Кызьы улэмед потэ, озьы эн улы (Островский)/3
| ← Кыкетӥ действие | Кызьы улэмед потэ, озьы эн улы Куинетӥ действие Автор: Александр Николаевич Островский Удмурт кылэ берыктэмез: А. Садаковлэн |
| Поттэмын: 1855. Источник: Островский А. Н. Кизьы улэмед потэ, озьы эн улы. — Казань: Казанский Вотский Издательский Подотдел, 1920. — С. 26—40. |
Куинетӥ действие. Сцена I
Первой потон
Спиридоновна. Мар тон пукиськод отын, возьыттэм! Юлтошъёсыд лыктӥллям, тон астэ но уд возьматӥськы.
Груша. Уг мыны мон соос доры.
Спиридоновна. Оломаръёс малпаса пукиськод! Марлы со тупа? Ачид ӧтемед, берен пегаськод.
Груша. Соослэн улонзы ӟеч! Соослы шулдыр.
Спиридоновна. Тынад кыӵе сюлмаськонэд бен вань!.. Сялӟы но кушты, вот солы. Вот тани мед лыктоз со татчы, ми сое тузонзэ поттыса улляса лэзём, со ассэ ачиз тодытэк кошкоз… Со шайтан кадь пӧртмаськыса медаз ветлы, нылъёсыз йыватыса.
Груша. Марлы-уась со уг лыкты ни! Мон чалякгес сюлэмме каньыл карысал! Мон сое туж чыкаськысал! Со табере мынам син азям адскыса мед утёз али!.. Дугды али тон, возьыттэм адями!
Спиридоновна. Мар бен со борды герӟаськонэз вань!.. Адӟемед ӧвӧл-а сое! Мынам йылолы тазьы: огпол-кыкпол адӟем адями шорын, весь малпаськыса уг пуко! Али но малпаськод-а ма!.. Ӝӧк вылэ пушмульыос пукты но ӧтьы нылъёсыз татчы. Дугды визьтэм луыса улонлэсь, мар бӧрдонэз!..
Груша (султэ но ӝӧк вылаз пуктыны кутске пушмульыос). Тон эсэпласа уд утиськы, со понна бӧрдымонэз но ӧвӧл, ог малпад ке. Та вожпотэменым, вань кужымыным, кырӟало али! (Потыса кошке; кылӥське ӝож кырӟам куара.)
Кыкетӥ потон
Спиридоновна. Быгатэ мынам Грушае! Нылы ачим каик ик, мон но пинал дыръям сыӵе вал… Али но шудэме потэ, пинал али мылкыды. Ойдо мед шудоз-серекъялоз, ассэ мед йыватоз. Нылэз анайлы мар возьманэз, ойдо анай мед изёз; сое чаль гинэ уд ӧрекча. Ныл гинэ ӧвӧл, со зарни!
Шудо-серекъяло мынам нылъёсы!.. Эх, мынам валляно аръёсы ӧвӧл! Шудысал-серекъясал мон но соосын валче.
Мар шыпак луиды? Кырӟалэ, шулдыръяськелэ, мон мыныса верало кык дӧдьыен вал кыткыны, ворттылыны потоды.
Нылъёс. Тау тыныд, Анна Спиридоновна! Вот шулдыр!
Груша. Нылъёс! Мынам туннэ гулять карыса шудэм-серекъяме потэ! Уйбыт ворттыломы кырӟаса.
Одӥг ныл. Марлы бен?
Груша. Сюлэмме небӟытыса асме ачим йыватэме потэ. Мар бен татын вераськыса сылонэз! Ойдолэ анай пыремлэсь азьла вина юоме. (Шкапысь вина поттэ.)
Кудке нылъёс. Мар тон вераськиськод?
Груша. Мон азьла ик сюрес возьмато. Вазьнырысь юисько… (Юэ.) Ой, кыӵе курыт! Кызьы тае муртъёс юо! Ваё али праник. Тае мон сюлмаськеменым юи, монэ одӥг мурт куркариз. Юэлэ, нылъёс, эн бытчаськелэ, чалякгес! (Вина нуэ нылъёс доры; кудӥз ке юэ; няраксы горекъяло.)
Куиньметӥ потон
Ерёмка. Милям атлас ми дорысь уг кошкы. Няракты тӥ татын-а?
Нылъёс. Ах, ах! Ерёмка лыктӥз! Ерёмка лыктӥз!
