Эрязденть арсезь (2010)/Вана мезде тошкси тень седеем
[331]
| Вана мезде тошкси тень седеем |
Пачколинь аштемковонь вейке маней чистэ чачома велев. Рая патянь ды Вера сазоронь марто якинек калмолангов авань лемензэ кундамо. Пурнавкшнось, марявсь тень, калмазырьс весе велесь. Машинатненень эзь сато тарка. Те, ансяк те ливамонь илась, эрзянь илась, ванстовсь течинь чис.
Ютынек калмотнень юткова менчевиця яннэванть авань «удома» тарказонзо. Рая патям путынзе калмонь марнэнть лангс ознома палтнэнь — алт, пряка, цяплынесэ медь... Зярсыя патят-ялакст аштинек стядо, чатьмонезь. Вельмесь икелень авань чачозо, мелявкссто пешксе, сизезь вановтозо. Зяро сон, пиштяка, апак удо веть ютавтсь, зяро карязт яжась, майсесь минек трямга-кастомга?
Ледсь мелезэнь кезэрень озномань коесь. Кепединь-венстинь кедень чилисема ёнов ды ёвтынь покштянь покштянок пелев [332] пачкодиця, сыненст пшкадемань валтнэнь:
Покштянь покш покштинеть, |
кундатотсь келем. Талакадынь. Ойминь ды поладынь валон:
— Сак, авай, ваксозонок, |
Сюконинек колмонек матразь марнэнтень, лисинек кшнинь пирявксонть потсто ды сыргинек теке янганть кудов.
...Весе тынь минек верьсэ, |
молемстэ яла сакшность мелезэнь истят домка валтнэ.
Омбоце чинь валскестэнть молинь «гаражов». Вастовинь, зярс чинь тевс эзть кунда ды зярс мольсь «кооперативень», кода лемдизь колхозонть, «нарядось», кузтемпень эземсэнть озадо аштиця, таргиця цёратнень марто. Кой-кинь содасынь, кой-кинь... Озынь юткозост. Ушодовсь кортамось модадонть ды модань пайтнеде. Ледстия мейсэ тевесь: сынст, неть самай «пайтнень», эрявить цётамс, явомс келей паксятнестэ ды лиятнестэ, тешкстамс эсеть лемс. Тень теема шкастонзо. Ковт кадовсть. Тешкстамодо мейле тейть модат марто мезе мелеть — миик, казик, важодть (сокак-видть) тонсь, максык арендас. А тейсак тень шкастонзо, кадоват чавонь кедть. Ёвтыя эрьва гектаронть миемань питнензэяк.
«Мезекс сон миненек, — цяхазевсть цёратне, эль прядыя кортамом, — оно эйстэнзэ зяро. сайть зяро саеви, кандт, зяро кандови! Мейсэ кармат соксемензэ, коймесэ?..»
Таймазкадынь.
Теевсь визькс.
Те кода истя? Зяро ливезь, верь валозь, зяро «ойнат», революцият-мезть ульнесть моданть кис, ней — стякодо а эряви... Мезе теевсь мартот, эрзя? Мекс теть теяк превс а саеви ды мезеяк теть а эряви? Модань паенть питнезэ аволь комолянь сталмо, покш ярмакт. Сон карми тонь, мезе мелеть, сень тейть мартонзо, карми тонь, кода кудот-чить, кардазот, скалот, [333] пиресэ умарь чувтот, нешкеть... Тонеть, вантая, — ялатеке: а ярмакт, а сюпавчить теть а эрявить, а эряви, кода эрзя, валскень читькак. Мекс невтят эсь прят допрок превейтемекс, чаулакс? Пельдеть марязь валтнэ пицезь пицить седей.
Инешкипаз, ёвтык, косто саевсь те «ялатекень» ормась? Мекс истя шождалгадсть эрзятнень удем сормсевксэст? Кие эйзэст эцесь сюват, кодамо вий? Теде, мерема, кевкстнемс а мезть. Сисем пингень перть эйсэст шождалгавтсть. Содат-арась тон: модавтомо, сюпавчивтеме ды, келейстэ чарькодезь, превень сюпавчивтеме раськесь — а раське. Кода апак сока-виде, апак андо-симде а касы сюрось, истя раськеськак. Сы костояк васоло ёндо теине сельме сюпав, «ватола»-«крутой», рамсесынзе ченькс бутылкадо эли мендязь трёшникень питнеде мода-панкстнэнь-пайтнень ды чачома велеть, Орданьбуе, тееви урень эрямо таркакс. Те аламо. Од азорось уски тезэнь эсензэ кондят тюжа чама ломанть, мелензэ топавтыцят, ды Орданьбуенть ёмить сэнь сельме эрицянзояк. Кадови ансяк рузыявтозь «Ардатово» лемесь. Паряк, сонзэяк полавтсызь. Эли эйстэнзэ ледстнемакс кадовить ансяк географиянь ташто картатне. Истя ёми — ледстнемакскак а кадови — Эрзянь Мастором.
