Эрзянь ёвкст (М. Е. Евсевьев, 1928)/14
КЕВГАНЯ.
Эрясть-айшть атят бабат кавонест. Ульнесь сынст апокшке тейтерьнест. Лемзэ Кевганя. Бабась кулось. Кадовсть атясть марто тейтерьнесь кавонест.
Тейтерьнесь чистэ мери тетянстэнь: „Тетяй, од ава сайть! тетяй, од ава сайть!”
Сайсь тетясь од ава. Од аванть ульнесь соньсинзэ тейтерьзэ. Кевганя ульнесь тейтерьсь ашо, мазы и сэрей, од авань тейтерьсь раужо, алкине ды а мазы. Кевганя превеель и эрьва мезень тейме маштыль. Од авань тейтерьсь аволь вельть превеель и мезеньгак тейме а маштыль. Од авась сонсинзэ [ 57 ]тейтерьсэнть вечкиль, Кевганянь а вечкиль. Кайсть тейтерьтне. Кевганя мельга кармасть якамо кудат, од авань тейтерьсть кияк а кевстни. Од авань мельс апаро. Сонензэ охота соньсинзэ тейтерьсть максомс. Кодат кудат Кевганянь кевстеме а сыть, сон ливцазо тенст соньсинзэ тейтерьсть. Кудатьне мерить: „Те аволь Кевганя, а эряви тенек!” — и туить.
Од авась икеленьде-як пек эзь карма Кевганянь вечкеме. Сон мери: „Сыньдеряйть таго парт кудат, мон ладяса тенст Кевганянь, а тарказонзо озавца моньсиньзесть”.
Састь кудат икеленьде-як парт, сюпавт. Од авась ливтизе тенст Кевганянь, соньсинзэ тейтерьсть эссе невть. Кудатьне ладизь Кевганянь и тусть кудов. Пурнасть свадьба и састь Кевганянь сайме. Од авась наряжизе соньсинзэ тейтерьсть Кевганянь руцясо-панарсо, копачизе фатасо и озавтызе содамонть вакс, а Кевганянь комавтызе кардайсэ очко алов и мери тензэ: „Аштек тесэ свадьбанть ютамс, ды ванок, иля листь; лисиньдерят, мон живстэ а каттан”.
А уредевсь маштыль саразонь кельс. Сон лись кардайс и кулцоны, месть кортыть сараснэ.
Атякшось „кикирюку” серьгець: „Од авась Кевганянь очко алов комавтызе, содамонть вакс озавтызе соньсинзэ тейтерьсть!”
Уредевсь совась кудос, штавтызе одирьванть прясто фатанть и мери: „Минь ладинек Кевганянь, те аволь Кевганя, — а эряви тенек!”
Мейле лись кардайс, кепедизе очконть и таргизе тосто Кевганянь.
Од авась мери: „Коть сайсынк Кевганянь, сё ровно сон монь кецтэ а мени!”
Кудатьне озавтызь Кевганянь содамост вакс и тусть седе курок кудов.
Эрить кудосо ие, эрить кавто. Кевганя весемень мельс тусь: сон и мазы, и превей, и бойка. Шачтась Кевганя цёра и саизе сонзэ тошна тетянзо [ 58 ]мельга. Чистэ аварьди, мирьденстэнзэ мери: „Адя саимак тетянь кудос! адя саимак тетянь кудос!”
Кильць мирьдесь лишме, озавтызе Кевганянь эйкакшонзо марто и тусть Кевганянь тетянстэнь. Эрясть тесэ чи, кавто. Од авась кармась амазыстэ лангозост ванмо.
Редизе тень мирьдесь и мери: „Адя, Кевганя, кудов, — од авась амазыстэ кармась лангозонок ванмо!”
Кильдизь лишмест и тусть.
Ютасть пель вайгельбешка, марясызь, од авась мельгаст сеери: „Кевганя, Кевганя! эйдень шапкат стувтык!”
Кевганя вачтась удалов и теевсь гулькинекс. Вачкодиньзе сёлнонзо и тусь ливтязь.
