Эрзянь ёвкст (М. Е. Евсевьев, 1928)/07
ЯГА-БАБА.
Эрясть-айшть атят бабат кавонест. Ульнесть сынст кавто эйкакшост — цёрыне да тейтерьне. Бабась прась — кулось. Кадовсть эйкакшнэ сиротакс. Сынь чистэ мерить тетястэнь: „Тетяй, сайть од ава! тетяй, сайть од ава!” Тетясь мери: „Саян, ды мелезэнк туезэ!”
— Туи — сайть!
Сайсь тетясь од ава. Аламос эрясь од авась ды мери тетястень: „Ёмавцыть эйкакшот — эрян мартот, а ёмавцыть, а эрян!”
Атястень теемс а мезе. Пештиньзе эйкакшнэнь зепест кснавдо ды саинзе вирев. Ускиньзе вирь кунчкас и мери тенст: „Аштеде тынь тесэ, мон молян чувто керян — медь валтан.” Мольсь ве ёнов, сюлмась чувто пряс кавто ласт и тусь кудов. Вармась пуви, чувто прясо ластнэ кулст-калст! вейс вачкодевить. Эйкакштнэ марясызь ластнэнь ды мерить: „Оно косо тетямок чувто кери — медь валты!”
[ 31 ]Учость, учость — эзь сак тетяст. Мольсть тетяст вешнеме, косо сон чувто кери, медь валты. Ваныть — чувто прясо кавто ласт вармасо вейс вачколевить. Кармасть аварьдеме. Аварьцть, аварьцть — мусть тропине и тусть се тропиневасть, ков сельмест неить, ков пилест марить.
Мольсть, мольсть, пачкоцьть яга-бабань кудос. Куйсть потмарс и кармасть тосо эрямо. Кудо потмарстень кузьместэ прась ве кснавост яга-бабань каськас; кснавсь кайсь потолоконть пачк кудо потмарстень.
Яга бабась чистэ паниль оев прякат, а сонсь мадиль оймсеме.
Яга-бась матедеви, патясь мери ялаксостень: „Ялакскем, тука прят чавсиса!”
Ялаксось мади элезэнзэ, патясь карми а чавсеме и морамо: „Лип! лип! ве сельминесь! лип! лип! омбоцинесь!” Липадевить ялаксонть сельмензэ и матедеви.
Патясь валги кснавсть кувалт яга-бабань кудостень, салы пряка и мекев кузи кудо потмарстень. Стявцазо ялаксонть и карми эснэнзэ прякадо андомо.
Ялаксось мери: „Патяй, косто саик пряканть?” Патясь мери: „Тетянок сакшнось — кандызе!”
— Мейсь, патяй, монь эзимек стявто, — мон-гак неевлея тетян! — И кармась аварьдеме. Патясь мери: „Иль-аварьть, ялакскем, таго сыньдеряй тетянок, тонть-как стявттан!”
Омбоце чистэ патясь таго мери: „Ялакскем, тука прят чавсиса!”
Ялаксось маць элезэнзэ; патясь кармась морамо: „Лип, лип, ве сельминесь! лип, лип, омбоцинесь!”
Ялаксось кониньзе сельмензэ, а соньсь эзь матедевть.
Патясь ансяк кармась яга-бабань кудос валгомо, ялаксось панжиньзе сельмензэ и мери:
— Патяй, тон ков? — Мон-гак мартот молян!
Патясь мери: „Мон молян яга-бабанень прякань саламо!”
[ 32 ]— Мон-гак молян мартот!
— Иля яка, ялакскем, — яга-бабась кундасамизь!
— А кундасамизь! — Мон-гак молян!
— Ну, адя! ансяк ванок, ялакскем, иля шума тосо!
Валксть кавонест кснавсть кувалт. Яга-бабась уды кашланксо, пильгензэ полок ланксо, ве кедезэ кенкш поровт ланксо, омбоцесь томба ланксо.
Ялаксось неинзе столанксто оевть прякатьнень и ранкстазевсь: „Патяй, ванта, зняро прякатьне столанксонть!”
Яга-бабась сыргойсь и мери: „Вана кить салцить монь прякадон!”
Кундыньзе кавонест, пекстыньзе коникс и кармась эснэст андомо. Чистэ каи тенст цела юдма пеште товт.
Аламос эрязь, яга-бабась мери тенст: „Ну-ка, эйдень, тонгинка суронк варинева, — варчатадызь, куялгадыде эли эзиде!”
Патясь тонксь варинева цёкань-сюро. Яга-бабась сётор! сускизе. „У! эзьде куялгат оштё, калгодо сывеленк!”
Кармась андомо эснэст седе-як парьсте. Кавтонь-кавтонь юдма кармась пеште товонь каямо.
Кавто-колмо чинь ютазь яга-бабась таго мери: „Ну-ка, ней тонгинка, эйдень, суронк — куялгадыде, эзьде!”
Патясь тонксь варинева чев. Яга-бабась сётор! сускизе.
— У! Эзьде куялгат оштё — а маштувдадо ярцамс!