Груша. Тон малы татчы лыктӥд? Ӧтьымтэ куно бигерлэсь начаргес.
Ерёмка. Тон мар вераськиськод? Та дыръя мар нуналъёс! Тон тодад уськыты али! Ачид кузё ныл шуиськод! Тон азьла ик кутскыса монэ винаен секта, собере мон выльысь кошко тӥ дорысь. (Тырныоссэ ӵуше.)
Нылъёс. Тӥнь, тон мар малпаськод! ӧжыт вить али!
Груша (вина нуыса сётэ). Ме ю но кошкы, кытысь лыктӥд отчы.
Ерёмка (юэ). Ини уз кошкы дыр татысь… мыным татын но ӟеч.
Груша. Ини ачид тодод, ми тонэ дорамы ум лэзелэ.
Ерёмка. Эн лэзелэ? Мон ведь ведӥн: мон тӥледыз тумошо каро али, йырдэс нярак мыдлань берыкто.
Груша. Пукселэ, нылъёс!
Тыныд инты но ӧвӧл.
Ерёмка. Инты ӧвӧл ке, мон выж вылын но пуко: мон барин ӧвӧл али. (Пуксе но кырӟа.)
Мон из вылын пукисько,
Мон киям тӥр кутӥсько.
Ай, люли, ай, люли,
Мон киям тӥр кутӥсько…
Груша. Мар солэсь кылзӥськоды, нылъёс, кырӟан кыл поттэ али!
Нылъёс (кырӟало).
Ветлӥзы нылъёс нюр возь вылын,
Вань нюр возь вылын.
Мон, пинал ныл пеймыт уе кыли.
Ньылетӥ потон
Пётр (ӧс выжыын). Тани мон туж шулдыр дыръя вуи. Шулдыр медло улонды, мон но тӥ дорын.
Груша. Лыкты ми доры! Ми коӵышез кутэн пыдзэ кутчаса, тонэ ӧтьыны лэзьыны турттӥськом вал.
Пётр. Таза-сӧл улӥськод-а, Груша! Таза сӧла мынам сяськае! Ӟеч-а-али, нылъёс!
Груша. Таза-сӧл, тау кары!
Пётр. Ойдо, нылъёс, шудэлэ: мон тӥледлы салам вайыса лыктӥ.
Груша. Туж тау тыныд: милям асьмелэн вань, муртлэн саламез кулэ ӧвӧл.
Ерёмка. Соослы кулэ ӧвӧл ке, мыным сёт.
Пётр. Мар тон, Грушенька! Марке луиз-а ма тыныд?
Груша. Мон кудӟи! (Серекъя.)
Пётр. Мар тон, мар тон! Лыкт али мон доры, чупкариськомы!
Груша. Уд мын ма, витьы али!
Ерёмка. Купеч, тон калленгес, сиротаез эн пачкаты.
Груша. Кылзӥське али, чебер нылъёс, мон тӥледлы мадён кылъёс верало. Вань вылэм одӥг ныл. Вот яралоз. Только нылыз визьтэм вылэм. Со ныл доры ветлэм одӥг пи, турлы кылъёс вераськем, только весь ӧрекчаса вераськем: мон, шуэ пе, кышнотэм пи, узыр, сое но тае, вӧяса вераське. Мон тонэ яратӥсько, аслым кышно басьто, шуэ пе… Ӟечгес тэкшерыса утёд ке — со кышное пи вылэм.
Пётр (вожзэ поттыса). Мар тон шудыса вераськод-а?
Груша. Эх, возьыттэм, возьыттэм!
Пётр. Оло, кинке марке вераз-а тыныд? Вера шонерзэ.
Груша. Котькин мед вералоз, только веразы.
Пётр. Тае тыныд аляк каро, ӧрекчало, а тон оскыны дась улӥськод.
Груша (серекъя). Ну, ске яралоз! Ӧрекчазы ке — ӧрекчалозы. Ске тон дурыс адями луы, ми дорысь палэнгес улы. Ерёмка, ойдо сиротаез кырӟаломы.
Ерёмка. Ойдо, кутскы.
Груша (кырӟа).
Сирота-уа, тон мынам, атайтэм-анайтэм,
Тон кутскы, сирота, сюлмаськыса кырӟаны.
Ерёмка.
