Кызьы улэмед потэ, озьы эн улы (Островский)/2
| ← Нырысетӥ действие | Кызьы улэмед потэ, озьы эн улы Кыкетӥ действие Автор: Александр Николаевич Островский Удмурт кылэ берыктэмез: А. Садаковлэн |
Куинетӥ действие → |
| Поттэмын: 1855. Источник: Островский А. Н. Кизьы улэмед потэ, озьы эн улы. — Казань: Казанский Вотский Издательский Подотдел, 1920. — С. 15—26. |
Кыкетӥ действие
I · II · III · IV · V · VI · VII · VIII · IX · X · XI потон
Первой потон
Спиридоновна. Ойдо кыткы чалякгес!
Яков. Мар бен, Анна Спиридоновна, мон тыныд сезьы поннад уксё тырмыт сётӥ, кызьы кулэ озьы.
Спиридоновна. Ну, сётӥд ке — быдмиз вераськон.
Яков. Тодмо ведь… мар бен та таӵе… Казыр Вӧйдыр, ми кадь муртэ винаен сектад ке но яра.
Спиридоновна. Тӥ тани, жид кадь, лулэз ик кыскыса поттоды али. (Вина сётэ.)
Яков (юэ но бамзэ ӵуше). Тау тынад.
Спиридоновна. Тон Бунькове пырыса тае кырыж Мишкалы сёты.
Яков. Зэмез ик зэм мар веранэз, Кырыж Мишка музон мурт сярысь быгамгес луоз. Только алигес Буньковысь председательзы ямщикъёслы приказ гожтӥз: Тӥ, кылсярысь, куспады шыбага куштӥды кинэ вайыны, куд палыз кыдёкын, со сямен ик ваелэ, соос куспазы медаз споръяське, пумит но медаз вазелэ.
Кыкетӥ потон
Груша (тэтчаса киыныз чапке). Ох, туж кынми, быдэс мугоры кынме!
Спиридоновна. Марлы ке ёрмыса сылӥд-а ма кезьыт азьын? Кин ке тонэ коркась улляз-а ма?
Груша. Урамын туж шулдыр ведь: пиос ветло, нылъёс ветло, кырӟало: кошконо кадь ӧвӧл соос дорысь. Мон шунасько но нош пото. Мыным оломарлы туннэ туж шулдыр потэ.
Спиридоновна. Мӧзмыса пукод-а ма? Марлы бен мӧзмод? Ализэ ӟеч улӥськомы, ношна но ӟеч улыны малпаськиськомы. (Ямщиклы.) Тон мар нош татын ветлӥськод на? Мын кыткы!
Яков (йырзэ кормаса). Мынам Вӧйюон дыръя одӥг но кошкеме уг поты вал.
Спиридоновна. Тӥледлы весь ветлон гинэ! Мын! Мын! (Донга сое; ямщик потыса кошке.) Мын, тӥни секта купечъёсыз винаен; соос вал витьыса пуко. Тумошо поттыса, вераськыса пукы соосын, маеке ӧрекчаса вераса пукы, соос ведь сыӵеез кылзӥськыны ярато.
Груша. Бен мон кызьы мыном соос доры!.. Соос, мон борды лякиськыса, чупкарыны туртто: мон сыӵе улонэз одӥг но уг яратӥськы! Мынам асьме гурт пиосын но ветлэме уг лу.
Спиридоновна. Тон борды соос уз лякиське ведь? Мон нош туж яратӥсько купечъёсыз. Тани мон ини дас ар ӵоже постоял двор кутӥсько, дас ар ини тылын ӝуам кадь улӥсько, одӥг мурт но мон сьӧры уз вуы, мон соосыз уно адӟи ини. Мон тынад атаед кулыку, пинал кыли; ми соку Буньковын двор кутӥмы. Куд ке дыръя лыктыса пырозы вал — соку си-ю, шулдыръяськы гинэ! Мон купечъёслэсь улэмзэс туж яратӥсько. Только астэ умой возьма: кылыныд коть мар вераськы, а кидэ эрик эн лэзьы — тани мынам сямы! Тани таиз… Кызьы али со? Пётр Ильич-а мар-а? Марась со ӵем ветлыны кутскиз?
