Sa luyag ko tinaya mo'ng bilidhon mong' dughan
Sa pana nga madamol sang mga Partong' kaaway,
Nga subong sa gihapon maisog ka kag makahas...
Kag nian may kinahanglan ako sa imo, Flavio,
Yadto'ng kaisog, pag-unong nga imo tanan inutang
Sa isang' Diwang' tagtuga, kusganan, manggagahum.
Ikaw nagakilala sa akon nga amay nimo
Kag Flavio, nga malubha, ang gugma mo imo ilisan?
Apang ngaa buyukon ko pa isang kalag
Nga gapabungol sa akon maayo nga mga laygay?
Anak nga wala'y palad, halin sa atubangan ko,
Kay di ka magpamati pagbuot kong' katapusan.
Masakit nga panumbong sang imo nga amay
Nga sang dughan gakagha. Paghalin ka na, Flavio,
Pahilayo sa amay mong' di mo napamatian...
Kag isiling mo na lang: "Paalam, tatay... utod ko..."
TITO. Ay! Flavio...
EUSTAQUIO. May mabakod ka nga tagipusuon
Sa pagsiling sina? Ayaw pagpatama.
Ikaw wala sing subong sina nga pagkalubha.
Ay! pagsabat, sabat, ikaw nga wala'y palad.
FLAVIO. Nagdaog ka, amay ko, kag ako sa tiilan mo! (nagaluhod).
Nahangad ko'ng Tagtuga nimo kag nahigugma!
Diwang' Makagagahum kutob ako bata pa.
Akon ginakilala. Kon ako iya batunon
Butkon Yang' mahigugmaon, Sia akon pa gid hangdon.
Mahimo nga batunon 'Ya ako bisan malaot?
