Maysa a bigat ti bulan ti Disiembre, ti bapor TABO sursurungenna a sisusulit ti nagsikkusikko nga ayos ti karayan Pasig, nga aduda dagiti simmakay kenkuana nga agturong iti pangukuman a La Laguna. Ti bapor kita na ti nabuntog, nganngani nagbukel a kas ti tabo, iso a nagtaudan ti nagan na, nalaos a nagrugit, numan pay napintaan iti puraw, nabannayat ket nadagsen, iti pannakagagara nan iti ininayad a pannagna. Nupay kasta, kaay-a yo dagiti tattao sa diay, nalabit gapo iti nagan na a pilipino, wenno gapo ta addaan kadagiti gagangay a kabkababalin dagiti banbanag sadiay, kas la maysa a balligi iti pannakibakal iti irarang-ay, maysa a bapor a di met bapor a naminpinsan, maysa a kameng a di agsukat, saan a nasayaat, ngem di met mabalin a susiken, ket no kas ta kayatna a makuna a naayat met iti irarang-ay, umanayen ti pannakaparabaw ti daan a pinta na.
Ket, tapno toy nainggasatan a bapor awan pagkurangan ti kinapilipino na! ¡No adda la ket sangkabassit a naimbag a pakinakem, mabalin pay a kunaen a iso ti barangay ti Turay, a naaramid babaen ti imaton dagiti Reberendos (pagraeman) ken Ilustrisimos (naslag unay) a tattao!
Raniagan ti init iti bigat a mamagkuti kadagiti daldalluyon ti karayan ken mamagsagawisiw iti angin kadagiti nalap-it a kawkawayan nga adda kadagiti agsumbangir a igigid, addaydiay ti puraw a bagina a mangisarua iti nangisit nga asok; ¡ti barangay ti Turay, kunada, kasta met a na pigsa ti panagasok na!... Ti tangguyob na, no manen, aguni, gargar ket nabangag, kas la maysa a nadangkok a kayatna ti mangituray iti bin-ig a pukkaw, ket gapo iti kasta iti uneg na, awan agkakaawatan. Kasna la dalapusen amin a masarakanna; kasna la rimrimiten dagiti SALSALAMBAW kawkawayan a pagala iti ikan, a iti panagkutikuti da umadadasda kadagiti tultulang ti sigante nga agdaydayawen iti
