Эрзянь ёвкст (М. Е. Евсевьев, 1928)/13
ЮРТАЙ.
Эрясть-айшть атят-бабат кавонест. Ульнесь сынст ве цёраст, лемзэ Юртай. Цёрась чистэ мери тетянстэнь: тетянь, тонавтумак, тетяй, тонавтумак. Тетясь тонавтызе, мезес сонсь маштыль, а цёрастень яла аламо, яла тетянстэнь инялды: тонавтумак ды тонавтумак!
Весть тетясь кежиявць лангозонзо и мери: „Саевлессе хоть шайтян тонавтомс, — максовлея тензэ”.
Ансяк тетясь истя мерьсь, сась тензэ атине и мери: „Максык монень цёрат, мон тонавца! Тонавтумань кис иезэнзэ саян кецтэть ансяк сядо валкс. Иень ютазь мольть кисэнзэ. Мон невца тенть: содави тенть ялганзо ютксто, сайсак кудов, а содави — сядо валксот сайса, а цёрат катса омбоце иес тонавтлеме.”
Тетясь максызе цёранзо атястень.
Атясь саизе Юртаень и кармась эснэнзэ тонавтомо. Васня тонавтызе сякой ломанень кельс. Мейле тонавтызе скотинань и нармунень кельс.
Иень ютазь тетясь сайсь сядо валкс и мольсь атястень цёранзо кисэ.
Атянть тонавтницянзо ульнесть комсь вейксэ. Юртай колоньгеменцель. Сон теинзе весе сынст ве понасо кискинекс и нолдыньзе кардайс. Кискинетьне артлесть, артлесть кардазганть — лоткасть Юртаень тетянзо икелев.
Атясь мери тетястень: „Содык, кона тесэ тонть цёрат!”
[ 52 ]Юртаень тетясь вансь, вансь лангозост, невць крайстэ колмоценть ланкс и мери: „Вана, те монь цёрам!”
Атясь мери: „Аволь те, — сон нилецесь”.
Саинзе тетянть сядо валксонзо и мери: „Сак иень ютазь, — содави, а содави тенть”.
Иень ютазь Юртаень тетязо сайсь сядо валкс и таго мольсь атястень.
Атясь теинзе тонавтницятьнень карцинганкс и нолдынзе ливтлеме. Карцигатнэ ливтнесть, ливтнесть, кундасть вейте-вейте гулька, кандызь атястень и валксть весе ряц ве жерьдя ланкс.
Атясь мери Юртаень тетянстэнь: „Содык, кона тесэ тонть цёрат”.
Тетясь вансь, вансь лангозост, невць вить ёндо крайстэ омбоце карцигансть ланкс. Атясь мери: „Аволь се: тоньть цёрат керчь ёндо крайстэ омбоцесь”.
Атясь саизе тетянть сядо валксонзо и мери: „Сак иень ютазь, содави а содави тенть. Содави сайсак кудов, а содави пингезэнзэ сон монь ули”. Юртаень тетясь тусь кудов мелявтозь: цёразо а саеви атянть кецтэ.
Ютась колмоце иесь-как. Пурныньзе тетясь остаткат ярмаконзо и таго тусь атястень цёранзо кисэ.
Юртай колмо иес атядонтяк ламо кармась содамо. Сон лись атядонть салава тетянзо каршо и мери тензэ: „Ну, тетяй, нейгак а содавандеряй тенть — пингезэнь кадуван атянть кец. Сон ней тейсамизь минек ве понасо айгоркс и нолдасамизь кардайс артлеме. Артлитянок, артлитянок, весе ряц аратанок тонть икелеть. Мон аран керч кедь ёндо колмоцекс. Ванок иляк стувт!” Мерьсь цёрась и тусь тетянть ваксто.
Сась тетясь атястень.
Атясь теинзе весе тонавлицянзо ве понасо айгоркс и нолдызе кардайс. Айгортнэ артлесть, артлесть кардазганть, арасть весе ряц Юртаень тетянзо [ 53 ]икелев. Аштить весе, прок пезнавтозь: а пилесэст чаравтыть, а сельмсэст кончтыть.