Ютасть оштё кавто-колмо чить. Яга-бабась таго мери тенст: „Ну-ка, эйдень, тонгинка суронк — куиде, эзьде!”
Патясь се шкане матедевкшнэсь. Ялаксось саизе ды тонгизе суронзо. Яга-бабась пукштор сускизе сурсть и мери: „О! кода куялгадыде! Ней маштувдадо сэвмекс!”
[ 33 ]Уштызе-явавтызе каштомонзо псистэ. Томба ланкс анокстась кше койме; таргинзе коникстэ эйкакштнэнь и мери патястень: „Кирьневт-тапарявт ды озак койменть ланкс!”
Патясь мери: „Бабай, а маштан, невтик тоньсь, кода озамс!”
— Ну, ино тон, цёрынем, озак!
Се-як мери: „Бабай, а маштан, — невтик тоньсь, кода озамс!”
Яга-бабась озась соньсь койменть ланкс, — пильгензэ кирьнинзе-тапариньзе алонзо ды мери:
— Вана истя озадо!
Патясь саизе койменть ды седе курок яга-бабанть каштомонтень шикадизе, каштом кургонть кшнинь коцькирьгансо нежедизе.
Яга-бабась каштоцонть ранги: „Эйдень, нолдымизь: каськасо кекшезь цела шакш пижень ярмакон — макссынь тенк!”
Патясь мери: „Неть истякак минек улить!”
— Кустим ало калмазь цела кукшин сиянь ярмакон! Нетькак тынк улест — нолдымизь!
Патясь мери: „Неть истякак минек улить!”
— Вальма прясо сырьнень сурксом — се-як тынк улезэ — нолдамизь!
Патясь мери: „Истякак минек ули!”
Яга-бабась пись каштоцонть и кулось. Ойзэ каштоцтонть кармась чудьме томба ланкс, томба ланкстонть — масторов.
Патясь саинзе ярмакнэнь и тусь кудостонть. Ки ланксо лець мелезэнзэ — сырьнень сурксось стувтовсь и мери ялаксостень: „Тон аштек тесэ — мон молян сырьнень сурксонть вальма прясто сайса!”
Ялаксось мери: „Патяй, мон молян сайса.”
Патясь мери: „Азё ды ванок! яга-бабань ойденть иля нолчта!”
[ 34 ]Ялаксось мольсь, саизе сырьнень сурксонть вальма прясто и арси: „Мейсь патям эзь мерьть яга-бабань ойденть нолчтамодо! Дай варчаса.”
Мольсь каштомонть икелев ды нолчтась томбам ланксто яга-бабань ойденть. Нолчтась и теевсь баранкс! Тонгизе сырьнень сурксонть рогазонзо и паразь тусь патянть вакс: „Бе! патяй! бе! патяй!”
Патясь мери тензэ: „Эх, ялакскем! меринь ведь иля нолчта!”
Ну, теемс а мезе. Тусть кавонест киява. Патясь юты икелев, барансь мельганзо.
Понксь карчост бояр и мери: „Эх, кодамо мазы баранось! Миик монень!”
Патясь мери: „А мийса! Ков мон молян, сон-гак мартон моли!”
— А ков тон молят?
— Ков сельмень неить, ков пилень марить.
— Адя монень эрямо.
— Адя, сайсамак тык!
Боярсь озавтыньзе ваксозонзо и ускиньзе эстензэ эрямо.
Эрить тосо и эрить.
Марясь эстэдест се яга-бабанть тейтерзэ, конань сынь каштотсо пидизь и арцесь сынст ёмавтомо.
Сась сон се шкане боярстень, знярдо боярсь арасель кудосо и мери патястень: „Адя мартон экшелямо!”
Патясь манявсь — мольсь.
Кайсизь панарост и совасть вец. Яга-бабань тейтерьсь кундызе патянть, понгавсь кирьгазонзо кев и ваявтызе, соньсь орчинзе патянть одижанзо и тусь тарказонзо боярстень. Боярсь сонзэ эзизе сода. Аламос аштезь яга-бабань тейтерьсь мери боярстень: „Давай печксынек баранонть.”
Боярсь мери: „Давай!” и кармась пеелень човамо, а сонсь эсь пачканзо арси: „Кода вечкильсе тейтерьсь барансть, а ней друк мери печкемензэ. Мейсь истя сон кежиявсь лангозонзо.”
[ 35 ]Барансь неизе боярсть пеелень човамодо, и чаркоць — сонзэ печкеме арсить. Мольсь боярсть икелев и мери: „Нолдамак монь остатка раз ведь чирева якамо.”
Боярсь мери: „азё!” А соньсь мольсь мельганзо вантлеме.
Сась барансь ведь чиреньтень. Яки ведь чиреванть, аварьди и сеери:
— Бе, патяй! бе, патяй! |
Патясь ведь потмакстонть серьгець каршонзо:
— Ох, ялакскем, ойминем! |
Мариньзе сынст боярсь. Кирнавць вецтень и таргизе патянть. Сась кудов, сюлмсизе яга-бабань тейтерьсть сисемь иесэ айгоронь пулос и панизе айгорсть дикой степс, а патянть саизе эстензэ никс.