Эрзянь ёвкст (М. Е. Евсевьев, 1928)/06
СЫРЕ СКАЛНЭ.
Эрясть-айшть атят бабат кавонест. Ульнесть сынст кавто эйкакшост — цёрат-тейтерьть, ды сыре скалнэст. Эйкакшнэ поцесть сыре скалсть эйсэ. Арцесть атятьне бабатьне скалонть печкеме. Эйкакшнэ листь скалонть вакс и аварьдить. Скалсь мери тенст: „Тынь вана мезе тееде: кода атясь карми монь печкемень, тынь максодо тензэ наксадо пикс, ортанть панжинк.”
Лись атясь скалоньть печкеме и мери цёрынестень: „Цёрам, дай пикс скалонть сюлмсемс.” Цёрась макссь тензэ наксадо пикс, а ортанть кадызе панжадо.
Кармась атясь скалонть печкеме. Скалсь кармась дрягамо. Пикснэ сезевсть, сон оргоць кардайстэньть и тусь вете паксянь томбалев.
Эйкакшнэ листь паксяв и сергецть: „Скалнэ, а скалнэ, косат?”
Сон сергець карчост:
— Вете паксянь томбалеян!
Мольсть эйкакшнэ тозой. Сон арась тосо. Эйкакшнэ таго ранкстасьть: „Скалнэ, а скалнэ, косат?”
— Кото паксянь томбалеян!
Мольсть тозо и муизь. Скалнэсь тейсь пици палаксонь кудыне, потявтынзе эйкакштнэнь и мери тенст: „Мон молян чейга-чейга якамо, ловцонь-оень пурнамо. Тынь мольдядодеряй пижень тинге ланкс налксеме, илядо сай пижень горнипов.”
Эйкакштнэ мольсть пижень тинге ланкс налксеме. Скалсь тусь чейга якамо. Налксесьть, налксесьть, сайсть пижень горнипов.
[ 27 ]Сась вальмалов пижень бука и ранкстась:
— Скалнэ, а скалнэ, кудосат?
Эйкакштнэ мерить: „Арась кудосо!”
— Кучинк пижень тинге ланкс туреме!
Сась скалнэсь. Эйкакштнэ аварьдить. Скалнэсь мери: „Мейсь аварьттядо?”
— Сакшнось пижень бука, терьдиньзеть пижень тинге ланкс турьме.
Скалсь мольсь турьме. Пижень буканьть лазызе и мери эйкакштнэнень: „мон молян чейга-чейга якамо ловсонь-оень пурнамо, а тынь мольдядо сиянь тинге лангов налксеме, илядо сай сиянь горнипов”. И тусь чейга якамо, ловцонь-оень пурнамо.
Эйкакштнэ мольсть сиянь тинге лангов налксеме. Налксесьть, налксесть, сайсть сиянь горнипов. Сась сиянь бука вальмалов и мери: „Молезэ скалнэ сиянь тинге лангов туреме.”
Сась скалнэ, эйкакштнэ таго аварьдить.
— Мейсь аварьттядо?!
— Сакшнось сиянь бука, терьдинзеть сиянь тинге ланкс турьме.
Скалсь мери: „Ну, ней лайсамам! Адядо тыньгак мартон.”
Мольместэ сон мери тенст: „Кода букась монь лайсамам, монь поцто лисить кавто киска левкст — вейке вармадояк бойка, омбоцесь комулядо-як шождыне, тынь кундынк не киска левкснэнь, и саинк эстенк, — сынь маштовить тенк!”
Пачкоцьть сиянь тинге ланкс. Букась учи уш эснэст. Сон саизе роганзо ланкс скалонть и лазызе. Скалонть поцто листь кавто киска левкст. Цёрынесь кундынзе сынст и аварьдезь тусть кудов.
Кармасть эрямо патят-ялакст кавонест. Кайсть кискинетьне. Цёрынесь кармась мартост охотас якамо, тейтерьнесь пидеме-панеме.
Тонаць тейтерьстень якамо сисемь прясо ёзнэ. Кодак цёрынесь кискинензэ марто туи охотас, сон [ 28 ]велявты од цёракс и моли тейтерьсть марто налксеме. Весть сон мери тейтерьстень: „Адя монень никс!”
Тейтерьсь мери: „Мон молевлень ды ялаксом карми сёвномо!”
Ёзнэсь мери: „Ёмавтык ялаксот, карматонок кавонек эрямо!” Тонавтызе патянть, кода ялаксонть ёмавтомс, соньсь тусь кудов.
Сась ялаксось охотасто, а патясь тейсь прянзо сэредикс, маць тарка ланкс и кувси.