Груша. Мустэм, ас понназ ветлэ, нунал ортчытыса. Улляса уд лэзьы ведь сое.
Спиридоновна. Марлы сое уллялод, оло асьмелы ик кулэ луоз. Тон сое, Груша, утьы, йываты, только ас дорад матэ эн лэзьы. Кышно басьты шуы, вот солы мар вераны кулэ, ветлонэз уз луы шу, а милемыз уд ӧрекча шу. Али мед ветлоз но салам мед нулдоз. Мар соос шоры учконэз!
Груша. Малпаськы али, анай! Кызьы бен мынам картлы кошкеме потоз! Ныл дыръя гинэ ветлод эркын. Картлы кошкыса улон озик но тырмытоз али! Ныл дыръя гинэ ветлон, ветло али мон но!
Спиридоновна. Даурдэ тон ныл луыса пукод-а ма, ӟеч-узыр муртлы кошкид ке — чебер тылобурдо кадь ветлод. Вань адями пальмоз! Тӥни кыӵе ӟеч луоз улонэз! Си, ю мар сётӥзы, валем тышак вылад выды, только нимаз кошкы. (Потыса кошке.)
Куиньметӥ потон
Груша (огназ). Карт дорын улон шуг! Картэдлы ярамон улы, олокыӵеез сюроз нош… Соос кышнотэм дыръязы няракзы но ӟечесь луо! Нош со тонэ турлы секыт уж ужатоз. Ми нылъёслы улон туж шулдыр: кажной нунал праздник, ветлэмед уг ке но поты — ветлы! Ужамед ке потэ — ужа, кырӟамед ке потэ — кырӟа!.. А кин ке мылкыдэ яраз ке, милемыз возьмаса улэмед луоз-а ма: нылъёс кадь уёл нокин но ӧвӧл. (Кырӟа.)
Ньылетӥ потон
Спиридоновна. Тани мон тон доры куно вайи. Пуксьы, Пётр Ильич. Шубадэ кушты.
Пётр. Кулэ ӧвӧл, мон минутлы гинэ тӥ доры ортчыса кошкыкум пыри.
Груша. Малы бен минутлы гинэ? Ойдо пукы.
Пётр. Нуназе умой ӧвӧл: тӥ дорын ӧжыт-а адями ветлэ — адӟозы.
Груша. Тон бен кинлэсь кышкаськод?
Пётр. Мон лучше ӝыт лыкто, соку шудом-серекъялом.
Спиридоновна. Пукы ойдо, пукы, эн кышка, татчы нокин но уз пыры. Нош лыкты, ми туж витёмы. Вина ю али.
Пётр. Юэме уг поты.
Спиридоновна. Ойдо эн битчаськы. Ю.
Пётр. Вай ске. (Юэ.) Тау.
Спиридоновна. Вот тани озьы кулэ… таза луы! Мон ёрми ини, нуназе но, ӝыт но кудӟемын, син азь ӵынкыт кадь, зэм ик, та арня весь таӵе. (Кошке; Груша со сьӧртӥ ӧсэз борӟа.)
Витетӥ потон
Груша. Марлы бен тон туннэ вождэ поттыса улӥськод? Мыным вожед потэ-а, оло?
Пётр. Мон туннэ асме уг валаськы; мӧзмыт, уже-пуме вань.
Груша. Тон эн мӧзмы! Мар со мӧзмон луоз! Ске ыӵе, мынам гажанэ, мусое. (Кырӟа.)
Мынам гажан муртылэн
Сюлмаськон-мӧзмонэз адӟемез ӧй вал;
Туннэ пеймыт уйын
Сюлмаськон-мӧзмон нюртӥз.
Пётр. Мон тонэ туж яратӥсько! Мон малпаськисько, тон мынэсьтым йырме берыктӥд-а, оло, шуса!