Кадовсь мирьдесь эйкакшонть марто и кармась аварьдеме. Аварьць, аварьць, приметизе се тарканть, косто вакстонзо ливтязь тусь Кевганя, саизе эйкакшонть и тусь мартонзо кудов.
Кудосо ёвтлинзе аванстэнь, кода Кевганя тусь вакстонзо. Авась мери: „Иля мелявт, цёрам! Ули вейке содыця бабине, сон тонавцамизь, кода Кевганянь мекев велявтомс”.
Мольсь авась се бабинестень и ёвтлизе тензэ, кода Кевганянь од авазо теизе гулькакс и кода сон ливтязь тусь мирьдензэ ваксто.
Бабинесь мери: „Од авась ведун, — аволь голой кецэ эряволь Кевганянь кецтэнзэ саймекс. Ознок пазнэнь эйкакшось кадовсь. Сонзэ мельга Кевганяньгак мекев велявцынек. Азё саик эйкакшонть се таркастень, косто Кевганя ливтязь тусь и серьгеть: „Кевганя! Кевганя! кинь эйкакшозо аварьди, сень седейзэ марясазо!” Сон а кирьди, ливти эйкакшонть вакс!”
Авась саизе эйкакшонть, мольсь се таркастень, косто ливтязь тусь Кевганя и серьгець: „Кевганя! Кевганя! кинь эйкакшозо аварьди, сень седейзэ марясазо!”
[ 59 ]Либор... ливтясь Кевганя, валксь эйкакшонть вакс и мери: „Эх, авай, кодамо апаро шкасто седеем сыргавтык: вейке паро ломань ки ланкс певерць ямкст, минь ялган марто ансяк валгокшнынек не ямкснэнь кочксеме, тон терьдимек монь.” Потявтызе седе курок эйкакшонть, вачкодинзе сёвнонзо и таго ливтязь тусь.
Омбоце чистэ авась таго кандызе эйкакшоньть се таркастень и серьгець Кевганянень. Кевганя таго ливтясь ваксозонзо и мери: „Эх, авай, таго апаро шкасто седеем сыргавтык. Ве бояронь кардайсэ ламо товзюрот певерезь, мон ялган маро ансяк ливтякшнынь кочксемест, — тон серьгедимик!” Потявтызе-теизе эйкакшонть, таго ливтязь тусь.
Ававтось таго мольсь содыця бабинестень и кевстли эснэнзэ, кода Кевганянь кундамс.
Бабинесь мери: „Ванды саик мартот Кевганянь мирьдензэ-як. Сон теезэ ве ёнов апокшке тол, соньсь кекшезе козо-як. Кода Кевганя сы, тон мерьть тензэ: „Кевганя, тесэ кияк арась, каить гулькань одижат, оймавтык седееть экшостень, — потявтык парьсте эйкакшот.” Кода сон каясыньзе гулькань одижанзо, тон пурды ожаст — неть сонзэ сёвнонзо ды максы седе курок мирьдестень, а сон седе курок каиньзе толстень.”
Ававтось тейсь, кода тонавтызе, бабинесь. Кевганя каиньзе гулькань одижанзо и кармась эйкакшосонть потявтомо. Ававтось саинзе одижатьнень, пурдыньзе ожаст и максыньзе цёрастень. Цёрась седе курок каиньзе толстень и пултыньзе.
Кевганя потявтызе эйкакшонть и туикскель ливтямо. Тев, пры, арасть одижазанзо, тов пры, арасть и мери ававтостень: „Эх, авай, мейсь тон истя теить монь мартон? Кодат партольть монь ялган, кода минь эрьва таркава ливтлильнек, эрьва кодамо зёрнадо ярцлильнек!” Се шкане мольсь ваксозонзо мирьдесь [ 60 ]и мери тензэ: „Я, Кевганя! тонть гулькань одижатьнень ней уш куловосткак кельместь, — адя кудов!”
Кевганя мери: „Ну, теемс а мезе, — маштыде тейме, адядо ней кудов”.
Тусть весе кудов, и чечемень чис эрить и ули пародо неить.