Ялаксось кевстизе: „Мейсь, патяй, кувсят, эли сэредят?”
— Ох, ялакскем, кулан! таркастонгак а сыргаван. А молят-ли лекарствань кис?
Ялаксось кевстизе: „Ков, патяй, молемс?”
— Азё, сесэ, сесэ, лей потмакссо ули кудыне. Эйсэнзэ ёзнэнь ой; кант монень се ойденть, паряк пичкан!
Цёрынесь саинзе кискинензэ и тусь. Мольсь, мольсь — муизе лейсть, потмакстонзо кудынеть. Кудынесь пекстазь покш панжумасо, кода-як а совават эзэзэнзэ.
Кискинетьне кармасть панжуманть эснэ порьме. Порьсть, порьсть — прась панжумась и совасть кудыненьтень. Ансяк совасьть кискинетьне, цёрынесь варчтамо-як эзь кенерьть — хлоп! кенкшесь мекев пекставсь, кадовсь цёрась ушов ськамонзо.
Месть тейнемс? кармась аварьдеме. Аварьць, аварьць — варчтась верев. Чувто прясо озадо сезьган.
Сезьгансь мери тензэ: „Иль-аварьть, цёрыне! Азё кудов, кискат тоньдеть икеле пачкодить.”
Цёрынесь тусь, а кисканзо уш орта ланксо учить эснэнзэ.
Патясь кевстизе: „Я, туить ёзнэнь ой?”
— Эзинь, патяй! Моньскак цют эзинь пекставкшно кудынестень. Ладна кискан бойкат, сынь пекставкшность да оргоцьть тосто.
Патясь седе-як пек кармась кувсеме и мери: „Вай, кулан, ялакскем, вай, кулан! Азё, ялакскем, сесэ, сесэ [ 29 ]улить сынсь-яжиця ведьгевть, кант тосто почт, панят сюкоро ды ярцан, паряк пичкан!”
Омбоце чистэ саинзе цёрась кискинензэ и ранаяк тусь сынсь-яжиця ведьгевс почтонь кис. Мольсь, мольсь — муиньзе сыньсь-яжиця ведьгевтнень. Ведьгевтнесэ кияк арась, — сыньсь яжить кемгавтово кевсэ. Кенкшест кшнинь, аштить панжадо. Кискинетьне мерить цёрастень: „Тон кадовт ушос, минь соватанок почтонь кис!”
Цёрась кадовсь ушос, кискинетьне совасть ведьгевтненень, сайсть почт и ансяк лисеме — хлоп! кенкшне пекставсть! Кадовсть кискинетьне ведьгевтненень. Цёрась учось, учось эснэст, чизэ кармась чопотеме и тусь ськамонзо кудов. — „Ёзнэнь кудосто листь, мери, — паряк тестэ-як кодаяк лисить.”
Сась кудов. Патясь мери: „Я, туить почт?”
— Эзинь, — мери цёрынесь, — моньськак кой-как менинь, а кискинень ведьгевтненень пекставсть!
Патясь арци эсь пачканзо. „Кискат тосто знярдояк ней уш а лисевить, а тонть марто мон маштан кода теймекс!”
Стясь патясь валське ранаяк, уйшсь пси баня и мери ялаксостень: „Ялакскем, ламо нужа неить монь кис, — мон панца ней тенть! Уштынь баня, азё паряк псинестэ. Парят, парят — тоск оймсеме матть.”
Цёрынесь тусь. Ансяк лись пирестень, палмань пряс валксь сезьган и моры:
— Чики-чики, од цёра! |
Цёрась кулцонызе сезьганонть, баняс а капши: весть шаги, кавсть мекев поты. Пачкоць баня [ 30 ]икелев. Кайсиньзе понксонзо-панаронзо, мекев орчинзе, таго каиньзе.
Ансяк совамо банястень, арсть кисканзо — весе чов поцот. Сынь вень-вемберк порьсть ведьгев кенкшенть эснэ. Валське ансяк поревсь тенст и арцть вицтэ банястень.
Совасть кискатьне банястень, а тосо сисемь прясо ёзнэ цёрасонть учи. Кундызь сонзэ ды панксонь-панкс раздизь.
Сась цёрась кудов и мери патястень: „Ну, патяй, тон арцекшныть монь ёмавтомон, эзинь ёвмавтовт теньть! Давай ней явданок: тон азё ве ёнов, мон омбоце ёнов, ато кискинетьне тоньть-как раздитядызь!”
Патясь тусь ве ёнов, цёрынесь кискинензэ марто лия ёнов.