Груша. Мар тон вераськиськод! Инмаре мед утёз!
Пётр. Басьты тон лэчыт пурт, ванды монэ, мыным капчигес луоз.
Груша. Мар бен тыныд луиз?
Пётр. Мон шудтэм мурт! Номре но мон уг валаськы, номре кареме уг луы. Мынам йыры котыр берга! Ӵын пушкын улэм мурт кадь улӥсько!
Груша. Марлы бен со озьы? Вера.
Пётр. Вера тон мыным шонерак, мон мед тодом вал: яратӥськод-а тон монэ?
Груша. Мынам яратэме тодмо ук.
Пётр. Зэм-а тынад кылыд?
Груша (юн ӟыгыртыса вера). Тани тазьы яратӥсько!.. Тани тазьы!
Пётр. Груша, ске тон монэ тазьы яратӥськод? Ну табере мыным дунне вылысь номре но кулэ ӧвӧл ни! Вера тон мыным табере: аскыд лулдэ быдты мон понна! — быдто, синме но кырмыт уг кары.
Груша. Мар тон, мар тон?! Ӟеч ӧвӧл! Сыӵе кылъёс верало-а ма? Куд часын вералод медам. Тани милям дурись Ерёмка таӵе весь аслаз лулыныз карганоз вал, ассэ бытмонтэм пыдэстэм интые уськытоз али… Тон бен мар карод на таӵе уродлэсь! Сое турын сиге липет улаз ик пыртӥллям. Мырдэм васькытӥмы, быдэсак купыртэм. Таӵе урод марке вал та Ерёмка! Кыӵе гинэ урод ужъёсыз ӧй вал солэн! Кык пол ву басьтон люкмесысь поттӥмы, солы ву ӟазеглы кадь гинэ.
Пётр. Мар бен мыным асме жалянэз на? Мынам озик но йыры бытмоно. Бытмоно йыры мед бытмоз! Вера, мынам шундые, мар тыныд кулэ: зарни-а, азвесь-а, дуно изъёс-а — асме заклад поныса, тыныд салам сёто.
Груша. Номре ик мыным, гажам-мусое, кулэ ӧвӧл, мынам аслам ваньбуре тырмымон. Тани тон мар кары, гажам пие: яраты тон монэ, мон тонэ яратэм кадь.
Пётр. Эх, ныл! мар ӧвӧлтэмез вераськиськод! Адӟиськод ведь тон, мон казыр кыӵе! Куры, мар куремед потэ. Дуно марке куры!
Груша. Мар бен тынэсьтыд куроно! А вот тон мар: татчы чальгес ветлы но ческыт праникъёс нулды; собере горд тасма вайы но мон шоры умой учкы, яратыса чупкары… ха-ха-ха!.. Нош одӥг кылме вераны вунэтӥськем, кемалась вераны малпасько вал: басьты тон мыным зундэс.
Пётр. Одӥг ӧвӧл кык ваё.
Груша (кырӟа).
Мыным дуно ӧвӧл тынад саламед,
Дуно тынад яратэмед!
Тынэсьтыд зарни зундэстэ
Сюлэм шорам поныса возё.
Милям татын, вань кадь нылъёслэн но гажам пиоссы вань. Учкы али праздник дыръя, кыӵе шулдыр луэ: урамын пуко вочак огазьын; тон огпол но монэным уд ветлӥськы. Мон коть зундэстэ возьмато, мынам но яратон, оскон пие вань шуса. Тон ӵукнагем лыкты: тройка вал кыткомы но нылъёсыз пуктомы, кырӟаса ворттылыны потомы.
Пётр. Вай кидэ! (Кизэ кутэ.) Уж луиз ни! (Солэсь кизэ чапке. Груша йырзэ сэзъя.) Асьмелы бен марлы нылъёс! Асьмеос кыкнамы ворттыломы.
Груша. Марлы уд поты!
Пётр. Потод-а?
Груша. Зэм ик пото.