Ӟеч луэ кырӟаны сиськем бере;
Мон бен, сирота, ӵукна но уг на сии на,
Ӵукна но уг на сии на, ӝыт но уг на сии на.
Груша. Вера али, сирота, милемлы хоть сказка.
Ерёмка.
Ӟеч вераны луэ вина юыса,
Вина юыса, тырмыт изьыса:
А мон, сирота, уг на изьы на,
Мон, сироталэн, няне но ӧвӧл,
Ӧвӧл мынам няне, сылалэ, ӧвӧл чырс шыдэ.
Купеч, сёт мыным уксё кубиста басьтыны!
Пётр. Кошкы мон дорысь! (Пуксе гур доры.) Только мон тодысал ке, кин тае тыныд чагылляськемзэ, со мурт ӧй мозмысал мынэсьтым, мон солы вунэтонтэм сётысал. Васька вераз-а? Виё мон сое!
Груша. Васяез ми ум на адӟы на али. Мар муртэ винамат кариськод, ачид винамат дыръя.
Пётр (султыса вера). Груша! та озьы ӧвӧл али. Эн оскы тон нокинлы но!.. Тае урод муртъёс каро, асьмемыз люкыса, монэ быдтыны туртто! Вера, тон мыным, дурыссэ: шудӥськод-а мар-а тон?
Груша. Эн адскы тон мынам син азям! Мон азьла визьтэм вылӥськем, табере монэ уд ӧрекча! Только милесьтым шудыса-серекъяса пуконмес гинэ таркад! Хоть Вася мед лыктоз вал, милемыз йыватысал. (Нылъёслы вера.) Тани, нылъёс, яратӥсько со пиез: муртэ уг серекъя, муртэ уг ӧрекча, туж умой адями; сое ушъяны но яра; со музон муртъёс каик ӧрекчаськыса ветлӥсь ӧвӧл: кудке мурт кылыныз йыватэ, малпаськонэз нош мукет.
Витетӥ потон
Пётр. Тон малы лыктӥ?
Груша (султэ но Васяез китӥз кутыса нуэ). Тон кузёезлэсь юатэк, муртлэн коркасьтыз эн улля. Чаль татчы, Вася, эн кышка.
Вася. Марлы бен? Тынад мар ужед? Кутӥ но лыктӥ. Мар бен луоз? Вӧй дыръя но уд ветлы-а ма! Вот тон кыӵе уёл!
Груша. Мар тон, Вася, уд чупкариськиськы монэным? Чупкариськы воченыз ик: туннэ ӧкынон нуналъёс.
Вася. Ой, мар курадӟиськоды! (Чупкариське воченыз.) Тани ведь со атайлы вералоз. Мар бен ӟечез солэн!
Пётр. Мар бен тӥ талашиськоды монэным, каргиськемъёс! Тӥ мынэсьтым быдмемме витиськоды-а ма?
Груша. Тон ведь кышнотэм пи?
Вася. Кышнотэм али.
Пётр. Ӟеч лу, Груша! Монэным сыӵе-таӵе урод ужъёс луиз ке, сьӧлыкез тынад лулыдлы луоз. Мынэсьтым луоз, марке но луоз, тон монэ тодӥськод ведь. (Ӧс доры мынэ.)
Груша. Тон, Вася, монэ кузпал басьтод-а?
Вася. Мон туж шумпотыса басьтысал, атай косоз-а бен.
Груша. Тон юа атаедлэсь.
Вася. Мон атайлэсь курисько! Пыд выжыяз йыбыръяса!
Пётр (ӧс дорын). Ну, Васька, тодад уськытод али тон! Тон мынам син азям табере эн адскы ни! Мон тыныд азьвыл верасько. Мынам табере асме ачим кутэме уз лу.
Вася. Мар тон мон борды герӟаськид? Мынам, тыныд нокыӵе ик урод малпаме ӧвӧл, зэм ик ӧвӧл.
Пётр. Ини мон тодӥсько марзэ.
Груша. Тон номыре но уд тодӥськы!
Спиридоновна (ӧс дорын). Мынэлэ, нылъёс, ворттылыны, валъёс дась ини.
Груша. Ойдолэ, нылъёс; ойдо, Вася.
Пётр (кутэ сое китӥз). Груша, валче мыномы.
Груша. Ма уд мын тонэныд!
Пётр. Мыномы валче, шуисько мон тыныд!
Груша. Мар тон, разбойник кадь, луиськод-а мар-а?