Атясь мери Юртаень тетянстэнь: „Содык, кона тесэ тонть цёрат. Содасак — кудов мартот сайсак, а содави — пингезэнзэ монь кец кадови.”
Атясь куватьс эзь ванокак лангозост, невтьсь керч ёндо колмоце айгорсть ланкс и мери: „Вана, те монь цёрам”. И саизе цёранзо кудов.
Эрясть аламос кудосо, Юртай мери тетянстэнь: „Монь тонавтуман кисэ ламо ярмак, тетяй, ютавтыть, — ней мон панцынь тенть. Адя ливтимак базаров. Мон теян прян кискинекс и карман сякой зверень кунтлеме и тонть икелев кантлеме. Нейсамизь сюпавт, кармить эснэнь рамсеме. Максыть колмо сят, миимак. Ансяк кирьгастон кшнанть иляк макст, сень эстеть саик.”
Мольсть базаров. Юртай теизе прянзо кискинекс и кармась сякой зверень кунцеме, тетянзо икелев кантлеме. Неизь сонзэ сюпавт и мерить атястень: „Миик кискинеть”.
Тетясь мери: „Мийса!”
— Зняро вешат?
— Колмо сятт.
Максть тензэ колмо сятт и рамизь кискиненть. Тетясь саизе кискиненть кирьгасто кшнанть и тусь кудов.
Кискинесь кунцесь, кунцесь азоротненень зверть, — оргоць кудов.
Омбоце базарнэ Юртай мери тетянстэнь: „Мон ней теян прян карциганкс и карман сякой нармонень кунцеме. Нейсамизь сюпавт, кармить рамсеме эснэнь. Максыть колмо сятт валкс — миимак тенст. Ансяк иляк макст тенст пильгень перька тапарьдазь пиже суриненть, — сень эстеть саик.”
Юртай теизе прянзо карциганкс и кармась сякой нармунень кунтлеме, тетянзо икелев кантлеме. Неизь сюпавт, кармасть эснэнзэ рамсеме. Тетясь колмо [ 54 ]сятто миизе тенст, а пильгензэ перька тапардазь пиже суриненть саизе эстензэ и тусь кудов. Эзь пачкоть тетясь пеле ки ланкскак, цёрась ливтясь мельганзо, теевсь ломанькс и тусь мартонзо вейсэ.
Колмоце базарнэ таго тетят-цёрат базаров тусть. Киява мольместэ цёрась мери тетястень: „Мон тече теян прян айгоркс. Кармить эснэнь рамсеме — миимак колмо сятто, ансяк панцтом иляк макст. Макссакдеряй панцтом, мон мекев а саван тенть, — пингезэнь рамицясть кец кадуван.”
Састь базаров. Юртай теизе прянзо айгоркс и учить рамиця. Сась ваксозост атя и мери тетястень: „Мийсак айгорот?”
— Мийса, — мери атясь.
— Зняро вешат?
— Колмо сятт. Ансяк панцтозо а максса.
Атясь мери: „Миик панцнэк-мезьнек, — ниле сятт максан тенть”.
— Коть зняро макст, панцнэк-мезьнек а мийса.
— Вете сятт максан, ансяк миик.
— А мийса.
— Кото сятт — максан. Сисемь сятт!
Тетясь стувтыньзе цёранть валонзо: вейксэ сятто миизе айгоронзо атястень панцнэк-мезьнек.
Атясь, кодак рамизе айгорсть, озась лангозонзо ласте и тусь кудов. Ки ланксо айгорсь тувтыкскельсе ланкстонзо. Кармась артнеме. Артнесь, артнесь — эзь тувтовт тензэ. Састь кудов чов поцо кавонест.
Кудосо атясь сюлмизе айгорсть латалов, а сонсь маць оймсеме. Мадьместэ мери тейтеренстэнь: „Аламос аштезь симдик тон айгорсть и карц пекстык, ды ванок иляк меньцтя кецтэть, мон аламос мадян оймсеме.”
Маць атясь и матедевсь.