Пётр (чупкаре Грушаез). Вот тае яратӥсько! Та асьме сямен. Мын, учкы, кин ке ӧвӧл-а коркан я гидкуазьын.
Груша. Мар туж чаль? Пук али.
Пётр. Казыр уг ваньмиськы. Ӝыт асьмелэн весь.
Груша. Ну, уг ке лу, кулэ ӧвӧл. (Потыса кошке.)
Куатетӥ потон
Пётр (огназ). Эх! Гулять каро ини! Эх, кыӵе чебер нылэз ас палам карыны быгатӥ! Милемыз-а нылъёс уз яратэ?
Сизьыметӥ потон
Груша. Мын, нокин но ӧвӧл отын, только олокыӵе пересь кышно гинэ лыктэм, со но татысь ӧвӧл.
Пётр. Ну, ӟеч лу!
Груша. Ӟеч лу, ӟеч берты!
Та ныл даурын шудӥськод ведь! Тани пиосмуртэ ас дорад дышеты али, со дорысьтыд кошкытэк котырад ветлоз. Оломарлы со куд ке дыръя серем бамо, шулдыръяськыса улэ, куддыръя весь малпаськыса пуке? Марке но вань солэн лулаз. Оло, со урод уж лэсьтыны малпаське… Озьы ке луиз, ми анаен кыкнамы ӧсэз но возьматом, милям кыдёкын уз лу! Озьы ке но жаль потоз. Тани шудон, шудон сямен мон сое яратыны кутски но: сюлмы сэректэ, сюлмы шудэ, дыдыклэн кадь.
Тямысэтӥ потон
Степанида. Нылы, шунтӥськыны луоз-а тӥ дорын, шунтӥськысал гур дорад?
Груша. Шунтӥськы, кенак.
Степанида. Тани мон татчы дӥсьме но котомкаме но поно… Туж жади… Ӧжыт гинэ кынми но; матын ӧвӧл ведь лыктонэз, куиньметӥ таульыксэ ини сюрес вылын. Сюресэз бен кыӵе шуг; ини вӧй вуиз, азьла сюрес ӧвӧл ни. Ох, ох, ох! Пересен кыкнамы Муское лыктӥмы, нылы, нылмес тодыса кошкыны, только ум тодӥське, кытын улэмзэ. Шунтӥськыса одӥг уй кӧломы но ӵуказе утчалом али.
Груша. Кызьы бен тон, кенак, нылыдлэсь кытын улэмзэ уд тодӥськы?
Степанида. Мынам Муское лыктэме ӧй вал, чаль валаса уд вутты; куазь но ӝыт луэ ини.
Груша. Со бен татын картлы кошкемын-а?
Степанида (гур доры пуксе). Тани, нылы, уж кызьы луиз, тон валалод. Милям городмы быдӟым сюрес вылын; ми мещан. Ми асьмеос куанер улӥмы ке но, милям юртмы туж умой. Ми доры купечъёс но чино выжыос пырыло. Милям семьямы эшто ӧй вал: мон картэным но Дарья нимо нылмы; мынам картэ пересь ини. Ми доры ортчыса кошкись пинал купеч пыриз, со Дарюшкамес йыватыса лӧпшатэм. Ми тае ӧм ик шӧдэ. Кылем арын, святка вадьсын, нылмес нуса кошкиз ми дорысь.
Груша. Адӟод вылэм!
Степанида. Со сямен нуса кошкиз. Мар сюлмаськон, бӧрдон луиз милемлы! Мар бен карод на, уд берыкты ни. Мускоысен гожтэт гинэ лэзе на милемлы. Тани гожтэтэз но сьӧрам али… весь сьӧрам нулдӥсько. Муское кызьы вуэмзэ, бакельлык но курыса гожтэ милесьтым, со купеч нылме аслыз кышно басьтэм, солэн семьяез но вань, вузкаре но, мар кулэ соиз вань, нылылэн улонэз ӟеч, куспазы огзэс-огзы яратыса уло.
Груша. Кыӵе шудо вылэм нылыд! Узыр купечлы кошкем! Чебер вылэм, дыр, со?