Пётр. Мон тонэ уг лэзьы!
Груша. Тон рад ӧд лэзьысалыд но лэзёд. Ожмаськыны уно ум лэзе. (Шыпак гинэ.) Тон малпаськод, дыр, мыным Вася вераз шуыса? Тынад кышноед татын вал. Валад-а тон табере? Вот тыныд мар верасько!
Пётр (аскыз йырзэ кутэ). Кышно!
Груша. Кутскелэ, нылъёс, кырӟаны. (Пётр пала учкыса.) Ӵемгес лыктэлэ — тӥ лэсяна шулдыргес! (Васяез ӟыгыртэ.) Кутскелэ, нылъёс, кырӟаны, бадӟым карелэ милемыз, эмеспиен кошкись нылэз кадь!
Ерёмка. Басьтэлэ монэ сьӧрады.
Груша. Кулэ ӧвӧл.
Ерёмка. Ну, мон уг бӧрды.
Куатетӥ потон
Пётр (укно доры лыктэ).
Кошкизы! (Пуксьыса малпаськыны кутске.)
Ерёмка. Купеч, а купеч! Асьмеос кыкнамы татчы тараканъёсын гинэ кылимы на!
Пётр (шыпак гинэ). Кышно лыктыса кошкем татчы… Марлы бен со лыктэм татчы? Кинке ваем, дыр, сое… Кинке но ваем, дыр, сое. (Чиректэ.) Мар бен таӵе каризы монэ! (Бамзэ киыныз кутыса, ӝӧк вылэ кымаське.)
Ерёмка. Купеч! Мар тон сюлмаськиськод? Кулэ-уа, йывато?
Пётр. Утчаса монэ — возьма вылэм! Дугды али табере! Озьы луэм бере — мед быроз дуннеысь марке! Возьмато мон аскым кыӵе вылэмме!.. Мон табере лэсьто ини ужъёс!
Ерёмка. Тыныд ини, озьы кылдэм дыр.
Пётр. Мар?
Ерёмка. Мон верасько: тыныд ини, со ужез адӟыны кылдэм дыр. Тон кушты, эн малпа, ношна шуг луоз. Кулэ-уа, мон тыныд кырӟаса сёто?
Пётр (со шоры учкыса). Кырӟан? Кыӵе кырӟанэз?
Ерёмка. Тань кыӵе… (Кырӟа.)
«Кумае, мон доры ветлы,
Яратон-мусое, мон доры ветлы.
Ветлы, ветлы, ветлы мон доры»!
— Тынад, кумае, пуныед урод!
Ой, урод, урод, урод, урод!
Ха-ха-ха-ха-ха-ха!..
Пётр (ӝутӥськыса). Кошкы мон дорысь, улэп дыръяд!..
Ерёмка. Кытчы бен мон кошком? Мон татысь; тыныд яра ини, татын номре ик каронэд ӧвӧл ни… Ужед вал, табере пуны сииз.
Пётр. Мон тонэ виё!..
Ерёмка. Виид ке — ачид ответ сётод… Купеч, эн сяла голбече, аслыд юыны яралоз.
Пётр. Эн споръяськы тон, шайтан! Мар бен кулэ тыныд мынэсьтым? Тон бен кыӵе мурт?
Ерёмка. Вуж кураськись, выль онгро.
Купеч, мон кыл тодӥсько.
Пётр. Кыӵе кыл?
Ерёмка. Таӵе кыл, мар кулэ асьмелы, нярак асьме сямен луоз.
Пётр. Тон зэмез вераськиськод-а, шудыса-уа?
Ерёмка. Мон кутски ке луоз!
Пётр. Кылзы али! тон монэ уд ке ӧрекчаськы, мон тонэ зарнияло.
Ерёмка. Марлы ӧрекчалод! Ми тодӥсьяськисьёс, умой муртъёс — ӧрекчаны ум ӧрекчалэ, асьмелэсьсэ буше ум лэзе, ым доретӥ бушын ум ортчытэлэ.
Пётр. Басьты тон мынэсьтым остатка дэремме. Только уждэ уж кары. Тани мыным кыӵе ужъёс луиз. Адӟиськод-а? (Возьматэ чыртызэ.)
