Pitla Storia bibia/N10

San Giambatista scumëncia a perdiché y a batejé

L fova unit l tëmp, ulache Gejù ulova nsenië publicamënter. Ntlëuta à scumencià san Giambatista ti paijes ntëur l ruf Giordano a perdiché y a batejé. Ël jiva dijan: "Fajëde penetënza, pervia che l rëni dl ciel ie daujin!"

San Giambatista purtova n guant de pëil de camel y na cënta de cuiam ntëur la vita. Si spëisa fova saioc y miel salvera.

Chëi de Gerusalem y duta la Giudea jiva da san Giambatista, che perdicova dlongia l ruf Giordano. Chisc scutova su cun atenzion, cunfessova si picëi y se fajova batejé da d'ël.

Truepes minova, che san Giambatista fosse l Salvator mpermetù. Davia de chël à dit san Giambatista: "Ie ne son pa (Gejù) Crist, ma do mé uniral chël, che po' de plu che ie; a chël ne ti sons nianca dëni, de i desćiulé i ciauzei no. Ie batejeie cun ega ala penetënza, ma ël (Gejù) ve batejerà cun l Spirt sant."