— Арась-арась, Кузьма Григорьевич, саты.
[341] ...Сынь кудов. Кайсинь-теинь ды сеске ютынь, теке мерят оргоди превсэнь кирдевксэсь, конёвдо пешксе стуворонть-столенть экшс. Весемеде стувтозь, автордыя ручканть-кедьгиненть ды кундынь сёрмадомо кудов самсто неезь лекшесэ, теке педе-пес ашо шальсэ копачазь килейденть, ёвтнемине.
* * *
2009-це ие. Ацамков.
Лиссть книган: «Сиреневая луна» (1989), «Велень вайгельть» (1992), «Сырнень човалят» (1995), «Иень тюст» (2003), «Янгамо» (2006), «Эрзянь Масторонь седейсэ. Имена их бессмертны» (2007), «Где цветет чистодуш?» (2009). Витнян-петнян, анокстан «Эрязденть арсезь» ёвтнемань пусмом. Учи эсь шканзо «Ванине» сёрмадовксом.
2009-це иестэ Эстониянь Малавикс раськень литературань Конкурссонть прозань номинациясонть «Янгамо» книгантень жюрись макссь васень тарка. Сонзэ авторонстэнь казне — 55 тёжат целковойть. Сюкпря тенк, эстэнь оят-ялгат, сюкпря, мельвановикс Арво Валтон!
... «Чикордыця перан» оймсесть, эзть чикордо колоньгемень иеде ламо. Кувать. Вийть, бешоконь, таштасть. Лиси, ламо-аламо — таштасть. Ды кундасть, сась шка, видеме конёвонь лопатнень ланга.
Арась, Кузьма Григорич, эзь лисе валот коряс.