Тейтерьсь саизе айгорсть и тусь покш ведь ланкс симдемензэ. Айгорсь симсь, симсь, кармась панцт [ 55 ]ведьмесэнть тейтерьсть эснэ вец ускомо. Тейтерьсь тандаць и нолдызе кецтэнзэ панцт ведьместь. Айгорсь тусь вец и ёмась тейтерьсть сельмстэнзэ. Тейтерьсь аварьдезь тусь кудов.
Сыргойсь атясь и чийсь ведь лангостень; теизе прянзо щукакс и кармась Юртаень мельга панцеме. А Юртай теизе прянзо окунькс и ансяк щукась нильме сонзэ, сон стявцыньзе сялгонзо и а нилеви тензэ. Панцесь, панцесь атясь Юртай мельга, сизесь; лись вецтэнть и тусь кудов.
Чопонь пелев сась лей чирестень вец купецень тейтерь кавто ведра марто. Амольдизе ве ведранть, кармась амольдеме омбоценть. Марясазо — таго мезе кальцк мерьсь ведрасонть. Вачтась — ведра потмакснэнть сиянь суркс. Саизе сурксонть и вежаськезэнзэ тонгизе. Кудов самодо мейле таргизе сурксонть и вальма ланкс путызе, а сонсь маць удомо вальманть алов.
Веть, марясазо тейтерьсь, таго мезе кальцк мерьсь вальманть ланксо. Вачтась вальманть ланкс — сурксось арась. Вачтась пря пезэзэнзэ — пря песэнзэ ашти од цёра — истямо мазы, истямо мазы, кодамо сон знярдояк эзь некшне. Од цёрась мери тензэ: „Иля пель, тейтерь паро чи, — мон берянь тенть а теян. Вана мезе ансяк тенть кармавтан: мон мекев сурксокс велявтан. Валське, кода лисят тетять вакс лавкас, монь сурозот тонгумак. Лавказонк сы атя и карми сякой таваронь рамсеме. Нейсазо сон сурстот сурксонть и карми эснэнзэ рамсеме. Максы тенть сядо, максы кавто, тон сурксонть иляк мийть тензэ. Кода карми тетят эснэть сёвномо ды сюдомо — эшкик сурксонть мастор вакс. Сурксось ямксокс калады и масторонь келес срады. Атясь теи прянзо атякшокс и карми ямкснэсэ кочксеме. Ве ямкске тон чалгак пильгеть алов. Кода атякшось весе ямкснэнь кочксесынзе, сон чалги блидя крайс, тетьксыньзе сёлнонзо и карми морамо, тон пильгеть алдо ямксонть нолдык.” [ 56 ]Мерьсь цёрась истя и таго тусь сурксокс теевсь вальма ланкс.
Валське тейтерьсь тонгизе сурксонть сурозонзо и лись тетянзо марто лавкас. Сась лавкастень аля и кармась сякой таваронь рамсеме. Рамсесь, рамсесь, неизе купецень тейтерьсть вежаськестэ сиянь сурксонть и кармась эснэнзэ рамсеме. Каи кисэнзэ сядо валкст, кавто сятт — тейтерсь а мии эснэнзэ. Тетязо кармась тейтерьсть эснэ сёвномо, мейсь сон а мийсазо. Мейле кармась эснэнзэ сюдомо. Тейтерьсь саизе сурксонть ды мастор вакс эшкизе. Сурксось ямксокс калаць и кияксонь келес сраць. Атясь тейсь прянзо атякшокс и кармась ямкснэсэ кочксеме. Тейтерсь ве ямкске чалгась пильгензэ алов. Кода атякшось весе ямкснэнь кочксинзе, чалгась блидя крайс, тетькинзе сёлнонзо и кармась морамо. Тейтерьсь пильгалдонзо ямксонть нолдызе. Ямкскесь велявсь салдатокс, кецэнзэ пшти сабля. Кода салдатсь атякшонь цяпатьсазо кирьга ланга, — атякшонь пря ковия ёртовсь, а сонсь атякшось блидястень прась. Омбоце чистэ салдаць венчась купецень тейтерьсть марто и кармасть вейсэ эрямо.