Si̍ng-ging/Cho̤̍ng-sa̤̍-gi̍/4
Dā̤ 4 Ca̤uⁿ
[edit]4:1 A̍-do̤ng gah lāu-mâ Hā-hua ceo̍ seo̍h báng-ga̤ⁿ; cuh dua̍-sing saⁿ Gai-ṳ̂ng, (Gai-ṳ̂ng huang-i̍h cuh sī "Deh da̤u̍h" ē i̍-gī) gô̤ng, Cṳ̂ sâi guâ deh dah-bo-giô̤ⁿ.
4:2 Buh saⁿ Gai-ṳ̂ng i-dī A̍-beh. A̍-beh sī n̍g-á̤uⁿ ē náng, Gai-ṳ̂ng sī ceo̍-chéng ē náng.
4:3 Ū seo̍h di̍h, Gai-ṳ̂ng ta̤̍h tó-sâng he̤̍ng keoh Cṳ̂.
4:4 A̍-beh ta̤̍h táu seo̍h tai saⁿ ē á̤uⁿ, léng ca̤̍ á̤uⁿ-iú lí he̤̍ng; Cṳ̂ ka̍ng-go̍ Â-beh léng i̍ sê̤ he̤̍ng ē mo̍ih-nō̤:
4:5 beó ka̍ng-go̍ Gai-ṳ̂ng léng i sê̤ he̤̍ng ē mo̍ih-nō̤. Gai-ṳ̂ng cuh bi̍ng-mi̍ng duā siū-ki̍.
4:6 Cṳ̂ gah Gai-ṳ̂ng gô̤ng, Dṳ̂ bi̍ng-mi̍ng siū-ki̍ seo̍h-moi é̤ng-go̍ lē?
4:7 Seh-seô dṳ̂ héng-sēng, meh bā̤ gi̍ng siū-da̍h lō̤? Dû nō̤ héng-o̤h, cōi-gia̍h cuh ho̤̍h leo̍h móiⁿ-sá̤ⁿ; i iā dih-dih siô̤ng-bō dṳ̂, dṳ̂ ho̤h beoh guâng i.
4:8 Î-hā̤u Gai-ṳ̂ng gah i-dī A̍-beh seo̍h ca̤̍ lái-le̍h; nn̄g gá̤ náng leo̍h chéng do̤-ng, Gai-ṳ̂ng cuh bā-î pā i-dī A̍-beh, tái i.
4:9 Cṳ̂ ka̍ng Gai-ṳ̂ng gô̤ng, Dṳ̂-di A̍-beh deó deoh-leo? Gai-ṳ̂ng i̍ng gô̤ng, N̄g-cai: guâ meh sī ka̍ng-guâng guâ-dī ē náng lō̤?
4:10 A̤-Hó̤-Hua gô̤ng, Dṳ̂ ū ceo̍ seo̍h-moi? dṳ̂-dī ē hā̤ ū siaⁿ-ing iú dā̤ lē huā giú Guâ.
4:11 Dā̤ kio chu̍i, iú dṳ̂ chiû lē cī dṳ̂-dī ē hā̤; dṳ dih-dih siū mo̤̍, bā̤ deh ca̤̍ dā̤ ē lī-ih.
4:12 Dṳ̂ geng-ce̤̍ng dā̤, dā̤ n̄g ca̍i ta̤̍ dṳ̂ cheoh-li̍h; dṳ̂ dih-dih liú-dō̤ng leo̍h dā̤-sā̤uⁿ.
4:13 Gai-ṳ̂ng du̍i Cṳ̂ gô̤ng, Guâ siū diāⁿ-cōi cīng dāng, si̍h-si̍h bā̤ dng-dih kî.
4:14 Cṳ̂ da de̤̍h Guâ lī ca̤̍ dā̤: n̄g é̤ng guâ ca̍i gi̍ng Cṳ̂ ē mi̍ng: guâ gi̍-céng pa̤u-liú leo̍h dā̤-sā̤uⁿ, háng náng gṳ̄-da̤u̍h guâ, dih-dih tái guâ.