Степанида. Туж чебер вал! Табере уг тодӥськы ни кыӵе: оло, сюлмаськыса куасьмем но, валлян со туж чебер, тыр бамо, тӧдьы йырсиё вал… Тани астэ учкы али, тон кадь ик чебер вал.
Груша. Мон чебер-а ма, ӵужонэн буям кадь.
Степанида. Тон туж умой чебер ныл, мар тон астэ курласькод, тонэ но чебер пи басьтоз али.
Груша. Кызьы шудэд потоз, кенак, чебер эн вордӥськы, шудо вордӥськы, шуо вашкалаос.
Степанида. Эн закра, нылы, муртлэн шудэзлы. Ми туж шумпотэммы вал, Инмар солы сыӵе шуд сётэмезлы, солы умой мурт сюриз шуса. Кызьы бен шум уд поты? Аслад виред, аслад висёнэд. Только та гожтэт бераз номре но уз на гожты на, со шорын номре но ум на кылы на — улэп-а со ӧвӧл-а. Лыктыны дасяськеммы вал, юрт возьмасьмы ӧвӧл; алигес кылӥмы ми, ми дортӥ ортчыса кошкисьёслэсь, солэн картэз урод улыны кутскем, юртаз пырытэк юыса ветлэ шуса. Чидаммы ӧйло ни, пересен кыкнамы дасяськимы но лыктоно каримы. Карындашмы узыресь, куно карозы-а уз-а; куддыръя луэ, анаез но улляса потто. Туж мӧзмисько мон нылылэсь! Вань синме быдтӥ ини бӧрдыса, сиеме-юэме но уг пот ни… Ачид малпаськыса уть али.
Груша. Мар веранэз.
Укмысэтӥ потон
Степанида. Мар тон таӵе, пересь, кема улӥд?
Агафон (путозэ пертчыса вера). Мон вал бордын турчки: юски, гидэ пыртыса, турын понӥ. Пудо-животэз жаляны кулэ: со ведь уз вера. Ну, тани, пересь, Инмар вуттӥз, лыктыса вуимы, а тон весь дыртӥськод вал. Марлы дыртонэз? Каллен мынӥд ке, кыдёке вуод, шуиллям.
Степанида. Мынам тужгес ик но нылме адӟеме потэ вал.
Агафон. Тани адӟод али, Инмар юрттоз ке. Дыртыны ноку но кулэ ӧвӧл, ас черодэз вуоз али.
Степанида. Мон уг малпаськы вал улэпкын вуо шуса. Бызьыса лыктоно кадь потӥсько, пыды пересьмиз ини.
Агафон. Мар бызёнэз? Ну, мар бызёнэз бен? Марлы? Кышномурт визьтэм, марлы бызёнэз? Асьмеос лучше каллен гинэ лыктыса пыромы… Котьмарлэн но ас даурыз, ас эсэпез вань. Потты али мыным пуйыысь табань, ӧжыт сиёмы.
Степанида (пуйыысь поттэ). Ме тыныд небытэзгес, чурытсэ йыръемед уз луы.
Агафон. Яралоз ойдо. Тань та мынам пиньылы кӧре. (Шыпак гинэ сиё.)
Степанида. Мар ужа медам казыр асьмелэн Дашамы, одӥг синмыным ке но учкысал.
Агафон. Марке но аслэсьтыз ужзэ ужа, дыр, мар кароз: солэн юртэз вань — юрт ужзэ ужа, дыр; соос узыр муртъёс, асьмеос кадь куанер мурт ӧвӧл.
Степанида. Солы шуг потэ, дыр, ят семьяын улонэз!
Агафон. Со ят семьяын ӧвӧл ни, аслаз семьяез.
Степанида. Муртъёс верало, сое картэз уг яраты шуса.
Агафон. Мар но уг верало: вань кадь кылэм кыллы оскыны уг яра.
Степанида. Асьмемыз адӟиз ке, кыӵе со шумпотоз.
