[LU:]
26. Atát dan and slóig móra ina sesam do gréss illathachaib círdubaib connice a cressa. Cochaill gerra aigreta impu. Ní anat ocus ní thairiset tria bithu, acht na cressa oca loscod eter úacht ocus tess. Slúaig demna na mórthimchiull, ocus pluic thentide i n‑allamaib oc á m‑búalad ina cend, ocus siat ic sirthacra friu. A n‑aigthe uile na trúag fo thúaid, ocus gǽth garb goirt ina fíretan mar oen ri cach n‑olc. Frassa derga tentide oc ferthain forro cach n‑aidche ocus cach lái, ocus ni chumgat a n‑imgabail, acht a fulang tria bithu sír oc cói ocus ic dogra.
27. Araile díb, ocus srúama (i. tunni) tened i tollaib a n‑gnússe; araili, clúi tened triana tengthaib; araile, tríana cendnaib dia n‑echtair. Is iat iarom filet isin phéin sin, i. gataige ocus ethgig ocus ǽs braith ocus écuaig ocus slataige ocus crechaire ocus brethemain gúbrethaig ocus ǽs cosnoma, (p. 30b:) mna aupthacha ocus cánti, aithdibergaig ocus fir
[LBr:]
26. Atat tra slóig mora and ina sessam do gres illathachaib duba conice a cressa. Cochaill gerra oigretta immpu. Ni anat ocus ni thoirisit tria bithu, acht a cressa ic a loscud itir fuacht ocus tess. Slóig démna ina mortimchell, ocus pluicc téntidi ina lamaib ic a m‑bualad ina cendaib, ocus siat oc sírthaccra friu. A n‑aigthi uli na tróg fo thuaid, ocus goeth garb goirt ina n‑enech ar oen fria cech n‑olc. Frassa derga tentidi ic ferthain forru cech dia. Ni chúmgat a n‑imgabail, acht a fulang co sír sír (sic) la cói ocus toirsi ocus dógrai.
27. Araile díb co sruamu tened i tollaib a n‑gnúsi, araili co clóthib triana tengthaib, araili co clothib triana cendaib a n‑echtair. Is iat tra filet isin pén sin, oes doichli ocus diultada cen serc cen grád Dé accu, gataigi ocus éthig (sic) ocus oes braith ocus écnaig ocus slataigi ocus crechaire, brethemain gúbrethaig ocus oes cosnuma, mná upthacha ocus cáinte, athdibergaig ocus óes légind frichnait