Ерёмка. Марлы дэремдэ! Ужез лэсьтомы, уксё басьтомы, ум ке лэсьтэ — кулэ ӧвӧл. Азьла ик кутскыса ӧжыт юыны кулэ — собере вераськон музон луоз. Тон купеч, туннэ, мар кулэ сое сиид но, юид но, дыр, тынад соин но вераськемед потэ; мынам сютэм улыса чыртые ик куасьмиз, кылылэн тыныд верано кылме верамез уг луы.
Пётр (уксё сётэ). Ме, мыныса ю.
Ерёмка. Тон только уксёдэ сёт, юыны вуисько, милям ми дорысь уз кошкы. (Басьтэ.) Тани тау! Табере вераськыны кутскомы. Мон тонэ, купеч, шӧдӥсько, умой мурт вылэмдэ, тонэныд тодмаськыны луоно. (Урдсаз пуксе.)
Пётр. Вера ини, эн ӝегаты.
Ерёмка. Дугды али. Сказкаез гинэ чаль верало, ужез чаль лэсьтыны уг луы. Тынад вань мӧзмыса сюлмаськонэд, та сюлмаськонэз лэзиллям тыныд тӧлъя: та ужез тунаськытэк уд быгаты. Мынам тодэм мурты вань, ачиз простой гинэ ке но туж быгатэ, со мынэсьтым но умой быгатэ.
Пётр. Кышкыт!
Ерёмка. Кышкыт ке, эн мыны.
Пётр. Оло со нылэз, монэ мед яратоз шуыса туналоз, мон со котырын тэльмырыса медам ветлы, со мон котырын мед ветлоз, мынам кызьы улэме потэ озьы?
Ерёмка. Быгатоз; солэн йыр берыктэмез сюрс иськемысен но луэ. Со тазьы кароз, со дӥньысьтыз потыса кошкыса тон доры мыноз. Только со доры буш киыныд эн ветлы, кулэ штоф вина но ог манет уксё. Со всякой муртын уз вераськы; а кинэн вераськыны мон косо — соин.
Пётр. Ойдо ске мыном.
Ерёмка. Тон туж эн дырты: весь со ужез ужаса уг курадӟы, тодыны кулэ эсэпсэ. Али солэн тунаськон эсэпез уз на ву на; асьмеос со дырозь гулять карыны мыномы. Вань-а тынад уксёед?
Пётр. Эх, тон! Тынад даурад таӵе гулять каремез адӟемед ӧй вал, тани мынэсьтым адӟод.
Ерёмка. Мон тыныд возьмато таӵе интыосыз, только ух! Ӵын карнан кадь. Только уксёдэ дася.
Пётр. Уксё ми сьӧрын.
Ерёмка. Ну, ске яра. Мыном. Тани мон но празнико луи. (Кырӟа.)
Ини мон-а та сюлмаськонлы юртто?
Юртто — юртто — юртто — юртто!
Сцена II
Первой потон
Даша. Кенак, олокин йыга, со ӧвӧл-а? Учкы али!
Афимья. Вить али сое! Табере со кошкиз ини, уйбыт ветлоз. (Ӧсэз усьтыса уте.) Мон верасько, нокин но ӧвӧл шуыса. Марлы бертоз со дӥне, мурт дорын шулдыр бере! Со визьтэм ӧвӧл али, дӥньын пукыны. (Кӧйтылзэ ӝӧк вылэ пуктэ.)
Даша (ӝӧк куспы пуксьыса). Юэ со мынэсьтым вирме! Умоя со мыным: уйшор вуэ ини, со ветлэ.
Афимья. Тон бен мар пукиськод нош? Мын изьы, мон сое огнам но витё. Кудӟыса бертоз но — даллашыны кутскоды — мар бен ӟечез!
Даша. Мон витё ини; мынам туннэ сюлмы интыяз ӧвӧл: солы оломар медаз лу!
Афимья. Дӥне пырытэк кема ветлон ӟеч уз кары… солэн йырыз быроз, дыр.
Даша. Ай, кенак, эн вера, туж кышкасько! (Шыпак луо.) Сиён дасяны кулэ, оло куроз.
Афимья. Мынам дась ини, пуктоно кадь. Олокыӵе муртъёсын но ветлэ, дыр, кин солэсь тодэ! Ведь турлы калык вань: олокыӵе уродэз оломарлы но дышетоз, малпаны но сьӧлык, уйин уг вера ни лучше. (Вушйылэ.) Туж умме потыса кошкиз, урод-нужна адӟон азьын кадь! Вашкалаос верало, нужна адӟон азьын ум нюртэ, шуыса… Оло нош, пересьмемысь-а мар-а? Тон чирды вал кыӵе ке ӟеч кылъёс изён азьын, мон кылзысал.