4:15 Cṳ̂ cuh gah Gai-ṳ̂ng gô̤ng, Háng tái Gai-ṳ̂ng ē náng dih-dih siū hua̍h chih bōi. Cṳ̂ cuh ta̤̍h gi̍-heō seo̍ keoh Gai-ṳ̂ng, mêng-dih náng seo̍h gṳ̄-da̤u̍h cuh tái i.
4:16 Iú ciâ Gai-ṳ̂ng te̤̍, lī Cṳ̂ mi̍ng-sá̤ⁿ, kṳ̍ Ai-déng dang-bing, Nô̤-deh dā̤-ho̤ng do̍.
4:17 Gai-ṳ̂ng gah i lāu-mâ cuh dua̍-sing saⁿ Î-do̤̍h: hṳ̂ seo̍h sí Gai-ṳ̂ng kî seo̍h-ceō siáⁿ, cuh ta̤̍h i giô̤ⁿ ē miá heō ca̤̍ siáⁿ ga̤̍u Î-do̤̍h.
4:18 Î-do̤̍h saⁿ Î-la̍h; Î-la̍h saⁿ Bî-hō-ngâ-lī; Bî-hō-ngâ-lī saⁿ Mâ-tô-sah-lī; Mâ-tô-sah-lī saⁿ La̍h-be̍h.
4:19 La̍h-be̍h teô nn̄g gá̤ lāu-mâ; seo̍h gá̤ miá A̍-dāi, seo̍h gá̤ miá Sêng-la̍h.
4:20 A̍-dāi saⁿ Ngâ-bah: i sī do̍ da̤̍uⁿ-báng n̍g táu-saⁿ náng ē cô-co̤ng.
4:21 I-dī miá Iú-bah: sī duáⁿ-gíng choi-sa̤u náng ē cô-co̤ng.
4:22 Sêng-la̍h saⁿ Tô-bah-gai-ṳ̂ng: sī pā-dáng pā-tī sai-hū ē cô-co̤ng; Tô-bah-gai-ṳ̂ng ē i-mo̍i miá Ná-mâ.
4:23 La̍h-be̍h gah i nn̄g gá̤ lāu-mâ gô̤ng:
- A̍-dāi Sêng-la̍h da̤u̍h tiaⁿ guâ ē siaⁿ-íng;
- La̍h-be̍h ē lāu-mâ tiaⁿ guâ ē uā:
- Co̤̍ng-seō sio̤ng guâ, guâ beoh tái i;
- Iu̍-dó̤ng hāi guâ, guâ beoh hāi i:
4:24 Seh-seô tái Gai-ṳ̂ng dih-dih siū hua̍h chih bōi,
- Nō̤ tái La̍h-be̍h, dih-dih siū hua̍h chih-se̍h-chih bōi.
4:25 A̍-do̤ng buh gah i lāu-mâ ceo̍ seo̍h báng; i lāu-mâ saⁿ giô̤ⁿ, miá i ga̤̍u Seh-de̍h. (Seh-de̍h huang-i̍h cuh sī seh-li̍h ē i̍-gī.) gô̤ng, Siō̤ng-Da̤̍ ing-ūi guâ, li̍h seo̍h gá̤ giô̤ⁿ, ta̤̍ Gai-ṳ̂ng sê̤ tái ē A̍-beh.
4:26 Seh-de̍h iā saⁿ giô̤ⁿ, miá i ga̤̍u Î-nô̤-seō: hiô̤ sí-cā̤ náng kî-chiû dô̤-go̤̍ Á̤-Hó̤-Hua ē miá. (He̍h ceo̍, Náng kî-chiû cia̍ⁿ ching Siō̤ng-Da̤̍ ga̤̍u Á̤-Hó̤-Hua.)