Вана мезес пачтимизь аволь ве пингень перть кочкаря ало, чоподасо, ды прянь нолдазь, эрямось. Вана мезде, мезень кувалма истя сэреди, истя киторды-ранги седеем.
Мезе теемс?
А ёвтасы Инешкипазоськак.
Вийть путан, теян мезе маштан — бажан таргамс эрзятнень домка ватола латкостонть — аволь аламо. Ансяк сынь а сатыть сеськень лепштямскак. Улевельтькак седе ламо «путы-цятнеде»... Содан, содан отьмантень ветиця вардодонть! Сон виевдеяк виев, покш, неяви сельмень конязьгак. А вана чарькодемс, чулгомс, истя шождынестэ редявиксэнть, эрзятнень эйстэ ламонень, а чулгови.
Пингестэ пингес, иестэ иес эрзянь сехте дошуз ды превей, виев, набой, чумора, тевень вечкиця цёратнень ильтнесть Тов. Ламо маштовсть, ёмсесть Эрзянь Масторонть кис тюремстэ Пургазонь пингстэ ды седе мейле Алабугань шкасто. Ламо одёр, креж цёрат прасть ды эзть стяво Казанень ванстомсто-саемстэ. Сон саезель 1552-це иестэ. Ушодовсть теде мейле Русенть-Россиянть каршо ды кисэнзэ тюрематне. Ливононь ламо [334] иень войнась, «смутной» шкатне... Верень пир шалнось Эрзянь Масторсонть 17-це пингень васенце ды омбоце пелькстнэстэ. Ансяк Эрзямассо, се шкастонть Россиянь прявт тюрьмасонть, икеле эрьва кода нарьгазь-поркснезь, куловтозельть кевейкее тёжадо ламо «бунтовщикть». 17-це пингенть полавтызе истямо жо якстере, верень чинесэ качадыця 18-цесь. Войнат, войнат, войнат... Тюремат туркатнень, французтнэнь, поляктнень, немецтнень, шведтнэнь марто, тюремат Кавказонь, чилисема ёнксонь раськетнень марто. Эрьвантень сайнесть покштянок ды сынст покштяст. «Лавшо понкст» тов эзть эряво. Сайнесть весемеде шумбратнень, весемеде нардевтнень. Васень таркасо пингетнень ютксо оймень сайниця 20-цесь. Репрессиятне ды «отечественноесь» яжавтсть весемеде ламо ойметь. Сындест икеле калмасть миллионт «империалистическоесь» ды «гражданскоесь». Сестэяк леень ведтне ульнесть аволь сэнть. Вана сон, келей-кувака, покштояк покш калмазыресь, косо астявтовиця удомасо удыть эрзянь виесь, ёрокчись, мелень раштыця видьметне. Кона ёндо учомс паронть истят калмазыртнеде мейле?
Седе ламот теде — Эрзянь Масторось Московтомо седе парсте эряволь — а содыть. Вейкесь, кирдевсь мельсэнь, валдон — раказевсь. Школась чатьмони, тонавтыцятнень кургост стазь эчке суресэ, чатьмонить газетатне, журналтнэ, радиось, экранось, а содыцякс пряст невтнить эрьва кодамо сэрень «начальниктне» ды «профессортнэ». Секс понгинекак терниця чинев чеядавксос, секс велень эрицятненень пайтне — кода сеянтень чипайденть чопода сельмукштне, секс валдос лисицят-молицят мельган эзть лыказеве. Кадовинь панжадо мештем марто ськамон. Кандомс, марямс, неемс, пансемс перькан сравтневезь седеень сэвиця апаронть а шождыне. Ков а варштан... Варштан удалов — удалон чаво, кандыловсо, вешкиця вармасо куловтозь пакся, мельган а эскели сулейтемгак. Варштан витев... Чаво-чаво, якшамо-якшамо ёнкст.