Даша (книга басьтэ). Мар бен чирдом медам? (Кылзӥське.) Кенак, йыгась вань.
Афимья. Йыгало шол. (Кӧйтыл басьтыса ӧс доры мынэ.)
Даша (ӧс выжыын). Со-а?
Афимья. Ой, туж урод! Мын чалякгес кытчы ке пегӟы: туж урод бертэм, мон шоры но гондыр кадь вазиз.
Кыкетӥ потон
Пётр (пуксьыса). Сиён вай!
Афимья. Казыр, батюшка, казыр! (Ӝӧк вылэ сиён пуктэ.)
Пётр. Тыл ӝуатэ!
Афимья. Марлы бен ини тыл? Нярак изё.
Пётр. Кары, мон мар косӥсько! Нярак пыргыто! Шелепсэ но уг кельты!
Афимья. Вождэ эн потты, дугды али, ваё.
Пётр (юэ). Монэ мыскыл карыны кутскиды! Уд быгатэ! Асме эрик уг сёты! Тырмоз ини мыным, мыскылляды, улляса поттӥды, а мон дӥньын… Ӧвӧл, дугды али! Мон соослы визьтэм мурт ӧвӧл али!.. Быдэс юртэз пыд йылаз султыто! Тон мыным, кенак, тон монэ эн йӧты, йӧтӥд ке-уа… ух!.. Эн шока мон азьын, мынэсьтым вожме эн потты! (Юэ.) Вера дурыссэ: кышно юртысь потӥз-а туннэ? (Уг вазё.) Вера! Мон тынэсьтыд юасько — вера!
Афимья. Тани вот мар, Пётр Ильич, зэмзэ тыныд верано ке: со дӥньысь потыса кошкем гинэ ӧвӧл, быдэскын дӥняз кошкем вал.
Пётр. Йырыныз ик мед быроз! Музъеме ик пыр мед кошкоз!.. Мыным со кулэ ӧвӧл ни…
Афимья. Атай-анаеныз сюрес вылын пумиськыса, берен бериськиз.
Пётр. Медаз адскы со мынам син азям! Виё! Ас киыным ӝикато! Со мыным урод марке, кышно ӧвӧл! Туннэ мыным одӥг мурт вераз со шорын, ваньзэ вераз, со нярак тодэ, со ведӥн…
Афимья. Мар тон?.. Инмар тонэныд! Кинэ тон юлтош кутӥд?.. Мар луиз тыныд?
Пётр. Со мурт вераз: со тыныд кышно ӧвӧл, а урод кый! шуиз. Тани со мыным турын выжыос но сётӥз… Ӝуась алатыр из… Йыр берыктонэз тодэ, тӧлъя лэзе… Вот кенак!..
Афимья. Мар луиз тыныд?
Пётр. Кышкыт мыным! Кышкыт!.. Чаль, пуксьы мон доры. (Бӧрдэ.) Монэ куркаро! Нокин но монэ уг яраты, монэ быдтыны туртто!.. Ваньзы мыным пумит, кышно но, музонъёс но.
Афимья. Нокин бордын но ӧвӧл, ваньмыз ас бордад.
Пётр. Мон юись, мон нодтэм, я, вие монэ!.. Я, виелэ, мыным капчигес луоз. Монэ кин жалялоз? Ведь мон но адями! (Бӧрдэ.)
Афимья. Тырмоз, тырмоз!
Пётр. Мынам Грушалэн яратымтэезлы йыры кур ӧвӧл, мыным обидно — нокинлы со медаз йӧты!
Афимья. Кыӵе Груша шорын тон вераськиськод, возьыттэм?.. Кыӵе нош Груша шедьтӥд?
Пётр. Кыӵе Груша? Тани кыӵе Груша: сыӵе чебер мурт люгыт дуннеын ик ӧвӧл! Мон лулме быдтӥ со понна! Кызьы бен мон солэсь люкиськом на? Милемыз люкыны туртто… Тон со!
Афимья. Кин со? Нокин но ӧвӧл татын.
Пётр. Васька!
Афимья. Мын изьы. Ини тынад син азяд адске.