Агафон. Шумпотоз шол. Пересь! ӧжыт возьдаськоз, дыр, со асьме шоры учкыса. Кызьы тон малпаськиськод?
Степанида. Мар бен возьдаськонэз? Инмар ачиз тодэ, дыр, асьмеос но сьӧлыктэм ӧвӧл.
Агафон. Тодмо со, сьӧлыктэм ӧвӧлэз… олокызьы нылпилы атай-анаез кылзытэк улон уг кельшы, уг яра.
Степанида. Мар бен, Агафон Потапыч: тон ведь соку азьла ик ачид простить кароно карид угось.
Агафон. Мар бен куштонтэмез! Мон сое яратӥсько вал, со мынам одӥг гинэ вал; кинэ яратӥськод, солы простить кариськод… Мон урод муртлы но простить каро, мон нокинлы но урод уг малпа. Мон огнам гинэ судья-а ма солы? Инмар бен? Инмар куштоз-а бен? Оло, атай-анайлэсь вожзэ поттэм понназ картэныз куспазы урод уло? Маин тодӥськод?
Дасэтӥ потон
Спиридоновна. Казыр, матушка, казыр! Ӧжыт гинэ витьы али, чебер нылы. Ӟеч валъёсыз кыткозы тыныд, туж чаль нуса вуттозы. Витьыса пукы али тани татын. (Даша пуксе ӝӧк доры.) Мар тон, бӧрдӥськод, лэся? Атайдэ-анайдэ адӟемед потэ-а ма? Оло, кыӵе ке сюлмаськонэд вань-а?
Даша. Номре ӧвӧл.
Спиридоновна. Мар мӧзмиськод, туннэ Вӧйдыр. Учкы али, адями кыӵе ворттылэ. Вӧйдыр огпол лыктэ арлы, сое праздник карытэк но уг луы. Зэм ик верасько, йыры туж висе.
Агафон. Кинлы ке вӧй, кинлы ке визь дыр. Ох, ох, ох…
Спиридоновна. Зэм ик, озьы со. (Грушалы вера.) Пон али, Груша, та вуж табанез; ӝыт сиыны яралоз.
Груша. Казыр, матушка. (Ухват басьтэ.)
Спиридоновна. Кыдёкегес пукты, кыдёкегес. Тани таоссэ… тани та гӧршокез но.
Даша (кырӟасагем вера синкылиез потыса).
Лобыса мон кошко кукы папа кадь
Лобыса кошкысал анайлэн улон палаз.
Степанида. Мар та бугыли туж мӧзме?
Агафон. Талэн улонэз капчи ӧвӧл, мӧзмем дыр.
Даша (нош кырӟа).
Пуксё мон садэ умо пу вылэ,
Кырӟало пиналъёс кадь чебер куараен
Степанида. Асьмелэн-а, оло, со ятын улӥсь нылмы?
Агафон. Мар тон, мар тон, пересь!
Степанида. Мон потыса утё али. (Даша доры матэгем мынэ.)
Даша (султэ пыд йылаз). Анай! тон-а та?
Степанида. Нылы!.. нылы!.. (Даша анаезлэн чыртыяз кечыриське.) Яратон нылы, горд шундые, шунды потон дыръя потӥсь кизилие, учкыса тыронтэм ваньбуре!.. (Пуксе.) Потапыч, чаль али татчы.
Агафон (лыктэ). Мар луиз отын?
Даша (пыд йылаз султэ). Атыкай! простить кары вал, тынэсьтыд кылзытэк улэмме! (Йыбырттэ.)
Агафон. Мар тон, мар тон!.. Инмар мед куштоз, Инмар мед куштоз! (Пуксе.)
Степанида. Кызьы бен асьмеос пумиськимы таӵе! Мон тае ӧй витьы, ӧй но малпа…
Даша. Эй, атыкае, мон, тынад син шорад но учкыны эркенӥсько.
Агафон. Ну, марась бытмем ужез буре ваёнэз на!.. Инмар ӟеч мед кароз! Кин быдмем ужез буре вае, солэсь синзэ потто. Кытчы бен тон, нылы, мыныны дасяськид — вера тон мыным?
