Эрзянь ёвкст (М. Е. Евсевьев, 1928)/12
ШИВЕЦЬ, НЕЧИСТОЙ ДЫ ВИРЬ-АВА.
Эрясь-айшсь ве шивець. Берянстэ сусты — мерить тензэ: кедеть коськест, кода беряньстэ сустык!
Парьсте сусты, мерить: кедеть коськест, кода парьсте сустык! Кода-як тензэ а савтови.
Арьси шивець эсь пачканзо: „берянь эрямом, — кияк тень паро вал а ёвты! Беряньстэ сустан — кедеть коськест мерить; парьсте сустан — кедеть коськест мерить. Туян, ков сельмень неить, ков пилень марить.”
Саизе аршинэнзэ и тусь.
Ютась, ютась — пачкоць вирьс. Понксь карчозонзо овто и мери:
— Ков молят, шивець паро чи?
— Молян, ков сельмень неить, ков пилень марить: берянь эрямом, — кияк тень паро вал а ёвты: берянстэ сустан — кедеть коськест мерить, парьстеяк сустан — кедеть коськест мерить.
— Адя, моньгак саимак мартот, — монь-гак эрямом берянь, весе пеелить лангксон: ки содов ды а мазы или пек кежев — мерить тензэ овто. Кинь эйкакшозо аварьди — монь эйсэ тандавтлить: „иль аварьде — сы овто сэвдянзат!”
— Адя! — мери шивець.
Ютыть кавонест. Ютасть, ютасть — понксь карчозост нечистой и мери тенст:
— Ков мольдядо?
— Мольдянок, ков сельменек неить, ков пиленек марить: эрямонок тесэ берянь, — кияк паро вал тенек а ёвты.
— Саимизь моньгак, — мери нечистой, — моньгак эрямом берянь, — кияк эснэнь а вечки. Вейкест-вейкест эйсэ монь лемсэ сёвныть, — монь эйсэ тандавтлить — ва, мерить, нечистойсь пуватанзат!
— Адя, — овто марто шивецть мерить.
[ 47 ]Ютыть колмонест. Ютасть, ютасть — мусть кудыне. Совасть — кудынесть чаво. Кармасть эснэнзэ эрямо.
Эрясть, эрясть — мусть вирьстэ комулят и арцесть пиянь пидеме.
Шивець мери: „Пиянть пидитянок, ды солодонок арасть!”
Нечистой мери: „Сесэ, сесэ улить ведьгевть, эснэст апак крестак кадозь солод. Яжавтыця кияк арась — молян салан.”
Нечистой тусь и канць солод.
Шивець мери: „Суслань пидемс эряви корцяга — корцяганок арась”.
Нечистой мери: „Ве ава кудыкелев пуць апак крёста корцяга. Молян канца.”
Тусь — канць корцяга.
Пидизь сусланть, нолдамс тенст а мезес — арась очкост. Нечистой каньць тенст очко, каньць боцькаяк. Пецизь пиянь и пештизь боцькас. Овто каньць медь — ламбавтызь и ливтизь мацтс кельмеме.
Валське мольсь шивець вачамонзо — боцька кургось панжозь и пиядонть та ки симсь.
Сась кудов и мери:
— Вана мезе, ялгат, пиядонок та ки симсь, эряви сонзэ кундамс! Давайте ванстомонзо!
Каясть жеребейсэ, кинень знярдо саты молемс.
Васень вестэнть сатоць мольмекс овтонень.
Мольсь сон мацтонтень, кекшсь боцьканть удалов и ашти.
Пелеве шкане кепетець прок виев варма. Чувтнэ весе кармасть лажномо. Сятор пукштор сась вирь-ава. Таргизе боцька потомксонть и давай симме.
Овто лись боцьканть удалдо и серьгець: „А! вана ки симни минек пиядонок!”
Вирь-ава кода кундасазо овтонть и давай мерькамонзо. Мерькась, мерькась эснэнзэ, цют живстэ нолдызе.
Сась овто кудов, маць кашланкс и кувси.
[ 48 ]Шивець кевстизе: „Я, овто, неить мезеяк?”
— Арась — мери овто — мезеяк эзинь нейть!
— Мейсь ино кувсят?
— Гобрикс валгомсто прынь ды весе порксавинь!
Омбоце вестэ мольсь ванстомо нечистой. Кекшсь боцька удалов и ашти.
Пелеве шкане таго сась вирь-ава. Нечистоеньгак мерькизе, цют живстэ нолдызе. Нечистоень пуло-пезэяк сезевсь. Сась кудов нечистой, маць кашланкс овто вакс и нолси пуло пестэнзэ веренть.
Шивець кевстизе нечистоень: „Я, неить мезеяк?”
— Арась, мезеяк эзинь нейть!
— Мейсь пуло петь верев?
— Кенкшес понгонесь — лепштявсь!
Колмоце вене мольсь ванстомо шивець. Сайсь мартонзо балалайка и кшнинь аршин. Озась боцька удалов и ашти.
Пеле ве шкане сась вирь-ава. Комась боцьканть ланкс и давай симме. Кода вирь-ава аламодо ирець, шивець давай балалайкасонть седямо. Вирь-ава кадызе симмензэ и давай киштеме. Кийшь, кийшь — сизесь и мери: „Уй! кода сизинь, пекемгак мик вачсь! Шивець, мон тонть сэвдян!”
