Mizo Chanchin
(3) Tlangmite nena kan inanzia:
Assam ram chhung leh Burma ram chhunga tlângmite hi Tibeto Burman thlahte vek kha kan ni a. Kan dân ṭhenkhat leh kan chetze ṭhenkhat leh kan ṭawng ṭhenkhatte pawh a la inang nual hlawm a ni. Kachin ram atangin Karen hote thlengin, Aka te leh Abor hote aṭangin Rallêng te, Khasi te, Garo ho te thlengin dân ṭhenkhat leh chetze ṭhenkhat a kal tlang vek a, bul khat kan ni tih a lanna a la awm zeuh zeuh fo.
Hêng kan kiang hnâia tlang mi, Pawi ho te, Matu ho te, Paihte ho te, Thahdo ho te, Hmar te, Kâwm te, Zo ho te, Chiru te, Aimawl te, Khawl te, Tarau te. Anal te, Purum te, Tikhup te, Rangte te, Vaiphei te,Lakher te, Langrâwng te, Chawrai te, Bâwng te, Mualthuam te, Kaihpèn te, Pangkhua te, Tlânglau te, Biatê te, Hrangkhawl te, Bawmzo te, Miria te, Dâwn te, Takam te, Kumi te, Darlawngte ho nên phei hi chuan kạn lo in hla lo tih chiang tak taka hriatna tur a la tam a ni. Heng hote nên hi chuan kan tawng te, kan eizawn dan te, kan inthawi dante leh kan khawsak dan tam fe chu a la inang a, chuvangin chhui vak pawh ngai lovin kan la inhlat lohzia chu a hriat theih hle a, "Mizo," tih hian a huap thei vek a ni.
Tin, Tibeto-Burman an tih te ho kha chu an ṭawng kalhmang te a la inang vek a, thu mal ṭhenkhatte pawh kan Lusei ṭawngte thleng hian a la chhuizawn theih zel a ni tih hetah hian i en ang u. (See T.C. Hodson's Monograph on Meitei).
| Tibet | Burma | Meitei | Lusei | |
|---|---|---|---|---|
| House | Khyim | ein | im | in |
| fire | Me | mi | mei | mei |
| eye | Mik | myet | mit | mit |
| two | Nyi | hnit | anih | pah |
| five | Nga | nga | manga | panga |