Пётр. Мон сое виё!.. А кышно?.. Со картлы пумит медаз мыны! Кытын кышно? Вай татчы кышноез! Со мынам кышное, со мынам ляльчие!
Афимья. Со татын ӧвӧл: со кошкиз анаеныз-атаеныз.
Пётр (султэ но кияз пурт басьтэ). Кытчы со кошкиз? Мон сое шедьто! Музъем пыдэсысь потто, ву пыдэсысь но потто!
Афимья. Кытчы тон мынод уйин? Мар тон возьыттэм? Мын изьыны.
Пётр. Тон мыным эн вера! Вай кышноез!.. кышноез вай, шуисько мон тыныд!
Афимья. Татын ӧвӧл со, мон кытысь шедьто!
Пётр. Мон сое шедьто, мон сое шедьто!
Афимья. Мар тон пуртэн шоналляськиськод! Тонэныд татын кышкаса гинэ улы.
Пётр. Мон сое пыдберыныз шедьто!.. Мон сое пыдбереныз шедьто! Табере толалтэ, лымы, пыдберыз нярак адске: толэзь люгыт, нуназе кадь. (Пуксе.) Кышкыт мыным, кышкыт! Тани гӧп потэ… Ух! Кыӵе шаула! Тӥни, тӥни пуныос вузо. Соос мынам йырылы вузо, мынэсьтым быдмемме витё… Ойдо вузэлэ — мон каргиськем мурт!.. Мон ярантэм мурт! (Султэ.)
Афимья. Вот тон, вот тон! Ай, атае, кыӵе кышкыт!
Пётр. Мон со шорын уг вераськиськы, кенак, вовсе со шорын уг вераськиськы. Тани мар: мон кышнотэм луысал ке, монэ Груша ӧй яратысал-а ма? Мон сое басьтысал аслым. Ваньзэ но мыным кышно могатэ, котьмарлы мыным со пумит улэ… Тани со понна мон сое виё… самой со понна.
Афимья. Мар каро мон таин? визьмы ик уг тырмы ни мынам.
Пётр. А, ӟеч-а юлтош! Мар тон мон шоры учкиськод? Мар тон туж учкиськод? Ведь ачид дышетӥд, кызьы кышноез быдтыны!
Афимья. Кинэн со сыӵе вераське — нокин но ӧвӧл. Милям инты, святой инты! Монэ эн йӧты, монэ эн йӧты! Мыныса сайкато али няраксэ! (Потыса кошке.)
Пётр (Ерёмкалы). Мар тон вераськод-а? Ну, озьы! Мон но верасько, чудак-адями! Валче мыномы! Чалякгем, чалякгем! (Дугдэ.) Ха, ха, ха! Тон тумошо адями! Тани пурт! (Потыса кошке.)
Куиньметӥ потон
Афимья (ӧс шоры учкыса). Кошкиз, кошкиз! Ӧсъёсыз нярак пась кельтэм. Муртъёсыз лэзьыны кулэ утчаны. (Кошке.)
Даша. Тани, анай, ачид тон адӟы ни, мынэсьтым кыӵе улэмме!
Степанида. Эй, тон, яратон нылы, йырыд нужна адӟыны кылем!
Агафон. Дугды али, нылы, вождэ эн потты. Картэныд ӧжыт гинэ улыса но зарланӥськод уг.
Даша. Бен мон мар витём на азьлапаллы, атаез но солэн куштыса кошкиз быдэскын?
Агафон. Атай куштӥз ке но, оло, Инмар уз кушты. Чидаськы.
Даша. Мон туж чидасал, курадӟонэ мынам чидантэм. Мон сое кур уг кариськы, Инмар ӟеч мед кароз, только соин валче улэме уг поты.
Агафон. Та ваньмыз но ӟеч ӧвӧл! Ох, ох, ох! ӟеч ӧвӧл! Тон бен ачид ӟеч уж лэсьтӥд-а? Тон но лэсьтӥд уж, милемыз анаеныд кыкнамес куштыса кошкид? Озьы ик та кулэ-а? Закон сямен но озьы ик кулэ-а та? Шайтан тӥледыз озьы каре! Тӥ адями кадь ик ӧвӧл ни! Тани тон чида ини табере! Нужна адӟонэдлы вождэ поттытэк Инмарлы тау кары. А тон кошкыны турттӥськод! Со бен кыӵе луоз? Тынад кытысь адӟемед вань, карто-кышноослэсь нимаз улэмзэс? Тон сое кельтод, куштод сое, а со ассэ ачиз быдтоз — кин бен соку винамат луоз? Яке висьыны кутскоз, кин бен сое утялтоз? Та ведь ваньмыз тынад ужед! Оло, со кулоно, тонэныд ӟеч кылъёс вераськыны турттоз, а тон чурыт мылкыдыныд со дорысь кошкыны турттӥськод…
Даша (атаезлэн чыртыяз кечыриськыса). Атае!