Даша. Тӥ доры, атыкае, мыныны дасяськи.
Агафон. Та яра, ӟеч уж, тодад усиз-а? Картэд бен лэзиз-а тонэ?
Даша. Ӧвӧл, атыкае.
Агафон. Кызьы бен со ӧвӧл? Кызьы ӧвӧл?
Даша. Атыкае! мон тӥ азьын ватыса уг улы: ми азьла Пётр Ильичен туж ӟеч улӥмы, со монэ яратыса улӥз
Собере оломар луиз, юртэ пырытэк ветлыса юыны кутскиз, дӥне ӧжыт гинэ пыре но монэным дугдытэк споръяське…
Агафон. Бен мар луоз?
Даша. Кажной нунал кесяськон но споръяськон. Мар карод бен, та сюлмаськонлы но чидасал: атай-анайлэсь мырт кошки солы. Эй, аныкае-мусое, монэ вордӥсь анае, со монэ воштӥз олокинэн… (Чыртыяз кечыриське Степанидалэн.) Капчи-а со мынам сюлмылы?
Степанида. Мар тон, нылы, мар тон?
Даша. Туннэ, мыным Вася вераз, со ми доры ветлэ. (Киыныз шоналтыса.) Солэн юлтошкыз!.. (Синкылиен бӧрдыса.) Ассэ пинал пи шуса, ӧрекча нылъёсыз, тӥни со мар каре монэ! (Нош ик анаезлэн чыртыяз кечыриське.)
Груша (ухватсэ куштыса). Ай, анае! ай, ай!..
Даша. Люкизы монэ сюлмысь яратон-гажанэлэсь…
Груша. Ой!.. Сюлмы мынам!
Даша. Люкизы монэ солэсь урод муртъёс!
Груша. Аныкае! Ведь та мон сое люкись!
Спиридоновна. Мар бен тон бӧрдӥськод, соос шоры учкыса-а ма?
Агафон. Ну, мар бен тон таӵе? ну, мар бен?
Даша. Тӥ доры, атыкае, мыныны дасяськи; нош ик тӥледын валче улыны.
Агафон. Кызьы со ми доры? Марлы ми доры? Ӧвӧл, берытском али; мон тонэ картэд доры нуса мыно.
Даша. Уг, атыкае, уг мыны мон со доры.
Агафон. Тон малпаськы али, визьтэм, малпаськыса уть али — кызьы мон тонэ басьтом ас дорам? Со ведь тынад картэд? (Султэ.) Ойдо мыноме. Мар ӧвӧлтэмез вераськонэз, луонтэм ужез! Огазе люка, пересь, дӥсьёстэ, огазе… Кызьы тон картэд дорысь кошкиськод, визьтэм? Тон малпаськод, дыр, мыным тон жаль ӧвӧл, дыр, шуса? Тани ваньмы огазьын бӧрдомы тон понна, тынад сюлмаськонэд понна — тани милям вань кадь юрттӥськонмы! Мынам бен мар кареме луоз? Тонэныд бӧрдыны ке — мон бӧрдо. Ведь мон тынад атаед, мынам гажам-яратон, нылы! (Бӧрдыса чупкаре сое, собере аскыз дӥськутсэ басьтыса со доры лыктэ.) Тон вала али, яратон нылы: Инмарлэсь валче каремзэ — адямилэн люкемез уг луы. Асьмелэн атайёсмы но озьы улӥллям, куспазы тэрыса улӥллям — вожзэс поттымтэзы. Асьмеос соослэсь визьмогес-а ма? Ойдо картэд доры мыном. (Сое китӥз кутыса, потыса кошко. Степанида но соос сьӧры потэ.)
Дас одӥгетӥ потон
Груша (бӧрдыса). Аныкай, ведь кышноез со!
Спиридоновна. Кинэ бен, со шуиськод?
Груша (бамзэ киыныз кутыса, ӝӧк доры пуксе). Пётр Ильичез!