— Сэвсамак, сэвсамак, — мери шивець. — Тонть пексэяк эрян, мон вечкан лембе тарка. Ансяк вана мезе васня тейдянок: монь ули шочком — адя лайсынек шачк, мейле сэвимак!
Вирь-ава мери: „Адя!”
Шивець лайсь шочко-пе, чавсь эзэзэнзэ туло и мери вирь-авантень: „Тонги ласксостень кавонест кедеть и тетьк ласксонть — седе курок лазови.”
Вирь-ава тонгинзе. Шивець кода вачкотьсазо тулонть узере обушкасо! Тулось ёртовсь ве ёнов. Вирь авань кавонест кедензэ сювордавсть ласксостень. Тев ноцк, тов ноцк, а таргавить тензэ. Шивець кода сайсазо кшнинь аршинсть и давай вирь-авань котьмере ланга пидеме!
[ 49 ]Вирь-ава ранги — пижеть-ожот ливти:
— Шивець паро чи, нолдамак инескеть! Вестяк а сан пиядонк симме!
А шивець пиди эснэнзэ, а кулцоныяк.
Вирь-ава таго: „Шивець паро чи, нолдамак, инескеть, — мезе, вешат — максан!”
— Мезе максат?
— Ули вейкине тейтерем — максса тенть!
— Мартонзо мезе максат?
— Максан сисемь малинкат сиянь ярмак!
— Эщо мезе максат?
— Максан эщо тенть од кудо ды кардас пешксе скотинат, ансяк нолдамак!
— А манясамак?
— А манятан! Зепсэнь ули пацине — саик. Кодак эснэнзэ чамат нардасак — весе тенть улить, месть алтынь и тонсь од цёракс велявтат!
Шивець саизе вирь-авань зепстэ пациненть и нолдызе вирь-аванть. Вирь-ава оргоць — весе вирьсэ чувтнэнь-гак яжиньзе.
Ашолгадмо ёнов сась шивець кудов. Овто марто нечистой кевстизь: „Я, шивець, неить мезеяк?”
— Неинь, — мери шивець, — сакшнось вирь-ава.
— Месть алтась тенть?
— Месть? Вейкине тейтерензэ макссазо тень никс! Мартонзо максы тень сисемь малинкат сиянь ярмак, од кудо ды кардас пешксе скотинат. Вана тейтеренть пацянзояк уш максызе тень.
Овто марто нечистойть таймаскацть — эсь сельмест-пилест а кемить! Мейле, аламос аштезь арцезевсть ды мерить:
— Пиясь веть вейсэнель, вирь-авань тейтересь эщо аздан кинень саты: минь карматанок мартот пелькстамо!
Шивець мери: „Кода карматадо пелькстамо?” Овто мери: „Давайте вана кода пелькстатанок: карматанок вейкенек-вейкенек тандавтлеме — кинь эйстэ [ 50 ]весемеде пек тандаттанок — сенень ули вирь-авань тейтерьсь.”
— Ну, давайте, — мерить шивець и нечистой.
Сась чокшнэ, толост мацтизь и лись васня ушов овто. Кекшсь чувто удалов и давай рангамо и чувтотьнесэ яжамо — вирьсь как весе сорны. Ванцазо шивець марто нечистой эстэдензэ а пелить, — арць вальманьть алов и апаро вайгельсэ серьгець: „вадо! вадо! овтось сэвдядызь!”
Шивець маро нечистойть мерить тензэ: „Иля тандавтле, аволь эйкакшттанок — а пельдянок!”
Лись нечистой. Куйсь чувто пряс и кармась пувамо. Кепетець истямо варма — кудосяк весе сорны — текень ванок сявори. Мейле чийсь вальманть алов и амазы вайгельсэ серьгець: „Ванодо, ванодо, нечистой ливти — пувситядызь!”
Кудостонть шивець мери тензэ: „Иля тандавтле — содатадызь кият — а пельдянок!”
Меельсь пелев лись кудостонть шивець. Сайсь мартонзо заслон ды кшнынь ведра. Кекшсь каль куракшке удалов — керьксазь лангозонзо чувто лопань одижат, сась штемешка. Пелеве шкане кода карми ведрасонть заслонстень чавмо и кудонть ёнов мольме. Вирьськак весе гайни.
Маризь шумонзо овто марто нечистой — вачтасть вальма чирева — кудонть ёнов юты таго мезе штемешка да чави ведрасо заслонс.
Овто мери: „Те аволь вирь-ава ли сы, козо ней кекштянок?” Нечистой мери: „Сон прок неяви!”. А соньсь весе сорны.
Шивець кода моли вальманть алов, кода цяратьсазо вальманть заслонсо, сонсь кода серьгеди: „Лиседе, лиседе седе курок — вирь-ава сась!”
Овто марто нечистой кода лисить кудостонть и давай чийме! Удалов-гак а вачтыть.
Шивець нардызе пацясонть чаманзо и теевсь од-цёракс. Икелензэ ашти горниця и кардас пешксе [ 51 ]скотинат. Совась горницястень — эзем прясо озадо одирьва — бояр ава прок наряжазь. Вачтась аксялов — ащить сисемь малинкат сиянь ярмак. Кармась шивець одирьванзо марто од кудосо эрямо-аштомо. Аршинэнзэяк вальмава ёртызе.