Агафон. Тон малпаськы, яратон нылы, ӟечгес малпаськы. (Бӧрдэ.) Нодтэм мурт ведь ми, ох, кыӵе нодтэм!.. Чурыт мылкыдо асьмеос!
Ньылетӥ потон
Вася. Эй, Инмаре! Мар та таӵе? Мар луиз тӥ дорын?
Афимья. Бен мар?
Вася. Пётр Ильичез мон адӟи асьме шур дорысь, шораз учконо кадь ӧвӧл, туж кышкыт, йыраз изьыез ӧвӧл, кияз пуртэн бызьылыса ветлэ; вуэ усемезлэсь туж кышкыт.
Даша. Мар бен луиз солы таӵе!
Вася. Тӥ коть кинэ ке лэзе вал сое вайыса бертыны.
Афимья. Турлы пала лэзимы, лэзёно муртмы но ӧвӧл ни.
Агафон. Ойдолэ асьмеос мыноме утчаны!
Даша. Ойдолэ мыноме!
Витетӥ потон
Пётр (котыр утчалляське). Кин со отын? Тӥ кыӵе муртъёс? Кышно! Тӥ улэп муртъёс-а ӧвӧл-а? Вералэ мыным, буркарик!
Даша. Мар луиз тыныд?
Пётр. Мон каргиськем мурт, мон тӥ шоры но учкыны уг сылӥськы ни! Муртъёслэн вӧсяськем вӧсьсы ӧй ке луысал мон понна, мон тӥ шоры ӧй учкысал ни. Инмар понна куштэлэ, ӟеч муртъёс, мынэсьтым урод улэмъёсме! (Пыдес вылаз пидса.)
Агафон (ӝутыса вера). Мар тон, мар тон, Пётр Ильич? Султы, султы!
Пётр. Мон ведь сьӧлыко мурт, туж урод сьӧлыко!.. Мон тӥ азьын сьӧлыкъёсылы ӧкыно, мынам лулылы капчигем луоз. Тани весь юса ветлон монэ мар кариз: мон ведь кышноме виыны турттӥсько вал… шектэм (винаматтэм) муртэ виыны турттӥсько вал. Пурт басьтӥськем но кудӟеменым со сьӧрын бызьылыса ветлӥсько кадь потэ. Мынам син азям адско оломар маркеос, тодымтэ ят муртъёс, соос мон дорысь кошко, мон соос сьӧры бызисько… бызисько… Мон соослэсь юасько: кышно кытын шуыса? Соос серекъяса олокуд пала возьмато. Мон весь мынӥсько-мынӥсько. Кескентэк олокытын чан шуккизы… Киме ӝутыса ути но, мон йӧ вылын, люкмеслэн дураз ик сылӥсько… Малпаны но кышкыт! Али но вылтырам кезьыт ву кисьтэм кадь улэ! Мынам улонэ весь уродэн ортчиз, али но син азям адскыса улэ! Мон туж кышкыт — урод ужъёсыз адӟылӥ, со ик кулэ вал мыным, ужелы кӧре! Соку мынам тодам усиз атаелэн ӟечлы дышетэм кылъёсыз но, со вера вал: урод улӥськод — быдмод шуыса. Тани солэн верам зэм кылъёсыз сямен ик луиз. Мон та уез огпол но уг вунэты, кулытозям но вунэтоно кадь уг потӥськы! Вармес анай, вармес атай, огвадес ми дорын улэлэ вал!.. Ӟеч муртъёс, юрттӥськелэ мыным, та сьӧлыкез быдтыны!.. Атае доры но мыныса вералэ… Мон ачим мыныны уг дӥсьтӥськы.
Вася. Инмар тыныд мед юрттӥськоз!
Агафон. Верай ведь, нылы, мон тыныд!
Даша (Пётрлэн чыртыяз кечыриськыса). Гажан-мусое, Пётр Ильич!